Sumaj amigo, wapu soldadotaj

Rey Saulpa kuraj wawan Jonatanqa, wapu soldado karqa. Davidtaj nerqa: “Jonatanqa aguilasmanta aswan ligerota phawaj, leonmantapis aswan kallpasapa karqa”, nispa. Uj kuti, Jonatanqa  filisteo soldadosta uj orqopi rikorqa. Armasninta apaykachapojtataj nerqa: “Filisteos wicharimuychej niwajtinchejqa maqanakoj risunchej. Chayqa Jehová Diosmanta señal kanqa”, nispa. Filisteostaj qhaparimorqanku: “Maqanakoj wicharimuychej”, nispa. Chayrayku wicharispa 20 filisteo soldadosta wañuracherqanku.

Jonatanqa Saulpa kuraj wawan kasqanrayku, tatan wañupojtin pay rey kanan karqa. Jinapis yacharqa Jehová Dios Davidta rey kananpaj ajllasqanta, nitaj paymanta envidiakorqachu. Astawanpis Davidwan sumaj amigos karqanku, yanapanakunankutataj ninakorqanku. Chayrayku Jonatanqa Davidman qoporqa mana mangasniyoj ropanta, espadanta, flechana arconta, chumpintawan.

David Saulmanta ayqekushajtin, Jonatanqa Davidman nimorqa: “Ama manchachikuychu. Jehová Dios ajllasunki rey kanaykipaj. Tatay Saulpis chaytaqa allinta yachan”, nispa. Tukuypis munasunman amigosninchej Jonatán jina kanankuta.

Jonatanqa Davidta yanapasqanrayku ashkha kutispi casi wañorqa. Payqa yacharqa Davidta tatan wañuchiyta munasqanta. Chayrayku tatanman nerqa: “Davidta wañuchispaqa juchallikunki. Payqa mana ima sajratapis qanta ruwasorqachu”, nispa. Saultaj mayta phiñakorqa. Aswan qhepamantaj paywan Jonatanwan uj maqanakupi wañorqanku.

Jonatán wañupusqanmanta qhepaman, Davidqa Jonatanpa wawan Mefibosetta maskʼarqa. Tariytawantaj nerqa: “Tatayki sumaj amigoy karqa. Chayrayku wañupunaykikama qhawasqayki. Kamachina wasiypi tiyakunki, noqawan khuskataj mikhunki”, nispa. Davidqa ni jaykʼaj amigon Jonatanmanta qonqaporqachu.