Rey David juchallikun

Saúl wañupusqantawan, Davidñataj rey karqa. Payqa 30 watasniyoj karqa. Aswan qhepamantaj Davidqa kamachina wasinpa terrazanpi uj chʼisi puriykachasharqa. Jinallapitaj uj kʼachita warmita rikorqa. Chantá payqa yacharqa chay warmej sutin Bat-Seba kasqanta, Uriaspa warmintaj kasqanta. Davidqa chay warmita kamachina wasinman pusachimuspa paywan puñuykorqa. Chay warmitaj onqoj rikhurerqa. Davidqa ruwasqanta pakayta munaspa soldadosninta kamachejman nerqa: “Uriasta maqanakupi ñaupajman churaychej, sapantataj saqerpankichej”, nispa. Ajinapi Uriasqa chay maqanakupi wañorqa, Davidtaj Bat-Sebawan casarakorqa.

Jehová Diostaj chayta qhawamusharqa. Chayrayku profeta Natanta Davidman kacharqa. Natantaj Davidman nerqa: “Uj qhapaj runa ashkha ovejasniyoj karqa, uj wajcha runataj uj kʼata munasqa ovejitallayoj. Qhapaj runatajrí chay wajcha runaj ovejitanta ñakʼacherqa”, nispa. Davidtaj mayta phiñakuspa nerqa: “Chay runaqa wañunan tiyan”, nispa. Natantaj nerqa: “Qan kanki chay runaqa”, nispa. Davidtaj may llakisqa nerqa: “Jehová Diospa contranta juchallikuni”, nispa. Davidqa juchanrayku mayta sufrerqa, jinallataj familianpis. Jehová Diosqa Davidta castigarqa. Jinapis David kʼumuykukoj sonqo kasqanrayku kausajta saqerqa.

Davidqa uj templota Jehová Diospaj ruwayta munarqa. Jehová Diostajrí Davidpa wawan Salomonta ajllarqa templota ruwananpaj. Davidtaj Salomón templota ruwananpaj tukuy imata wakicherqa, nerqataj: “Diospa templonqa may kʼachitupuni kanan tiyan. Salomonqa jovenllaraj, chayrayku tukuy imata wakichipusaj”, nispa. Davidqa templopaj ashkha qolqeta churarqa, sumaj trabajadorestataj maskʼarqa. Chantapis qorita, qolqe metalta tantarqa. Cedro maderatapis Sidonmanta, Tiromanta apamorqa. Viejituña kashaspataj wawanman temploj planosninta jaywarqa, nerqataj: “Jehová Diosmin kayta qosunayta niwarqa. Pay yanapasonqa. Ama manchachikuychu. Kallpachakuy, ruwaj churakuypacha”, nispa.