Cristiano Kausayninchej tantakuypaj kamachiykuna

Kaykunamanta parlan

1. Kay documentopeqa Cristiano Kausayninchej tantakuypi tukuy participajkunapaj kashan. Pikunachus asignacionesniyoj kajkunaqa kay documentota qhawaykunanku tiyan, Cristiano Kausayninchej tantakuypaj programapi rikhurej instruccionestawan. Tukuynin publicadoresta kallpachariychej kay tantakuypi yachakojkunapaj asignacionesta ruwanankupaj. Tantakuykunaman mana faltakuspa jamojkunapis, asignacionniyoj kayta atillankumantaj. Chaypajqa Bibliaj nisqanpi creenanku tiyan, chayman jinataj kausakunanku tiyan. Pillapis kay tantakuypi niraj publicador kashaspa uj asignacionta ruwayta munan chayqa Cristiano Kausayninchej tantakuymanta encargado hermanowan parlarinan tiyan. Paytaj qhawaykurenqa requisitosta juntasqantañachus manarajchus. Kay hermanowan parlarishaspaqa pichus Bibliamanta yachachishan chaypis chaypi kanan tiyan (chayri testigo tatanpis chayri testigo mamanpis). Requisitosqa pichus publicador kayta munajpaj jinallataj (od-S cap. 8 párr. 8).

QALLARINAPAJ

2. Uj minutopi ruwakonqa. Tantakoyqa takiywan, mañakuywan ima qallarenqa. Cristiano Kausayninchej tantakuyta kamachej hermanoqa, imamantachus tantakuypi parlakunanta, imaschus hermanosta yanapananpaj jina kasqanmanta ima parlarenqa.

BIBLIAMANTA SUMAJ YACHACHIYKUNA

3. Discurso (10 minutospi ruwakonqa). Cristiano Kausayninchej folletopi rikhurin discursoj titulon, chantá iskay chayri kinsa yachachiykuna. Kay discursotaqa uj anciano chayri uj sumaj wakichisqa siervo ministerial ruwanqa. Bibliamanta uj mosoj librota chay semana leeyta qallarikonqa chayqa, chay libromanta uj videota rikuchenqa. Umallirichejqa chay videopi wakin imasta nikusqanmanta discursonpi parlarinman, jinapis folletopi kashan chay yachachiykunamanta parlarinanpuni tiyan. Tiempo kasqanman jina, folletopi rikhurej dibujoswan yanapachikunman, chaykunaqa sumaj yanapas kanku. Chantapis imamantachus sutʼinchakushan chayta astawan sutʼinchananpaj, waj yachaqanasta leesqanmantawan parlariyta atinman.

4. Sumaj yachachiykunata maskʼana (10 minutospi ruwakonqa). Kay parteqa tapuykunawan kutichiykunawan ruwakonqa. Kay parteta ruwaj hermanoqa ni qallarinanpajpis ni tukuchananpajpis parlananchu tiyan. Kay partetaqa uj anciano chayri uj sumaj wakichisqa siervo ministerial ruwanqa. Payqa iskaynin tapuykunata ruwanqa. Qhawarenqataj Bibliamanta versiculosta leechinantachus manachus. Hermanosqa 30 segundosllapi chayri aswan pisillapi tapuykunaman kutichinanku tiyan.

5. Bibliata leenapaj (4 minutospi ruwakonqa). Uj hermano leerenqa. Ni imata sutʼinchaspalla Bibliata leeyta qallarinan tiyan, leeyta tukuytawanpis nillataj imatapis ninanchu tiyan. Tantakuyta kamachej hermanoqa Bibliata leej hermanota kaykunapi yanapanan tiyan: leesqan chʼuwita, sutʼi, tukuy sonqotaj kananpaj, maychus kasqanta leenanpaj, jinallataj ama ancha apurayta, nitaj uj tonollapi leenanpajpis. Wakin semanasqa Bibliata leenapaj ashkha versículos, wakin semanastaj pisilla. Chayrayku Cristiano Kausayninchej tantakuymanta encargadoqa qhawarinan tiyan pimanchus chay parteta asignananta.

