Ester llajta masisninta yanapan

Sipas Esterqa judía karqa, Persia suyoj Susa llajtanpitaj tiyakorqa. Ashkha watas ñaupajta rey Nabucodonosor Esterpa familianta Jerusalén llajtamanta apakapusqa. Estertaqa primon Mardoqueo uywakorqa. Mardoqueotaj Persiamanta rey Asueroj kamachin karqa.

Rey Asueroqa waj reinatañataj ajllayta munaspa, Persiamanta kʼachita warmista kamachina wasinman pusacherqa. Paykuna ukhumantataj Esterta reina kananpaj ajllarqa. Chayrayku Mardoqueo Esterman nerqa: “Ni piman willankichu judía kasqaykita”, nispa.

Hamán sutiyoj runaqa reypa kuraj kamachin karqa, maytataj jatunchakoj. Munajtaj tukuy runas payman kʼumuykukunankuta. Mardoqueo payman mana kʼumuykukojtintaj mayta phiñakorqa, wañuchiytataj munarqa. Hamanqa Mardoqueo judío kasqanta yachaytawan, judiosta wañuchiyta munaspa reyman nerqa: “Judiosqa mana kasusunkuchu, tukuyninkuta wañuchina”, nispa. Reytaj nerqa: “Nisqaykiman jina ruway”, nispa. Chantá uj leyta orqhonanpaj Hamanman permisota qorqa. Chay leypitaj nerqa adar killamanta 13 pʼunchaypi judiosta wañuchinankuta. Jehová Diostaj chayta qhawasharqa.

Esterqa mana chay leymanta yacharqachu. Chayrayku Mardoqueo chay leymanta uj copiata payman apacherqa, nerqataj reywan parlamunanta. Estertaj nerqa: “Pillapis reypaman mana wajyarisqalla yaykojqa wañuchisqa kanan tiyan. Noqatataj reyqa kinsa chunka pʼunchayña mana wajyachiwanchu. Jinapis risaj. Rey qorimanta tojnunta jaywarillawajtin salvakusaj”, nispa.

Esterqa reypaman rerqa. Reytaj payman qorimanta tojnunta jaywarerqa. Ester qayllaykojtintaj nerqa: “¿Imatá mañakuwayta munanki?”, nispa. Estertaj nerqa: “Qanpaj wakichisqay mikhuyman Hamanwan jamunaykita”, nispa. Chayman rejtinkutaj waj mikhuymanñataj paykunata wajyarerqa. Chay qhepa mikhuypitaj reyqa Esterta ujtawan nerqa: “¿Imitatá munashanki reina Ester?”, nispa. Estertaj nerqa: “Uj runa llajta masisniyta, noqatawan wañuchiyta munawayku. Yanapariwayku ari”, nispa. Reytaj nerqa: “¿Pitaj chay runari?”, nispa. Estertaj nerqa: “Chay runaqa kay Hamán”, nispa. Reytaj mayta phiñakuspa, chay rato nerqa Hamanta wañuchinankuta.

Jinapis Hamanpa orqhosqan leytaqa ni reypis cambiayta aterqachu. Chayrayku reyqa Mardoqueota kuraj kamachin kananpaj churarqa, atiytataj qorqa uj leyta orqhonanpaj. Chay leypeqa nerqa judíos enemigosninkumanta jarkʼakunankuta. 13 de adarpitaj judiosqa enemigosninkuta atiparqanku. Chay diamantapachataj chay pʼunchayta sapa wata yuyarikorqanku.