Discípulos espíritu santota japʼinku

Jesús cieloman ripusqanmanta 10 diasninman, Jerusalenpi 33 watamanta Pentecostés Fiesta karqa. Chaymanqa tukuynejmanta runas rerqanku. Chay diaqa, Jesuspa discipulosnin 120 jina, Jerusalenpi uj wasej altos patanpi tantasqa kasharqanku. Chantá sinchʼi wayraj sonaynin jina wasiman juntʼaykorqa. Sapa ujpa umanpitaj nina lauray qallus jina rikhurerqa. Tukuyninkutaj espíritu santota japʼispa waj parlaykunapi parlayta qallarerqanku.

Tukuynejmanta rej runastaj, chay sonayta uyarispa chay wasiman rerqanku. Chantá mayta tʼukorqanku Jesuspa discipulosninta waj parlaykunapi parlajta uyarispa. Nerqankutaj: “Paykunaqa Galileamanta kanku. ¿Imaynapitaj sapa ujninchejpa parlayninchejpi parlashankuri?”, nispa.

Pedrowan waj apostoleswantaj tukuyninkoj ñaupaqenkuman sayaykorqanku. Pedrotaj nerqa: “Qankuna Jesusta wañucherqankichej, Diostaj kausarichimorqa. Kunantaj Jesusqa cielopi Diospa paña ladonpi kashan. Qonawaykuta niwarqayku chay espíritu santota qowayku. Chayrayku kay milagrosta rikushankichej, uyarishankichejtaj”, nispa.

Pedroj nisqanqa runaspa sonqonman chayarqa. Chayraykutaj tapukorqanku: “¿Imatataj ruwasqaykuri?”, nispa. Pedrotaj nerqa: “Juchasniykichejmanta pesachikuspa Jesuspa sutinpi bautizakuychej. Ajinamanta qankunapis espíritu santonta regalota jina japʼinkichej”, nispa. Chay diataj 3.000 runas jina bautizakorqanku. Chaymantapachataj Jerusalenpi Jesuspa discipulosnin ashkhayarqanku. Apostolesqa espíritu santoj yanapayninwan astawan congregacionesta rikhuricherqanku. Paykunamantaj yachacherqanku Jesuspa yachachisqanta.