SUMAJTA YACHACHINACHEJ

6. Kayqa 15 minutospi ruwakonqa. Kay partetaqa Diosmanta aswan sumajta willanapaj, yachachinapaj, parlarinapaj ima wakichikun. Atikojtenqa ancianospis chay asignacionesta ruwankuman. Yachakojkunaqa Cristiano Kausayninchej tantakuypi parteyoj kajtinku Yachachillaypuni chayri Munakuywan yachachiy nisqa folletosta qhawaykunanku tiyan. Ima yachaqanatachus qhawaykunankupajqa parentesispi kashan. Wakin semanasqa uyarejkunawan ukhunchanapaj programakonqa. Chaytataj uj anciano chayri uj wakichisqa siervo ministerial ruwanqa (15 parrafota qhawariy imaynatachus uyarejkunawan ukhunchakonqa nisqa parteta ruwakunanpaj).

7. Parlayta qallariy. Kaytaqa uj hermana chayri uj hermano ruwanqa. Hermanaj yanapajnenqa warmillataj kanan tiyan, hermanoj yanapajnintaj qharillataj kanan tiyan. Manachayqa familianku ukhumanta kanan tiyan. Paykunaña qhawarenqanku, sayasqachus chayri chukusqachus ruwanankuta (Chayta astawan yachanankupaj 12, 13 parrafosta qhawarinkuman).

8. Revisitata ruway. Uj hermana chayri uj hermano ruwanqa. Hermanaj yanapajnenqa warmillataj kanan tiyan, hermanoj yanapajnintaj qharillataj kanan tiyan (km-S 5/97 pág. 2). Paykunaña qhawarenqanku, sayasqachus chayri chukusqachus ruwanankuta. Kayta ruwajqa, imaynatachus revisitata ruwana kasqanta rikuchinan tiyan (Chayta astawan yachanankupaj 12, 13 parrafosta qhawarinkuman).

9. Jesuspa discipulosninman tukuchiy. Uj hermana chayri uj hermano ruwanqa. Hermanaj yanapajnenqa warmillataj kanan tiyan, hermanoj yanapajnintaj qharillataj kanan tiyan (km-S 5/97 pág. 2). Paykunaña qhawarenqanku, sayasqachus chayri chukusqachus ruwanankuta. Kay asignacionqa uj runawan estudiashasqanchejmanta uj parte. Chayrayku kay asignacionta ruwajqa, ni qallarinanpajpis ni tukuchananpajpis parlananchu tiyan. Jinapis chaypi llankʼashan chayqa, atin chayta ruwayta. Chantapis mana tukuynin parrafostapunichu leenanku tiyan, jinapis tukuyninta leeyta atikullanmantaj.

10. Creenciasniykita sut’inchariy. Uj discurso kajtenqa uj hermano ruwanqa. Uj rikuchiy kajtintaj uj hermana chayri uj hermano ruwanqa. Hermanaj yanapajnenqa warmillataj kanan tiyan, hermanoj yanapajnintaj qharillataj kanan tiyan. Manachayqa familianku ukhumanta kanan tiyan. Yachakojqa kutichinan tiyan sut’ita k’achallamantataj ima tapuychus kashan chayman. Yanapachikunmantaj ima referenciachus rikhurin chaywan. Yachakojqa chay referenciaj titulonta munaspaqa ninman chayri mana.

11. Discurso. Kay asignaciontaqa uj hermano ruwanqa, uj discursota jinataj qonqa. Munakuywan yachachiy nisqa folletoj yanapan A nisqanman jina ruwanan kajtenqa, yachakojqa sut’inchanqa imaynatachus predicacionpi uj versículowan yanapachikunata. Por ejemplo, uj versículo ima niytachus munasqanta sut’inchanman, mayk’ajchus leenata chayri imaynatachus t’ukurichinata. Folletoj ujnin yachaqananpi llank’anan kajtenqa, imaynatachus willaypi chay versiculota sut’inchanamanta parlarenqa. Allin kajtenqa, chay yachaqanapi rikhurej ejemplomanta parlarinman chayri chaypi rikhurej versiculosmanta.

