Ángel Gabriel Mariata waturin

Elisabetpa familiarnin Mariaqa Nazaretpi tiyakorqa. Payqa José sutiyoj carpinterowan casarakunan karqa. Elisabet sojta killa onqoj kashajtintaj, ángel Gabriel payman rikhurerqa, napaykorqataj: “Imaynalla María, Jehová Diosqa sonqo juntʼasqa qanwan kashan”, nispa. María chayta mana entiendesqanraykutaj ángel nerqa: “Onqoj rikhurinki uj qhari wawitayojtaj kanki, paymantaj Jesús sutita churanki. Payqa rey kanqa, gobiernontaj mana tukukonqachu”, nispa.

María nerqa: “¿Imaynataj chay kanmanri? Noqaqa mana ni pi qhariwanpis puñuykunirajchu”, nispa. Angeltaj nerqa: “Jehová Diospajqa ni imapis mana atikojqa kanchu. Espíritu santo qanman jamonqa, uj qhari wawata nacechikunki. Familiayki Elisabetpis awelita kayninpi qhari wawayoj kanqa”, nispa. Mariataj nerqa: “Jehová Diospa kamachin kani, nisqaykiman jina noqapi ruwakuchun”, nispa.

Chantá Mariaqa Elisabetta waturikoj rerqa. Pay Elisabetta saludajtintaj, Elisabetpa wawitanqa wijsanpi kuyurerqa. Elisabettaj espíritu santowan juntʼa kaspa nerqa: “María, bendecisqa kanki. ¿Pitaj noqa kasqani Señorniypa maman watukunawanpajri? ”, nispa. Mariataj nerqa: “Noqaqa Jehová Diosta tukuy sonqo jatunchani”, nispa. Chantá Mariaqa kinsa killata Elisabetwan qhepakuytawan kutiporqa.

Joseqa María onqoj kashasqanta yachaspa manaña casarakuyta munarqachu. Jinapis Diospa angelnin mosqoypi nerqa: “José, Davidpa wawan, ama manchachikuychu warmiyki Mariata wasiykiman pusakapuyta, payqa onqoj rikhurin espíritu santonejta”, nispa. Chayrayku Joseqa Mariawan casarakorqa, wasinmantaj pusakaporqa.