Jehová Dios Eliasta kallpachan

Jezabelqa Baalpa profetasnin wañuchisqa kasqankuta yachaytawan mayta phiñakorqa. Chayrayku Eliasman nicherqa: “Qʼaya wañuchisqayki, imaynatachus Baalpa profetasninta wañucherqanki ajinata”, nispa. Eliastaj mayta manchikuspa chʼin lugarman ayqekorqa. Chaypitaj orakorqa: “Ay Jehová Diosníy, imapajña kausasaj. Wañuchikapullawayña ari”, nispa. Chantá may saykʼusqa kasqanrayku sachʼa urapi puñurparerqa.

Diospa angelnenqa payta rijchʼarichispa, calmitallawan nerqa: “Sayarispa mikhuy”, nispa. Eliastaj rupha rumis patapi uj tʼantata, uj yurupi yakutawan rikorqa. Paytaj mikhorqa, ujyarqataj. Chantá watejmanta puñurpallarqataj. Angeltaj watejmanta rijchʼarichispa nerqa: “Mikhuy, karuraj rinaykeqa”, nispa. Eliastaj uj chhikatawan mikhorqa. Chantá 40 diasta, 40 tutastawan Horeb orqokama rerqa. Chaypitaj uj cuevaman puñoj yaykorqa. Jehová Diostaj nerqa: “¿Elías imatá kaypi ruwashanki?”, nispa. Eliastaj nerqa: “Israelitasqa nisusqankuta mana juntʼankuchu, altaresniykita urmarachinku, profetasniykitapis wañurachinku. Kunantaj noqatañataj wañuchiyta munashawanku”, nispa.

Jehová Diosqa Eliasta nerqa: “Llojsimuy, orqo patapitaj sayashaj qhepakuy”, nispa. Chantá sinchʼita wayramorqa, terremoto karqa, uj nina imataj karqa. Chaymanta Eliasqa uj kʼacha parlayta, manchay llanitullata uyarerqa. Chantá mantonwan uyanta qhataykukorqa, chay cuevaj punkupitaj sayarqa. Chaypitaj Dios taporqa imajtinchus ayqekushasqanta. Eliastaj nerqa: “Noqa sapallayña profetayki kani”, nispa. Jehová Diostaj nerqa: “Mana qanllachu kanki. Israelpeqa noqata yupaychawaj 7.000 runasraj kanku. Kunanqa Eliseota nimuy cuentaykimanta profeta kananpaj payta ajllasqayta”, nispa. Eliastaj Diosta chay rato kasorqa. Elías jina Diosta kasukusun chayqa, Dios yanapawasun. Qhepan capitulopi, chʼaki tiempopi imachus kasqanmanta yachakusun.