12. Imaynatachus ruwanata. Kay parrafomanta, qhepan parrafomanta ima kamachiykunaqa parlashan “Parlayta qallariy”, jinallataj “Revisitata ruway” nisqa partemanta. Kay parteta ruwajqa Bibliamanta uj textota sut’incharispa allinta parlarinan tiyan, chaytaj yanapanan tiyan qhepan kuti parlarinanpaj. Chantapis maypichus willan chaypaj jina uj temata ajllanan tiyan. Bibliata estudiachinapaj yanapasmanta mayqellantapis jaywananqa paymantaña. De memoria ruwanamantaqa, allin kanman parlakusqanchejman jina ruwakunan, tukuy sonqotaj.

13. Maypichus parlarinamanta. Parteyoj kajqa imaynatachus territorionpi willakun chayman jina ruwanan tiyan. Por ejemplo:

1) Wasimanta wasi. Chayqa kanman wasiyojwan parlarisqanchej wasinpipis, telefononejtapis, cartanejtapis. Jinallataj achay jinamanta ñaupaj kutipi parlarispa revisitata ruwasqanchejpis.
2) Mayllapipis kashaspa. Imata ruwashaspapis chayri mayman rishaspapis Bibliamanta uj textota runamasipaj leeripusqanchej kanman, trabajopi, escuelapi, wasinchej chaypi, micropi rishaspa chayri waj lugarpi kashaspa.
3) Ashkha runas purinku chaypi. Chayqa carritowan predicascanchej kanman chayri negociospi, parquespi, autos sayanku chaypi jinallataj waj lugarespi predicasqanchejpis kanman, maypichá ashkha runas tiyan chaypi.

14. Videos, publicaciones ima. Atikusqanman jina parteyoj kajqa wasiyojman niyta atinman uj videota rikuchinanta chayri uj publicaciontapis jaywarinman. Chay partepi videota rikuchinata nejtin chayri parteyoj kaj uj videota rikuychiyta munajtenqa, mana videota rikuchenqachu. Jinapis chay videota rikuchinmanpis jina parlanqa, sut’inchanqataj.

CRISTIANO KAUSAYNINCHEJ

15. Kay tantakoyqa uj takiywan qallarenqa. Ñaupaj 15 minutospeqa uj chayri iskay asignaciones kanqa, chaykunataj uyarejkunata yanapanqa Bibliaj yuyaychasqanman jina kausakunankupaj. Mana ima kamachiypis kajtenqa, chay asignacionesta ruwanqanku ancianos chayri sumaj wakichisqa siervos ministeriales. Jinapis “¿Imapí congregación llankʼanan tiyan?” nisqa rikhurejtenqa, uj ancianopuni chayta ruwanan tiyan. Sichus chay asignacionespi Cristiano Kausayninchej folletomanta uj yachaqanata ukhunchakonqa chayqa, chay asignacionta ruwashaspa ashkha tapuykunata ruwayta atin, nitaj ima tapuykunachus rikhurin chaykunallatachu. Chay parteta qallarispa pisillata parlarinan tiyan, ajinamanta tukuy parlarinakupaj tiempo kanqa. Chay partepi pillatapis entrevistanan kajtenqa, entrevistachikojqa plataformaman rinan tiyan.

