Ana Jehová Diosmanta wawata mañakun

Israelita Elcanaqa iskay warmisniyoj karqa. Ujnenqa Ana karqa, ujnintaj Peniná. Paytaj Anata astawan munakoj. Peninaqa ashkha wawasniyoj karqa, Anatajrí mana wawasniyojchu karqa. Chayrayku Peninaqa Anata kʼumuykachachej. Elcanaqa sapa wata familianwan Siloman rej Jehová Diosta yupaychanankupaj. Chaypitaj payqa repararqa Ana may llakisqa kashasqanta. Chayrayku nerqa: “Ama waqaychu, noqa qanwan kashani, maytataj munakuyki”, nispa.

Chantá Anaqa sapallan Diosmanta mañakoj riporqa. Payqa waqaspa mañakorqa: “Jehová Diosníy, sichus uj qhari wawata qowanki chayqa, noqaqa chay wawata qanman qopusqayki tukuy kausayninpi qanta sirvisunanpaj”, nispa.

Kuraj kaj sacerdote Eliqa, Anata waqashajta rikuspa machasqa kasqanta yuyarqa. Chantá Anaqa nerqa: “Mana machasqachu kashani wiraqochíy. Astawanpis may llakisqa kashani, chay llakiyniytataj Jehová Diosman willakushani”, nispa. Elitaj pantaykusqanta reparakuspa nerqa: “Jehová Dios uyarisuchun tukuy chay mañakusqaykita”, nispa. Chaymanta Anaqa allillanña kasharqa, chantá riporqa. Niraj watanmantaj uj wawitayoj karqa, Samuel sutitataj churarqa. Anaqa may kusisqachá kasharqa.

Anaqa imatachus Jehová Diosman nisqanta mana qonqaporqachu. Chayrayku payqa Samuelta ñuñumanta pʼitiytawan Diosta yupaychana toldoman pusarqa, Elimantaj nerqa: “Jehová Diosmanta mañakorqani kay wawata qonawanta. Chayrayku pusamuni tukuy kausayninpi payta sirvinanpaj”, nispa. Elcanawan Anawanqa sapa wata wawanku Samuelta watukoj rej kanku, uj mosoj ropatataj apapoj kanku. Chantá Jehová Diosqa, Anaman kinsa qhari wawasta, iskay warmi wawastawan qorqa.