Naamanwan Israelmanta imillitawan

Siriamanta soldadosqa Israelmanta uj imillitata Siriaman apakaporqanku. Chay imillitaqa familianmanta may karupi kasharqa. Payqa Siriapi Naamanpa warminpa sirvientan karqa. Naamantaj reypa soldadosninpa comandantenku karqa. Chay imillitaqa Jehová Diosta yupaychaj, chaypi tiyakoj runastaj mana.

Naamanqa lepra onqoyniyoj karqa, chaytaj maytachá nanaj. Chay imillitaqa Naamanta yanapayta munarqa. Chayrayku patronanman nerqa: “Israel llajtapi Jehová Diospa profetan tiyan. Paypa sutenqa Eliseo. Pay qosaykita sanoyachiyta atinman”, nispa.

Patronantaj imillitaj nisqanta qosan Naamanman willarqa. Naamantajrí sanoyapunanpaj tukuy imata ruwayta munarqa. Chayrayku Israelman rerqa Eliseoj wasinman. Payqa yuyarqa Eliseo uj may rejsisqa runata jina wasinman yaykuchinanta. Eliseotajrí mana chaytachu ruwarqa. Astawanpis kamachinwan willacherqa: “Jordán mayuman rispa qanchis kutita bañakamuy, sanoyapunkitaj”, nispa.

Naamantaj mayta rabiakuspa nerqa: “Noqaqa nisharqani: ‘Diospa profetanqa llojsimuspa ñaupaqeypi sayaykonqa, Jehová Diosninpa sutinta oqharispataj makinta nanasqasniy patapi kuyuchenqa sanoyachinanpaj’, nispa. Astawanpis Israelpi kaj Jordán mayuman rinallayta niwan. Siriapi aswan sumaj mayus kapuwayku. ¿Nichu chay sumaj mayuspi bañakamuspa sanoyapuyman?”, nispa. May rabiasqataj Eliseoj wasinmanta riporqa.

Naamantaqa sirvientesnin sumajta piensaricherqanku, jinata nispa: “Tatáy, ¿tukuy imatacharí ruwawaj sanoyakunaykipaj? Chay profetaj nisusqanqa ruwayta atinaykipaj jinalla. Payta kasullay”, nispa. Naamanqa sirvientesninta uyarispa Jordán mayupi qanchis kutita chʼultikorqa. Qanchis kaj kutipi yakumanta llojsimusqantawantaj sanoyaporqa. Naamanqa manchay kusisqa kasharqa, Eliseoman agradecekojtaj kuterqa. Nerqataj: “Kunanqa sutʼita yachani tukuynin jallpʼantinpi mana waj Dios kasqanta”, nispa. Naamanqa wasinman sano kutiporqa. Israelmanta imillitataj chayta rikuspa maytachá kusikorqa.