16. Bibliamanta yachakunapaj (30 minutospi ruwakonqa). Sumajta yachachej anciano ruwanqa. Pisi ancianos kajtenqa, sumaj wakichisqa siervos ministeriales ruwankuman. Congregacionmanta tukuynin ancianos ajllananku tiyan, mayqen ancianoschus chayri mayqen siervos ministerialeschus chayta ruwanankuta. Chayta ruwajqa maychus tiemponpi tukunan tiyan. Chantapis sumajta yachachinan tiyan, uyarejkuna kausayninkupi ruwanankupaj jina. Mana chayllachu, yachachikushan chayta sumajta sutʼinchaj textosta ajllanan tiyan. Chantapis chayta ruwananpajqa qhawaykurinan tiyan tapuykunawan kutichiykunawan partespaj kamachiykunata (w23.04 pag. 24, recuadro). Tukuy imataña sumajta sutʼinchaspaqa, mana 30 minutostapunichu juntʼanan tiyan. Atikojtenqa sapa semana mana kikin hermanollapunichu yachachinan tiyan, nitaj kikin hermanollapunichu leenan tiyan. Wakin kutisqa ichá tantakuyta kamachej hermano, kay partepi yachachej hermanoman aswan pisi tiempollapi ruwananta nenqa. Jina kajtin, payña qhawarenqa imaynatachus pisiyachinanta. Ichapis wakin parrafosta mana leechinanchu kanqa.

TUKUCHANAPAJ

17. Kayqa 3 minutospi ruwakonqa. Tantakuyta kamachej hermanoqa, imastachus tantakuypi yachachikusqanta, chantá imatachus qhepan semanapi yachachikonqa chaytawan willarenqa. Tiempo kajtenqa pikunachus qhepan semanapaj asignacionniyoj kasqankuta willarinman. Mana ima kamachiypis kajtenqa, tantakuyta kamachej hermano tukuchanapaj parlarishaspa cartasta leena kajtin leenqa, wakin willaykunatapis willanqa. Waj willaykunataqa mana plataformamatapachachu willakonqa. Kay willaykunata jina: maymantachus willayman llojsinata chayri ima grupochus salonta llimphuchananta ima. Chay willaykunataqa tableroman churakonqa. Cartasta leenapaj, willaykunapaj ima pisi tiempolla kajtenqa, tantakuyta kamachej hermanoqa “Cristiano kausayninchej” nisqapi asignacionniyojkunata aswan pisi tiempollapi ruwanankuta nenqa (16, 19 parrafosta leeriy). Tantakoyqa uj takiywan mañakuywan ima tukukonqa.

YUYAYCHANAPAJ, KALLPACHANAPAJ IMA

18. Sapa asignación tukukojtinkama, Cristiano Kausayninchej tantakuyta kamachej hermanoqa chay parteta ruwajta uj minutopi jinalla kallpacharenqa, ima yachaqanapichus llank’ashan chayman jina. Asignacionniyoj kajta wajyarishaspaqa, mana nenqachu Yachachillaypuni folletomanta ima yachaqanapichus llankʼashasqanta. Chaytaqa willanman yachakoj tukusqantawan, sumajta ruwasqantataj niytawan. Chantá sutʼinchanqa imaraykuchus chay yachaqanaman jina allinta ruwasqanta, chayri kʼachamanta nenqa imaraykuchus chaypi llankʼanallantapuni. Tantakuyta kamachej hermanoqa yachakojta chayri tantakuypi kajkunata yanapananpaj chay asignacionmanta uj chhikanta parlariyta atinman. Yachakojtaqa kallpacharinapaj sapallanpi yuyaychariyta atikun tantakuy tukukojtin chayri waj kutipi. Chaytataj ruwakunan tiyan Munakuywan yachachiy, Yachachillaypuni folletos chayri Benefíciese libro nisqanman jina (Cristiano Kausayninchej tantakuyta kamachej, ujnin yuyaychaj anciano ima, imastachus ruwananku kasqanta yachanaykipaj 19, 24, 25 parrafosta qhawaykuriy).

TIEMPO

19. Tukuynin asignaciones tiemponpi tukukunan tiyan, tantakuyta kamachejpa parlasqanpis tiemponpi tukukunan tiyan. Cristiano Kausayninchej folletopi sapa parte mashkha minutospichus ruwakunanta nishan. Sumajtaña pisi tiempollapi sut’inchakojtenqa aswan ñaupajta tukuchakuyta atillanman. Yachakojkuna asignacionninkuta ruwashaspa tiemponkumanta pasakapushanku chayqa, tantakuyta kamachej hermanoqa calmallawan paykunata sayachenqa. Tantakuymanta waj asignacionesta ruwaj hermanos tiemponkumanta pasakapojtinkoqa, ujnin yuyaychaj anciano sapallankupi paykunawan parlarenqa (24, 25 parrafosta leeriy). Enteron tantakoyqa uj hora 45 minutospi tukukunan tiyan, takiykunasnintin, mañakuynintin ima.

