Mana saqispa “Diosta astawan astawan” riqsinallapuni

TUKUY cristianosqa Jehovapaq allin qhawasqa kayta munanchik. Chayrayku iñiyninchik sumaq kallpachasqa kanan tiyan, sunqu kʼajaywantaq Diosninchikpa Reinonmanta willamunanchik tiyan. Apóstol Pablo mana pantayman urmanapaq, wakin judíos pantasqata yuyasqankumanta jinata nirqa: “Diosta tukuy sonqo qhatiyta munanku, manataj cheqa yachayman jinachu”, nispa (Rom. 10:2). Kay rikuchiwanchik Jehovapi iñiyninchikta churay, payta yupaychay ima, mana Diosmanta jukchhikanta yachaytawan yupaychayta munayllachu. Manaqa Ruwawaqninchik Diosmanta chiqa kaqta, munayninmanta ima, yachananchik tiyan.

Pablo wak cartanpi, imaynachus Diospa munayninmanjina kawsay kasqanta, chantapis Diosmanta chiqa kaq yachaymanta ima sutʼinchan. Pay cristianospaq Diosmanta mañakurqa, ‘Diospa munayninta riqsispa juntʼa kanankupaq’, ‘Señorpa munayninmanjina purinankupaq, tukuy imapi Diosta kusichispa. Ajinamanta kawsayninkupi allin ruwanasniyuq kanankupaq, Diostataq astawan, astawan riqsinankupaq’ (Col. 1:9, 10). Chaywanpis, ¿imaraykutaq ‘Diospa munayninta riqsiy may allin? Chantá ¿imaraykutaq ‘Diosta astawan astawan riqsinanchik’ tiyan?

Imataq yanapawanchik iñiyniyuq kanapaq

Bibliapi, Diosmanta, munayninmanta ima, chiqata yachasqanchikrayku, iñiyniyuq kanchik. Jinata mana yachakuptinchikqa Jehovaman iñiyninchikqa juk sachʼa mana saphiyuqjina kanman sinchi wayrataq urmachinman. Pabloqa ‘Diosta chiqa yuyaywan yupaychananchikpaq’, chantapis ‘yuyayninchikta musuqyachinanchikpaq ima’ kʼamiriwanchik (Rom. 12:1, 2, Qheshwa Biblia). Bibliata sapa pʼunchay ñawiriyqa, chaykunata ruwanapaq yanapawasun.

Polonia suyumanta juk precursora regular Ewa sutiyuq, jinata nin: “Bibliatachus mana sapa pʼunchay ñawiriyman chayqa, Jehovamanta chiqa yachakusqay, mana yapakunmanchu. Chantapis Diosmanta yachakusqanmanjina manaña kawsakuptiyqa, iñiyniy pisiyapunman. Yupaychayniytaq chinkanman”, nispa. ¡Mama jaykʼaq Diosta yupaychayninchikpi chay kananta saqinachu! Qhawarina juk runap ruwayninta payqa Jehovamanta chiqa kaqta yachayta astawan astawan yachakurqa, jinamanta Diospaq allin qhawasqa karqa.

“Maytapuni kamachisqasniykita munakuni”

Kay Salmo 119 qillqaqqa takiypijina, Diosninchikpa kamachisqasninta munakusqanmanta jinata nin: “Kamachisqasniykipi kusikusaj; [...] Noqaqa kamachisqasniykipi miskʼichikuni”, nispa. Chaymanta nillantaq: “Maytapuni kamachisqasniykita munakuni; tukuy pʼunchaynintin chayllapi unanchani”, nispa (Sal. 119:16, 24, 47, 48, 77, 97).

Salmista “kusikuni”, “tukuy pʼunchaynintin chayllapi unanchani”, nispaqa, rikuchiwanchik, Diospa Palabranpi tʼukurinata, chayta ruwaspataq kusikuna. Kay rimaykunaqa Salmos librota qillqaq, Diospa kamachisqasninmanta, yachakuyta mayta munakusqanta rikuchiwanchik. Chay munakuyqa mana juk ratullapaqchu kanan tiyan. Salmistaqa Diospa kamachiykunasninpi, ‘mayta unancharqa’ imatachus Jehová niyta munasqanta allinta yachananpaq. Chay ruwasqanqa Diosmanta, munayninmanta ima, mayta yachakuyta munasqanta rikuchiwanchik.

