6 TAPUY
Sajra kajman tanqawajtinku, ¿imatá ruwayman?
¿IMATÁ QAN RUWAWAJ?
Kaypi tʼukuriy: Albertoqa iskay compañerosninta qayllaykojta rikuspa mayta mancharikun. Kay semanallapi iskay kutitaña cigarrota pitachiyta munarqanku. Kaywanqa kinsa kutitaña.
Ujnin compañeron nin:
“¿Sapitallaykitaj? Kayta qorisqayki kusirikunaykipaj”, nispa.
Chʼirmirispataj bolsillonmanta cigarro cajitata orqhospa Albertoman jaywayta munashan.
Albertoqa compañeron cigarrota japʼishasqanta rikuspa astawan mancharikun.
Nintaj: “Niykiña mana pitasqayta”, nispa.
Niraj parlayta tukushajtintaj, ujnin compañeronñataj nin: “Ama manchali kaychu”, nispa.
Albertoqa mayta kallpachakuspa nin: “¡Mana! ¡Mana chaychu!”, nispa.
Chaymanta ujnin compañeronqa, wasanpi laqʼaykurispa chhichiykun: “Pitarillay. Mana imanasonqachu”, nispa.
Ñaupaj kaj compañeronqa uyan chaynejpipuni cigarrota kuyurichin, chhichiykuspataj nin: “Ni piman willasqaykuchu”, nispa.
Alberto kawaj chay, ¿imatá ruwawaj?
TUMPATA TʼUKURIY
Albertoj compañerosnin, ¿imatachus ruwashasqankuta yachankuchu? ¿Munasqankuraykuchu ajinata ruwashanku? Ichapis mana. Paykunaqa wajkuna nisqankuta ruwashanku. Chantapis amigosniyoj kayta munasqankuraykulla waj jóvenes nisqankuta ruwanku.
Qanpis ajinallapitaj rikukuspa, ¿imatá ruwawaj waj jóvenes imatachus nisusqankuta mana ruwanaykipaj?
SAJRA KAJTA REPARAY
Biblia nin: “Yuyayniyojqa sajra kajta rikuspa, pakakun; mana yuyayniyojrí sajraman chimpaykun, chantaqa ñakʼarin”, nispa (Proverbios 22:3).
Ima chʼampaypichus rikukunaykita reparayta atinki. Compañerosniyki cigarrota pitaspa jamushasqankupi tʼukuriy. Ñaupajmantaña wakichikunki chayqa, imatachus ninaykita, ruwanaykita ima sumajta yachanki.
TʼUKURIY
Biblia nin: “Mana juchachana kaychej sonqoykichejpa yuyaynimpi”, nispa (1 Pedro 3:16).
Waj jóvenes jina sajra kajta ruwaspa imaynachus sientekunaykipi tʼukuriy. Paykunaqa, nisusqankuta ruwajtillayki amigonkupaj rejsikapusonqanku. Niña amigonkupaj rejsikapusojtinkurí, ¿imaynataj sientekunki? ¿Amigosniykita kusichinaykiraykullachu, imayna rejsisqachus kasqaykita qhesachayta munanki? (Éxodo 23:2.)
AJLLAY
Biblia nin: “Yachayniyojqa sajra kajta manchachikun, chaymantataj tʼaqakun; wampurí may kasqanta yuyakuspa, ni imamanta dakunchu”, nispa (Proverbios 14:16).
Maykʼajllapis ajllananchejpuni kanqa, ajllasqanchejman jinataj kausayninchejpi allin riwasun chayri mana. Bibliaqa nin, Caín, Esaú, Judas ima mana allintachu ajllasqankuta, José, Job, Jesús imataj allinta ajllasqankuta. Qanrí, ¿imatá ajllanki?
Biblia nin: “Pichus pisi imaspi maychus kajta ruwan, chay runaqa ashkha imaspipis maychus kajta ruwallanqataj”, nispa (Lucas 16:10). Sajra kajta ruwaspa, ima llakiykunapichus rikukunaykipi tʼukurinkiña chayqa, imatachus ruwayta ajllasqaykita mana manchachikuspa niyta atillanki.
Ama llakikuychu, mana maytapunichu sutʼinchanayki tiyan. “Mana”, nispalla ninayki tiyan. Chantá nisqaykita ni imaraykú tijrachinaykita rikuchinaykipaj kayta niwaj:
“Chayta ruwanapaj ama ajllawaychu”.
“Chaykunataqa mana ruwanichu”.
“Qanqa allinta rejsiwanki, yachankitaj chaykunata mana ruwanayta”.
Cheqatapuni parlashasqaykita rikuchinaykipajqa, sutʼita parlay, usqhayllatataj kutichiy. Ajinata ruwajtiyki compañerosniykeqa niña sajra kajman tanqasonqankuchu.
SAJRA KAJTA RUWANAYKIPAJ TANQASOJTINKU
Compañerosniyki nisusqankuman jina ruwanki chayqa, robotninkuta jina apaykachasonqanku.
Ichapis compañerosniykeqa, “¡wa imanantaj! ¿Qʼewakushankichu?”, nispa pʼenqaypi rikhurichisunkuman. Jovenesqa pillatapis sajra kajman tanqanankupaj, ajinatapuni niyta yachanku. Ajinapi rikukuspa, ¿imatá ruwawaj? Iskay imasta ruwayta atinki.
Arí nillay. Ichá niwaj: “Arí, mana ruwaymanchu”, nispa. Chantá imaraykuchus mana ruwayta munasqaykita sutʼinchay.
Tʼukurichiy. Imaraykuchus sajra kajta mana ruwayta munasqaykita sutʼinchay, tʼukurinanpaj jinataj niy: “Yachayniyoj wayna kanki chayqa, nichá chay sajra kajta ruwawajchu”, nispa.
Sajra kajman tanqasotinkoqa, ayqey. Qhepakojtiykeqa, astawan tanqasunkuman. Ripuspaqa mana paykuna nisusqankuta ruwayta munasqaykita rikuchishanki.
Maykʼajllapis waj jovenesqa sajra kajman tanqasonqankupuni. Jinapis imatachus yuyasqaykita sutʼinchayta atinki, imatachus ruwanaykitapis ajllayta atinki. Chaytaj qanllamantaña kashan (Josué 24:15).