Diosqa Jeremiasta willananpaj kachan

Jehová Diosqa Jeremiasta ajllarqa Judapi profeta kananpaj. Payqa runasman willanan karqa sajra imasta manaña ruwanankuta. Jeremiasqa nerqa: “Jehová Diosníy, jovencitollaraj kani, nitaj sumajta parlayta atinichu”, nispa. Diostaj nerqa: “Ama manchikuychu, noqa yanapasqayki, imatachus ninaykitapis nisqayki”, nispa.

Jehová Diosqa Jeremiasta nerqa llajtamanta kuraj runasta tantaykuspa, ñaupaqenkupi uj yuruta pʼakinanta. Nillarqataj kayta ninanta: “Kikillantataj Jehová Diosqa Jerusalenwan ruwanqa”, nispa. Chayta uyarispataj kuraj runasqa mayta phiñakorqanku. Sacerdote Pasjurqa Jeremiasta maqaytawan maderamanta cepoman japʼiykucherqa. Jeremiastaj chaypi tutantin mana kuyuriyta aterqachu. Pasjurqa qʼayantin paqarinraj Jeremiasta cepomanta kacharicherqa. Jeremiastaj nerqa: “Manaña aguantanichu. Niña willasajchu”, nispa. Sumajta tʼukurispataj nerqa: “Willallasajpuni, Diospa nisqasnenqa sonqoypi nina jina kʼajariwan”, nispa. Chayrayku payqa willallarqapuni.

Aswan qhepamantaj, Judapi waj reyñataj karqa. Sacerdoteswan llulla profetaswanqa mana munarqankuchu Jeremías willananta. Chayrayku autoridadesman nerqanku: “Kay runaqa wañunan tiyan”, nispa. Jeremiastaj nerqa: “Wañuchiwankichej chayqa, mana juchayoj runata wañuchinkichej. Noqaqa Jehová Diospa nisqallanta willani”, nispa. Chayta uyarispataj autoridades nerqanku: “Kay runaqa mana wañuchisqa kananpaj jinachu”, nispa.

Jeremiasqa willallarqapuni. Autoridadestaj mayta phiñakuspa, reyman nerqanku Jeremiasta wañuchinanta. Reytaj nerqa: “Qankuna imanaychejpis”, nispa. Chayrayku Jeremiasta uj estanqueman wijchʼuykorqanku. Chay estanqueqa tʼurulla kasharqa, Jeremiastaj pisimanta pisi chay tʼuruman chinkaykusharqa.

Ébed-Melecqa, kamachina wasipi kuraj kamachi karqa. Paytaj reyman nerqa: “Autoridadesqa Jeremiasta uj estanqueman wijchʼuykunku. Mana orqhomojtinchejqa, chaypi wañonqa”, nispa. Reytaj Ébed-Melecta kamacherqa 30 runasta pusariykukuspa, Jeremiasta orqhomoj rinanta. Jeremiastaj willallarqapuni. Noqanchejpis Jeremías jina ruwayta munanchej.