14 YACHAQANA

Sumajta sutʼinchariy

Hebreos 8:1

KAYPI YACHAKUNKI: Imamantachus parlashasqayki sutʼi kananpaj sumajta sutʼincharinayki kasqanta.

Imatachus yachachinaykipi tʼukuriy. Sumajta qhawariy discursoyki imapajchus ruwasqa kasqanta. Kaypitaj piensariy: “Kay discurso, ¿willarishallanchu? ¿Uyarejkunatachu kallpacharishan?” Chayta yachaytawan chayman jina wakichikuy. Chantá imatachus yachachinayki kashan chayta uyarejkuna entiendenankutachus manachus qhawariy.

Wakichikushaspaqa tapurikuy: “Kaymanta parlarejtiy, ¿imastataj uyarejkuna tapuwankuman? ¿Imastawan tapuwankuman?”, nispa. Chayta yachaytawan, chayman jina wakichikuy. Ajinamanta uyarejkunaqa imatachus yachachisqaykita entiendenqanku, chayman jinataj ruwanqanku.
Wakin palabrasta kutin kutita oqhariy. Discursashaspaqa imamantachus parlashanki chayta entiendenankupaj wakin palabrasta kutin kutita oqhariy.
Chʼuwitata sutʼinchay. Imastachus uyarejkuna entiendenankuta munanki chay imasllamanta sutʼinchay, maychus tiemponpitaj sutʼinchayta tukuy. Amataj tukuy imamantapunichu sutʼinchay. Sapa ujmanta sutʼinchaytawan samariy, amataj ujllapi waj imasmanta parlayta qallariychu.

Discursoykita qallarishaspaqa imasmantachus parlanaykita willariwaj. Ajinamanta uyarejkunaqa sumajta uyarisonqanku. Discursoykita tukushaspataj imamantachus parlasqaykita watejmanta sutʼinchariwaj. Ajinamanta uyarejkunaqa yachachisqaykita yuyarikonqanku.