Jesús yaku patanta purin

Jesusqa onqosqasta sanoyachiyta, wañusqastapis kausarichiyta aterqa. Chantapis payqa wayrata, paratapis thañichiyta aterqa. Payqa orqopi Diosmanta mañakuytawan Galilea qochata qhawarispa sinchʼita wayrashasqanta rikorqa. Apostolesnenqa canoata atispa mana atispa purichisharqanku. Chayta rikuytawan Jesusqa yaku patanta paykunaman rerqa. Apostolestaj payta rikuspa mayta mancharikorqanku. Jesustaj paykunata nerqa: “Noqa kani, ama manchachikuychejchu”, nispa.

Pedrotaj nerqa: “Señor, qanchus kanki chayqa, niway qanman jamunayta”, nispa. Jesustaj nerqa: “¡Jamuy!”, nispa. Pedrotaj canoamanta uraykuytawan, jina wayrapi yaku patanta Jesusman rerqa. Jesusman qayllaykushaspataj sinchʼita wayrashasqanrayku mancharikorqa, yakuman chinkaykoj jinaña kashaspataj qhaparerqa: “¡Señor, salvaway!”, nispa. Jesustaj makinmanta aysarispa nerqa: “Pisi creeyniyoj runa. ¿Imaraykutaj iskayrayankiri?”, nispa.

Jesuswan Pedrowanqa canoaman wicharerqanku, sinchʼi wayrataj thañiporqa. Apostolesqa tʼukullachá kasharqanku. Paykunaqa Jesusman nerqanku: “Qanqa Diospa Wawanpuni kanki”, nispa.

Jesusqa waj kutipipis paratawan wayratawan thañichillarqataj. Payqa apostolesninwan canoapi rishajtinku qhepanejpi puñurparerqa. Chayllapitaj manchay sinchʼi wayra oqharikorqa, canoataj yakuman chinkaykusharqaña yaku juntʼaykusqanrayku. Apostolestaj Jesusta rijchʼarichiytawan nerqanku: “Yachachejníy, ¡yanapawayku ari! ¡Chinkaykushanchejña!”, nispa. Jesustaj sayarispa qochata nerqa: “¡Chʼin kay! ¡Ama qhollchoqeyaychu!”, nispa. Chay ratopachataj wayraqa thañerqa, qochapis tiyaykorqa. Chantá apostolesta nerqa: “¿Manarajchu creenkichej?”, nispa. Paykunataj ninakusharqanku: “Wayrapis qochapis paytaqa kasunku”, nispa. Jinamanta apostolesqa yachakorqanku, Jesuspi tukuy sonqo atienekuspaqa ni imamanta manchachikunankuchu kasqanta.