Jehová Dios Jehosafatta yanapan

Judamanta rey Jehosafatqa Baalpa altaresninta chinkacherqa, waj santosta ima. Munarqataj Jehová Diospa leyesninta runas rejsinankuta. Chayrayku kuraj kamachista, levitasta ima kacharqa Jehová Diospa leyesninmanta tukuynin Judapi yachachimunankupaj.

Judá qayllapi kaj nacionesmanta runasqa mana Jehosafatpa contranpi maqanakorqankuchu. Imaraykuchus yacharqanku Jehová Dios payta yanapashasqanta. Chayrayku rey Jehosafatman regalosta aparqanku. Moabitaswan, ammonitaswan, Seir orqomanta kajkunawantaj Jehosafatpa contranpi maqanakoj rerqanku. Rey Jehosafattaj Jehová Diospa yanapayninta necesitasqanta yacharqa. Chayrayku Jerusalenpi qharista, warmista, wawasta ima tantaykorqa. Ñaupaqenkupitaj orakorqa: “Jehová Diosníy, kay maqanakupi yanapariwayku, imatachus ruwanaykutapis niwayku”, nispa.

Jehová Diostaj Jehosafatta nerqa: “Ama manchachikuychejchu, noqa yanapasqaykichej. Lugarniykichejpi mana kuyurispa sayaykuychej, rikuychejtaj imaynatachus salvasusqaykichejta”, nispa. Imaynatachus Jehová Dios paykunata librasqanta yachakuna.

Qʼayantintaj Jehosafatqa takejkunata ajllarqa, nerqataj soldadospa ñaupaqenkuta rinankuta. Paykunataj Jerusalenmanta llojserqanku Tecoa chʼin pampapi enemigosninkuwan maqanakoj.

Takejkuna kusiywan Jehová Diosman tukuy kallpankuwan takiyta qallarejtinkutaj, Jehová Diosqa ammonitasta, moabitastawan paykunapurata maqanaykucherqa. Ajinapitaj tukuyninku wañorqanku. Jinapis Jehová Diosqa Judamanta runasta, soldadosta, sacerdotesta ima jarkʼarqa. Waj nacionesmanta runastaj, chayta yachaspa Jehová Dios llajtanta enemigosninmanta jarkʼashasqanta repararqanku. Jehová Diosqa llajtanta imaymanamanta salvan. Nitaj necesitanchu runaspa yanapanta.