Jesús cieloman kutipun

Jesusqa Galileapi discipulosninman nerqa: “Rispa, tukuy nacionesmanta runasta discipulosniyman tukuchimuychej. Yachacherqaykichej chayta yachachispataj bautizaychej”, nispa. Chantá nerqa: “Ama qonqaychejchu, qankunallawanpuni kasaj”, nispa.

Jesusqa kausarimuytawan, Jerusalenpi, Judeapi ima ashkha discipulosninman rikhurerqa. Payqa kausarimusqanmanta qhepan 40 diaspi sumajta yachacherqa, ashkha milagrostataj ruwarqa. Chantá Olivos orqopi apostolesninwan uj kutillatawanña tantakuspa nerqa: “Ama Jerusalenmanta ripunkichejchu. Suyallaychejpuni Tatay qosaj nerqa chayta juntʼananta”, nispa.

Apostolestaj chayta mana entiendespa taporqanku: “Señor, ¿kunanchu Israelpi rey jina gobernanki?”, nispa. Jesustaj nerqa: “Jehová Diosqa manaraj rey kanayta munanchu. Jinapis tumpamantawan Diospa espíritu santonta japʼinkichej, noqamantataj testigos jina willamunkichej Jerusalenpi, Judeapi, Samariapi, kay jallpʼaj tukuynin kʼuchusninpi ima”, nispa.

Chantá Jesusqa cieloman kutiporqa, uj phuyutaj payta pʼampaykorqa. Discipulosnintaj cielota qhawashallarqankupuni, Jesustaj chinkaporqa.

Discipulosqa Olivos orqomanta Jerusalenman kutiporqanku. Chaypitaj uj wasej altos patanpi tantakoj kanku, orakojtaj kanku. Suyasharqankutaj imatachus ruwanankuta yachanankupaj, Jesús kamachiykunata qonanta.