ASTAWAN YACHAKUNAPAJ 1B
Ezequiel libro kaymanta parlan
Ezequiel libroqa kay jinamanta tʼaqasqa kashan:
CAPÍTULOS 1–3
Ezequielqa 613 watapi J.n.j., preso apasqa judioswan khuska Babiloniapi tiyakusharqa. Chaypacha Jehovaqa Ezequielman Kebar mayu kantupi ashkha imasta mosqoypi jina rikucherqa, profetan kananpajtaj churarqa.
CAPÍTULOS 4–24
Ezequielqa profeta jina willarqa 613-609 wataspi J.n.j. Payqa Jerusalén llajtata, chaypi tiyakojkunatapis juchacharqa Diospa contranpi oqharikusqankurayku, santosta yupaychasqankurayku ima.
CAPÍTULOS 25–32
Jerusalén llajtataqa 609 watapi J.n.j., babilonios muyuykuyta qallarerqanku. Chaymantapachataj Ezequielqa manaña Jerusalenpa contranpichu willarqa, manachayqa Israelpa muyuyninpi kaj nacionespa contranpi, chaykunataj karqanku: Ammón, Edom, Egipto, Filistea, Moab, Sidón, Tiro ima.
CAPÍTULOS 33–48
606 watapaj J.n.j., Jerusalén llajtapis templopis thuñisqaña kasharqa. Chaymantapacha Ezequielqa Babiloniapi willarqa Jehová Diosllata yupaychay watejmanta sayarichisqa kananta.
Ezequiel libroqa tiempo pasasqanman jina imaschus kasqanta willan, sapa partetaj imamantachus parlasqanman jina tʼaqasqa kashan. Ñaupajtaqa parlan Jerusalenpis templopis thuñisqa kananmanta. Chaymantataj parlan Jehovallata yupaychay watejmanta sayarichisqa kananmanta. Ñaupajtaña templopi Diosta yupaychay tukukunanta nisqan, chaymantaraj Jehovallata yupaychay watejmanta sayarichisqa kananta nisqanqa maychus kajpuni.
Ezequielqa Jerusalenpa contranta willaytawanraj, Israelpa muyuyninpi kaj nacionespa contranta willarqa (capítulos 25–32). Chaymantataj Jehovallata yupaychay watejmanta sayarichisqa kananmanta willarqa. Uj yachayniyoj runa nerqa, Ezequiel chay nacionespa contranpi willasqanqa maychus kananpi kashasqanta. Chay willaykunaqa rikuchin Dios llajtanpaj phiñakuytawan, paykunamanta khuyakusqanta. Diosqa llajtanpa enemigosninkuta castigaspa, paykunamanta khuyakusqanta rikuchisharqa.