CONGREGACIONESTA WATUREJ HERMANO JAMOJTIN

20. Congregacionesta waturej hermano visitarishasunkichej chayqa, tantakoyqa Cristiano Kausayninchej folletopi programaman jinallapuni ruwakonqa, “Bibliamanta yachakunapaj” nisqa partella mana ruwakonqachu. Chaypa cuentanmantaqa waturej hermano 30 minutospi uj discursota qonqa. Niraj discursota qoshajtin, tantakuyta kamachej hermanoqa imastachus tantakuypi yachakusqankumanta uj chhikanta parlarenqa. Chantá qhepan semana imastachus yachakunankumanta parlarenqa, leekunan tiyan chay cartasta leenqa, wakin willaykunatapis willanqa. Chaymantataj waturej hermanota wajyarenqa. Congregacionesta waturej hermanoqa, discursonta tukuytawan paypa ajllakusqan takiywan tantakuyta tukuchanqa. Payqa uj hermanota wajyarinman oracionwan tukuchananpaj. Chay semanaqa congregacionpa parlayninpi “Salas auxiliares” nisqa mana kanqachu. Waj parlaypi uj grupo kajtenqa Cristiano Kausayninchej tantakuy chay parlaypi ruwakullanqa. Jinapis waturej hermanoj discursontaqa, tukuy hermanos khuska uyarinanku tiyan.

JATUN TANTAKUY KAJTIN

21. Jatun tantakuy kajtenqa chay semana mana tantakuykuna kanqachu. Hermanosqa chay semanapi imachus estudiakunan kasqanta, sapallankupi chayri familiankuwan estudianqanku.

JESUSPA WAÑUYNINTA YUYARINAPAJ TANTAKUY KAJTIN

22. Jesuspa Wañuyninta Yuyarinapaj tantakuy chaupi semanapi ruwakonqa chayqa, Cristiano Kausayninchej tantakuy mana chay semana ruwakonqachu.

CRISTIANO KAUSAYNINCHEJ TANTAKUYMANTA ENCARGADO

23. Chay encargadotaqa tukuynin ancianos ajllanku. Payqa tantakuy allin ruwakunanta, kay kamachiykunaman jinataj ruwakunanta qhawanan tiyan. Ujnin yuyaychaj ancianowanpis sumajta yanapanakunanku tiyan. Chantapis Cristiano Kausayninchej folleto llojsisqantawan, chaupi semanapi tantakuypaj tukuynin asignacionesta wakichenqa iskay killapaj. Asignanqataj ancianos aprobarqanku chay hermanosta (3-16, 24 parrafosta leeriy). Asignashaspaqa qhawarinanku tiyan edadninkuta, experienciankuta, chay parteta qoyta atisqantachus manachus. Demostracionesta ruwajkunaman asignacionestaqa ancha kaspa kinsa semana ñaupajta jaywanqa. Chay asignacionestataj jaywanqa Asignación para la reunión Vida y Ministerio Cristianos (S-89) nisqa formulariopi. Cristiano Kausayninchej tantakuymanta encargadoqa tukuynin tantakuypaj programata tableroman churanan tiyan. Congregacionmanta tukuynin ancianos ajllankuman uj ancianota chayri uj siervo ministerialta Cristiano Kausayninchej tantakuymanta encargadota yanapananpaj. Ajinapis mana demostracioneschu kaj asignacionestaqa, Cristiano Kausayninchej tantakuymanta encargado chayri payta yanapaj uj ancianolla wakichinan tiyan.

