Jesuspa qhepa kaj cenan

Judiosqa sapa wata 14 de nisán killapi Pascuata ruwaj kanku. Chayta ruwaspa yuyarikoj kanku Jehová Dios paykunata Egiptomanta orqhomuspa Sumaj Jallpʼaman pusasqanta. Jesuswan apostoleswanqa 33 watapi Jerusalenpi uj wasej altos patanpi Pascuata ruwarqanku. Cenasqankutawantaj Jesús nerqa: “Qankunamanta ujniykichej japʼichiwanqa”, nispa. Apostolestaj tʼukuspa nerqanku: “Señor, ¿noqachu kani?”, nispa. Jesustaj kuticherqa: “Pimanchus parti tʼantata jaywasaj chay kashan”, nispa. Chantá Jesusqa uj parti tʼantata Judas Iscarioteman jaywarqa. Judastaj chay rato sayariytawan riporqa.

Chantá Jesusqa orakorqa, tʼantata partiytawantaj apostolesninman jaywaspa nerqa: “Kay tʼantata mikhuychej. Imaraykuchus cuerpoywan ninakun, qankunaraykutaj qosqa kanqa”, nispa. Chantá orakuytawan vinota jaywaspa nerqa: “Kay vinota tomaychej. Imaraykuchus yawarniywan ninakun, juchasniykichejraykutaj jichʼasqa kanqa. Qankunaqa noqawan cielopi reyes kankichej. Kaytataj sapa wata ruwaychej noqamanta yuyarikuspa”, nispa. Jesuspa yachachisqasnenqa sapa wata chay fechapi chay tantakuyta ruwallankupuni. Chay tantakuytataj Señorpa Cenan sutiwan rejsikun.

Chay cena pasayta apostolesqa siminakorqanku mayqenninkuchus aswan kuraj kasqanmanta. Jesustaj paykunata nerqa: “Kurajpaj qhawasqa kajqa, sullkʼa jina kanan tiyan”, nispa.

Jesusqa paykunaman nillarqataj: “Amigosniy kasqaykichejrayku imatachus Tatay niwasqanta willaykichej. Tatayman kutipusajña, qankunataj kaypi qhepakunkichej. Purajmanta munanakojtiykichej runasqa reparanqanku yachachisqasniy kasqaykichejta. Imaynatachus noqa munakuykichej, ajinallatataj purajmanta munanakunaykichej tiyan”, nispa.

Chantá Jesusqa Jehová Diosmanta mañakorqa yachachisqasnin khuska llankʼanankupaj, ujchasqataj kanankupaj. Chantapis mañakullarqataj Diospa sutin jatunchasqa kananpaj. Chantá Jesuswan apostolesninwan Jehová Diosman takerqanku, riporqankutaj. Pisi tiempollaña karqa Jesusta presochanankupaj.