Jesús Diosmanta mañakuyta yachachin

Fariseosqa tukuy imata ruwaj kanku runasta tʼukuchinankupaj. Allin imasta ruwaspataj, tukuywan rikuchikuyta munaj kanku. Paykunaqa ashkha runas purinku chaynejpi Diosmanta mañakoj kanku. Chantapis sinagogaspi, calle esquinaspi kikin palabrasta oqharispa unayta mañakoj kanku. Chayrayku runasqa tʼukorqanku Jesús kayta nejtin: “Ama fariseos jinaqa mañakuychejchu. Paykunaqa yuyanku ashkhata parlaspa Dioswan uyarichikunankuta, chaytaj mana jinachu. Orakuspaqa Tatanchej Jehovaman qayllaykuy. Ama kikin palabrasta oqharispachu mañakuy. Jehová Diosqa munan imaynachus kashasqaykita willarinaykita”, nispa.

Jesús nillarqapuni: “Kay jinata Diosmanta mañakuychej: ‘Cielopi kashaj Tatayku, sutiyki jatunchasqa kachun. Gobiernoyki jamuchun. Munayniykitaj ruwasqa kachun, imaynachus cielopi, ajinallatataj kay jallpʼapipis”, nispa. Chantá Jesusqa nerqa mikhunata, perdonta, waj imastawan mañakunankuta.

Jesús nillarqataj: “Tatanchej Jehovamanta allin imasta mañakullaychejpuni. Tatasqa wawasninkuman allin imasta qoyta munanku. Wawayki tʼantata mañakusojtin, ¿rumitachu qowaj? Pescadota mañakusojtin, ¿kataritachu qowaj?”, nispa.

Chantá Jesús nerqa: “Sichus wawasniykichejman allin imasta qoyta yachankichej chayqa, cielopi kashaj Tataykichejqa astawanraj espíritu santonta qosonqachej. Chaypajqa mañakullaychejpuni”, nispa. ¿Jesús nisqanman jinachu mañakushanki? ¿Imastataj Jehová Diosmanta mañakunki?