CRISTIANO KAUSAYNINCHEJ TANTAKUYTA KAMACHEJ HERMANO

24. Sapa semana uj anciano kay tantakuyta kamachenqa. Pisi ancianos kajtenqa, sumaj wakichisqa siervos ministerialespis ruwankuman. Tantakuyta kamachej hermanoqa tantakuyta qallarichinanpaj, tukuchananpaj imatachus ninanta wakichikunan tiyan. Chantapis predicanapaj videosta rikuchispa uyarejkunata tapurenqa imatachus yachakusqankuta. Chay hermanollataj discursoyoj kajkunata plataformaman wajyarenqa. Congregacionpi pisi ancianoslla tiyan chaytaj waj partestawan ruwanman, astawanraj videosllata rikuchina kajtenqa. Sapa asignacionniyoj kajta wajyarishaspa parlarisqanqa pisilla kanan tiyan. Tukuynin ancianos ajllanqanku, mayqen ancianoschus tantakuyta kamachinankuta. Chay hermanostaj turnopi ruwanqanku. Wakin congregacionespi, Cristiano Kausayninchej tantakuymanta encargado hermanoqa, ichá aswan ashkha kutista tantakuyta kamachej kanqa. Sichus uj anciano “Bibliamanta yachakunapaj” nisqata ruwan chayqa, wakichisqallataj kashan tantakuyta kamachinanpajpis. Jinapis kayta ama qonqaychejchu: Tantakuyta kamachejqa, asignacionniyoj hermanata chayri hermanota kʼachamanta yuyaycharinan tiyan, allinta ruwasqantataj ninan tiyan. Chantapis tantakuy horanpi tukukunanta qhawanan tiyan (17, 19 parrafosta leeriy). Plataformapi campo kajtin, tantakuyta kamachejpis munajtenqa, plataformaj ujnin ladonman uj microfonota churakunman. Ajinamanta discursoyoj kajkunata wajyarinanpaj. Tiempota mana usuchinapajqa plataformaj ujnin ladonpi uj mesata, uj sillatawan churayta atikullanmantaj, tantakuyta kamachej chaypi tiyakunanpaj “Bibliata leenapaj” chantá “Sumajta yachachinachej” nisqa partesta ruwakushajtin.

UJNIN YUYAYCHAJ ANCIANO

25. Atikojtenqa ujnin yuyaychaj anciano kananpaj uj sumaj discursanteta ajllakunan allin kanman. Ujnin yuyaychaj ancianoqa ancianosta, siervos ministerialesta yuyaychanqa, pikunachus Cristiano Kausayninchej tantakuypi asignacionesta ruwanku, tukuypaj tantakuypi discursanku, Torremanta Qhawaj revistamanta yachachinku, Bibliamanta yachakunapaj nisqapi yachachinku, tantakuypi parrafosta leenku chaykunata (19 parrafota leeriy). Sichus ashkha ancianos sumajta discursanku, sumajtataj yachachinku chayqa, sapa wata ujnin yuyaychaj ancianota cambiakunman. Yuyaychaj ancianoqa mana sapa asignacionta ruwasqankutawanchu hermanosta yuyaychanan tiyan, manaqa yuyaycharina kajtillan.

SALAS AUXILIARES

26. Congregacionpi ashkha publicadores kajtenqa, salas auxiliarespi asignacionesta ruwakunman. Sapa salapi sumaj wakichisqa yuyaychaj kanan tiyan, chay yuyaychajtaj allin kanman uj anciano kanan. Jinapis necesitakojtinpuneqa uj sumaj wakichisqa siervo ministerial kallanmantaj. Tukuynin ancianos ajllananku tiyan, pikunachus salas auxiliares nisqapi yuyaychajkuna kanankuta, chantá ujllachus chayri turnopichus ruwanankutapis. Salas auxiliarespi yuyaychaj hermanosqa, 18 párrafo nisqanman jina ruwananku tiyan. Asignacionniyoj kajkunataqa “Sumaj yachachiykunata maskʼana” nisqa parte tukukusqantawan chay salaman rinankuta nikonqa. “Sumajta yachachinachej” nisqa parte tukukusqantawantaj tukuyninku kutiykamonqanku.

VIDEOS

27. Kay tantakuypi videosta qhawachikonqa. Chaytataj JW Library® nisqamanta uraqachikonqa.

S-38-QUB 11/23