Jesús orqopi yachachin

Jesusqa 12 apostolesninta ajllaytawan orqomanta uraykamorqa. Ashkha runas tantasqa kasharqanku chaynejmantaj rerqa. Chay runasqa jamusqanku Galileamanta, Judeamanta, Tiromanta, Sidonmanta, Siriamanta, Jordán mayu chimpamantawan. Paykunaqa pusamusqanku onqosqasta, supayniyojkunatawan. Jesustaj paykunata sanoyacherqa. Chantá Jesusqa tiyaykuytawan yachacherqa. Payqa sutʼincharqa Diospa amigon kanapaj Jehová Diospa yanapanta necesitasqanchejta, paytataj munakunanchej kasqanta. Jinapis Diosta munakunapajqa, runa masinchejtapis munakuna tiyan. Enemigosninchejwanpis kʼachas kana tiyan, allinpajtaj qhawana tiyan.

Jesús nerqa: “Ama amigosnillaykitaqa munakuychu, manaqa enemigosniykitapis tukuy sonqo perdonay. Pillapis phiñakojtenqa usqhayllata perdonta mañakamuy. Imatachus munanki runas qanpaj ruwanankuta, chayllatataj qanpis paykunapaj ruwapuy”, nispa.

Jesusqa qhapaj kayta imaynatachus qhawanata yuyaychallarqataj. Pay nerqa: “Aswan allin Jehová Diospa amigon kana, ashkha qolqeyoj kanamantaqa. Imajtinchus qolqetaqa suwasunkuman, Dioswan amigos kasqaykitataj ni pí suwasunkimanchu. Chayrayku ama llakikuychu mikhunamanta, ujyanamanta, nitaj ropamantapis. Pʼisqetusta qhawariy. Diosqa paykunaman mikhunata qon. Llakikuspataj mana aswan unaytachu kausanki. Ama qonqaychu, Jehová Diosqa yachan imatachus necesitasqaykita”, nispa.

Runasqa Jesusta uyarispa tʼukorqanku. Imajtinchus fariseoswan leymanta yachachejkunawanqa mana chay imasta paykunaman yachachisqankuchu. ¿Imajtintaj Jesús sumajta yachachej? Imajtinchus yachachisqanqa Jehová Diosmanta karqa.