Jehoiadá mana manchachikoj karqa

Ataliaqa maman Jezabel jina manchay sajra karqa. Payqa Judá llajtamanta reywan casarakorqa. Chay rey wañupojtintaj wawanku rey karqa. Wawanku wañupojtintaj Ataliaqa payllamanta kamachiyta qallarerqa. Mana pipis cuentanmanta kamachinanpajtaj allchhisninta, reypa tukuynin familianta ima wañuracherqa. Chayrayku tukuy runas payta manchachikoj kanku.

Kuraj kaj sacerdote Jehoiadawan warmin Jehosebawanqa yacharqanku Ataliaj ruwasqan mana allinchu kasqanta. Chayrayku kausayninkuta wañuy pataman churaspa Ataliaj ujnin allchhinta pakaykorqanku. Chay allchhinqa uña wawitallaraj karqa, Jehoastaj sutikorqa. Jehoastaqa Diospa templonpi uywarqanku.

Jehoiadaqa soldadosta kamachejkunata, levitasta ima tantaykorqa Jehoás 7 watitasniyoj kashajtin. Paykunamantaj nerqa: “Temploj punkusninta qhawaychej ni pi yaykumunanpaj”, nispa. Chantá Jehoiadaqa Jehoaspa umanman coronata churaykorqa Judamanta rey kananpaj. Runastaj qhaparerqanku: “Jallalla rey”, nispa.

Chayta uyarispa reina Ataliaqa usqhayllata temploman correrqa. Waj reyta rikuspataj qhaparerqa: “¡Contrayta oqharikunku! ¡Contrayta oqharikunku!”, nispa. Soldadosta kamachejkunataj Ataliata japʼiytawan wañuchimorqanku. Chay warmeqa millay imasta ruwarqa.

Jehoiadaqa runasta yanaparqa Jehová Dioswan uj tratota ruwanankupaj. Chay tratopitaj Jehovallata yupaychanankuta nerqanku. Chantá Jehoiadaqa Baalpa templonta, santosninta ima urmachicherqa. Diospa templonpitaj sacerdotesta, levitasta ima churarqa, runas watejmanta Jehová Diosta yupaychanankupaj. Chantapis templota qhawajkunata churarqa, chʼichipaj qhawasqa runas mana yaykunankupaj. Chantá Jehoiadaqa, soldadosta kamachejkunawan Jehoasta kamachina wasiman pusarqa, kamachina tiyanapitaj tiyaykucherqa. Judamanta runastaj mayta kusikorqanku. Imaraykuchus chay sajra warmi wañorqaña, nitaj Baalta yupaychaypis karqañachu. Jehoiadaqa mana manchachikusqanrayku ashkha runasta yanaparqa.