7 TAPUY

Khuchichakuyman tanqawajtinku, ¿imatá ruwayman?

¿IMARAYKUTAJ YACHANA?

Qhariwarmi jina pillawanpis puñuykusqaykeqa aswan qhepaman mayta llakichisunkiman.

**¿IMATÁ QAN RUWAWAJ?**

Kaypi tʼukuriy: Sandrawan Pablowanqa iskay killata jinaña rejsinakushanku, Sandraqa yuyan may unaypis Pablota rejsinman jina. Paykunaqa sapa pʼunchay telefononejta parlanku, mensajesta apachinakunku, imatachus ninakunankutapis yachankuña. Chaywanpis Pabloqa mana Sandrawan parlayllatachu munan.

Chay iskay killapi Pablowan Sandrawanqa makisninkumanta japʼinakunku, muchʼanakunku ima. Sandraqa mana Pablowan qhariwarmi jina puñuykuyta munanchu. Chaywanpis mana munanchu Pablo saqerparinanta. Imaraykuchus payllawan may munasqa sientekun. Sonqonpitaj nikun: “Pablowan noqawanqa mayta munanakuyku”, nispa.

Piwanpis rejsinakunaykipaj edadniyojña kaspapis, Sandra jina rikukuspa, ¿imatá ruwawaj?

TUMPATA TʼUKURIY

Uj ropata llimphuchanapaj apaykachakushan — Qhariwarmi jina puñuykoyqa casarasqasllapaj, Diostaj paykunaman chay regalota qon. Niraj casarakushaspa qhariwarmi jina puñuykuspaqa chay regalota pisipaj qhawashanki. Chayta ruwaytaj regalasusqanku mosoj ropatapis pichanaykipaj apaykachawaj jina.

Sutʼincharinapaj, uj sachʼa patamanta phinkiykamuspa chayri uj pʼisqo jina phawayta munaspaqa may llakiypi rikhuriwaj. Ajinallataj kanman ‘khuchichakuymanta tʼaqakuychejʼ nisqa kamachiyta pʼakejtiykipis (1 Tesalonicenses 4:3).

Chay kamachiyta pʼakisqanchejrayku, ¿ima chʼampaykunapitaj rikukusunman? Biblia nin: “Pichus khuchichakojrí cuerpompa contrampi juchallikun”, nispa (1 Corintios 6:18). ¿Ima niyta munan chay?

Yachayniyoj runasqa, ashkha jóvenes niraj casarakushaspa qhariwarmi jina puñuykusqankurayku kay jina llakiykunapi rikukusqankuta ninku.

LLAKISQAS. Wakin jovenesqa niraj casarashaspa qhariwarmi jina puñusqankumanta mayta pesachikusqankuta ninku.
ISKAYCHASQAS. Pillawanpis qhariwarmi jina puñuykojkunaqa “wajwanpis jinata puñuykullantajchá”, nispa ninku.
MANA KUSISQASCHU. Uj sipasqa munan uj wayna jarkʼananta, manataj qhariwarmi jina puñuykunallanpajchu qhawananta. Ashkha jovenestaj, paykunawan qhariwarmi jina puñuykoj sipaskunawan chayri mana respetachikoj sipaskunawan niña gustachikunkuchu.
¿Imatá yachakunchej? Niraj casarakushaspa qhariwarmi jina pillawanpis puñuykuspaqa, honraykita tʼakashanki (Romanos 1:24). Cuerpoykeqa uj sumaj regalo, chayrayku ama pimanpis jaywaykullaychu.

Chayrayku ‘khuchichakuy juchamanta tʼaqakuychejʼ nisqa kamachiyta kasukunaykipaj kallpachakuy (1 Tesalonicenses 4:3). Imaraykuchus maykʼajpis casarakuspaqa qhariwarmi jina puñuykuyta atillanki. Kusisqataj kanki, manataj niraj casarakushaspa qhariwarmi jina puñuykojkuna jinachu llakikunki, iskaychasqa kanki, pesachikunki ima (Proverbios 7:22, 23; 1 Corintios 7:3).

QHAWASQAYKIMAN JINA

Pillapis cheqamantapuni munakusunkiman chay, ¿paypa allinnillantachu maskʼanman?
Pillapis cheqamantapuni munakusunkiman chay, ¿Diospa kamachiyninta pʼakinaykipaj tanqasunkimanchu? (Hebreos 13:4).