Jesusqa uj warmiwan parlan

Jesusqa Pascua pasayta discipulosninwan Galileaman kutiporqa. Samarianta kutipushaspataj Sicar llajtapi samarikorqanku, Jacobpa pozon chaynejpi. Jesusqa chay pozo chaypi qhepakorqa, discipulosnintaj mikhunata rantej rerqanku.

Uj warmitaj yakuman jamorqa, Jesustaj payman nerqa: “Yakuta qoriway”, nispa. Paytaj nerqa: “¿Imajtintaj parlashawanki? Judiosqa mana samaritanoswan parlankuchu”, nispa. Jesustaj nerqa: “Pichus kasqayta yachaspaqa, yakuta mañakuwankiman, noqataj kausachej yakuta qoriykiman”, nispa. Warmitaj nerqa: “Ni imaykipis kanchu yakuta orqhonaykipaj”, nispa. Jesustaj nerqa: “Noqaj qosqay yakuta tomajqa manaña jaykʼajpis chʼakichikonqachu”, nispa. Warmitaj nerqa: “Señor, chay yakuta qoriway”, nispa.

Jesustaj nerqa: “Qosaykita wajyamuy”, nispa. Warmitaj nerqa: “Mana qosay kanchu”, nispa. Jesustaj nerqa: “Ajinapuni, phishqa kutita casararqanki, piwanchus tiyakushanki chaytaj mana qosaykichu”, nispa. Chay warmitaj nerqa: “Profeta kasqaykita reparani. Samaritanosqa kay orqopi Diosta yupaychanata ninku. Judiostaj Jerusalenllapi yupaychanata ninku. Noqaqa yuyani Mesías jamuspa imaynatachus yupaychanata yachachinawanchejta”, nispa. Chantá Jesús nerqa: “Noqa kani Mesías”, nispa. Chaytataj Jesusqa ni pimanpis willarqarajchu.

Chay warmeqa correspa samaritanosman nimorqa: “Jaku, uj runata rejsimunkichej, payqa tukuy imata uyaypi niwan. Ichapis pay Mesías”, nispa. Samaritanostaj chay warmiwan khuska rerqanku, Jesuspa yachachisqanta uyarej.

Samaritanosqa Jesusta quedacherqanku. Jesustaj iskay diasta quedakuspa yachacherqa, ashkha runastaj paypi creerqanku. Chantá runasqa nerqanku: “Kay runata uyariytawan, yachayku paypuni runasta salvananta”, nispa.