Carmelo orqopi tantakunku

Chunka aylluspa reyesnenqa may sajras karqanku, rey Achabtaj aswan sajra karqa. Achabqa Jezabelwan casarakorqa. Chay warmitaj Baal diosta yupaychaj, sajrataj karqa. Paykunaqa ashkha israelitasta Baalta yupaychanankupaj tanqarqanku. Jehová Diospa ashkha profetasnintapis wañucherqanku. Chayrayku Diosqa profeta Eliasta Achabman kacharqa.

Eliasqa Achabman nerqa: “Sajra kasqaykirayku Israelpi mana paranqachu”, nispa. Arí, Israelpeqa kinsa wata kurajta yarqhay karqa. Chantá Jehová Diosqa Eliasta Achabman kachallarqataj. Achabtaj Eliasta nerqa: “Qan juchayoj kanki mana paramunanpaj”, nispa. Eliastaj nerqa: “Mana noqachu juchayoj kani. Baalta yupaychasqaykirayku mana paramunchu. Chayrayku israelitasta, Baalpa profetasnintawan Carmelo orqoman tantachimuy. Yachasuntaj pichus cheqa Dios kasqanta”, nispa.

Israelitasqa Carmelo orqopi tantakorqanku, Eliastaj nerqa: “Amaña iskayrayaychejchu. Jehová Dios cheqa Dios chayqa, payta yupaychaychej, sitajchus Baal cheqa Dios chayqa, Baalta yupaychaychej. Chayta yachanapaj, Baalpa 450 profetasnin uj jaywanata wakichispa Baal diosninkuman qhaparikuchunku. Noqapis uj jaywanata wakichispa Jehová Diosman qhaparikusaj. Pichus ninata apachimojmin cheqa Dios kanqa”, nispa. Israelitastaj “chay nisqaykeqa allillan” nerqanku.

Baalpa profetasnenqa jaywanasninkuta wakicherqanku, diantintataj qhaparikorqanku: “Baal, uyariwayku”, nispa. Eliastaj asikuspa nerqa: “Aswan jatunmanta qhapariychej, ichapis puñushan, rijchʼarichiychej ari”, nispa. Chʼisiyaykushajtinñataj, Baalpa profetasnenqa qhaparishallarqankupuni, nitaj imapis karqachu.

Eliasqa altarman jaywananta churaspa yakuwan jichʼaykorqa. Chantá orakorqa: “Jehová Diosníy, kay runas yachachunku qanlla cheqa Dios kasqaykita”, nispa. Jehová Diostaj ninata apachimorqa jaywananta qʼolarparinanpaj. Runastaj nerqanku: “Jehovallamin cheqa Diosqa”, nispa. Eliastaj nerqa: “Baalpa profetasninta japʼiychej”, nispa. Chay diaqa Baalpa 450 profetasnin wañorqanku.

Chantá mar qocha patapi uj juchʼuy phuyu rikhurerqa. Eliastaj Achabman nerqa: “Sinchʼi para jamushan, carretaykipi ripuy”, nispa. Chantá phuyu yanayaykorqa, wayrawan imataj paraqa mayta jichʼakamorqa. Achabtaj carretanpi usqhayllata riporqa. Jehová Diostaj Eliasman kallpata qorqa, Achabpa carretanmanta aswan usqhayta correnanpaj. Qhepan capitulopi Eliasmanta yachakullasunpuni.