Jesús nacekusqanta ángeles willanku

César Augustoqa Romapi gobierno kashaspa nerqa, tukuy judíos llajtankuman rispa qhelqachikamunankuta. Chayrayku Josewan Mariawanqa, Belenman rerqanku. Chay tiempopajqa María wawitanta nacechikunanpaj jinaña kasharqa.

Belenman chayaspataj ni maypi alojakuyta aterqankuchu. Chayrayku uywa kanchapi qhepakorqanku. Chaypitaj Mariaqa Jesusta nacechikorqa, janantaswan maytʼuykuspataj uywa qaranaman puñuykucherqa.

Belén qayllapi michejkunaqa tutantin ovejasninkuta qhawasharqanku. Jinallapi paykunaman uj ángel rikhurerqa, Jehová Diospa kʼanchaynintaj mayta lliphipirerqa. Michejkunataj mayta mancharikorqanku, paykunamantaj chay ángel nerqa: “Ama manchachikuychejchu, sumaj willaykunata willasqaykichej. Mesías Belenpi nacekun”, nispa. Chay ratopachataj may chhika ángeles cielopi rikhurerqanku, nerqankutaj: “Diosqa cielopi jatunchasqa kachun, kay jallpʼapitaj sonqo tiyaykuy kachun”, nispa. Chantá angelesqa chinkaporqanku.

Michejkunataj ninakorqanku: “Rinanchejpuni tiyan Belenman”, nispa. Usqhayllata rispataj, uywa kanchapi Joseta, Mariata, wawitatawan tariparqanku.

Chantá angelpa nisqanta tukuy chaypi kajkunaman willarqanku, paykunataj mayta tʼukorqanku. Mariaqa michejkunaj nisqankuta umanpi japʼikorqa, nitaj qonqarqachu. Chantá michejkunaqa ovejasninkuta michej kutiporqanku, chay imasta rikusqankumanta, uyarisqankumanta imataj Jehová Diosman agradecekorqanku.