Salmistaqa Diospa Palabranta tukuy sunquwan munakurqa. Kayta tapurikuna: “¿Ñuqamanta salmistamantajinachu ninkunman? ¿Bibliamanta sapa pʼunchay ñawiriyta, yachakuyta ima, miskʼichikunichu? ¿Jinata ñawirinaypaq maytachu kallpakuni, chantá Jehovamanta allinta entiendenaypaq yanapayninta mañakunichu?”. Jinata ruwachkanchik chayqa: ‘Diosninchikta astawan, astawan riqsisun’.

Ewa nirqa: “Bibliata ñawirisqaymanta astawan allinta yachakuyta munani. Chaypaqtaq kay Veamos ‘la buena tierra’, folletowan, yanapachikuni. Chantapis wakin kutipi kay Perspicacia para comprender las Escrituras nisqawan, wak publicacioneswan ima, yanapachikullanitaq”, nispa.

Qhawarinallataq kay qhariwarmimanta: Wojciech, Małgorzata, paykunaqa familianpaq, achkha ruwanayuq kanku. ¿Imatá Bibliamanta sapankupi yachakunankupaq ruwanku, achkha ruwanayuq kaspapis? Paykunaqa, “Sapa juk, tiempochakunku Bibliata ñawirinankupaq. Chaymanta familiajina Diosmanta yachakuchkasqankupi, chantá imasmantachus parlarichkaptinku ima, sapa juk Bibliamanta yachakusqankumanta parlarinku” nispa. Jinata Bibliamanta yachakusqankuqa mayta kusichin chantapis ‘Diosta astawan, astawan riqsinankupaq’ yanapan.

Yachakuyta munaspa tukuy sunqu ñawirina

Cristianosqa yachanchik, Diosqa ‘tukuy runas salvasqa kanankuta, chiqa kaqtataq riqsinankuta’ munan (1 Tim. 2:3, 4). Chayrayku may sumaqpuni Bibliata ñawiriyqa, chantapis sumaqta yachakusqanchikta ‘entiendenapaq’ kallpakuypis (Mat. 15:10). Jinata ruwanapaqqa, yachakuyta munaspa Bibliata tukuy sunqu ñawirina tiyan. Bereaman cristianos jinata yachakurqanku, apóstol Pablo paykunaman Diosmanta willasqanta “tukuy sonqo japʼikorqanku. Sapa pʼunchay Diosmanta Qhelqasqata allinta qhawaspa, waturerqanku Pabloj yachachisqan cheqachus manachus kasqanta” (Hech. 17:11).

¿Ñuqanchikpis bereanosjinachu, ‘Diospa Palabranta tukuy sunqu japʼikuchkanchik’? ¿Bibliata ñawirichkaptinchik imallapis pantachinayawaptinchik qhisachanchikchu? Ñuqanchikqa bereanosjina kanapaq, kallpakunanchik tiyan, ichá ñawpaqta manapis yachakuyta munaqchu kanchik. Yachanchikjina wakin runasqa machuyasqankumanjina pisita ñawirinku, yachakunku ima, chaywanpis cristianosqa Bibliamanta yachakunallapuni tiyan. Waynuchus, chayri machu runas kaspapis, Bibliata ñawirichkaptinchik ni ima pantachinawanchikta saqinanchikchu tiyan. Bibliata ñawirisqaykimanjina, chayri yachakusqaykimanjina, ¿atiwaqchu wakin yachachiykunata astawan maskʼariyta wakkunaman parlarinaykipaq? ¿Atiwaqchu yachakusqaykita qusaykiman chayri warmiykiman wak hermanoman ima willariyta? Jinata ruwasqaykiqa yanapasunqa chay yachay sunquykipi, yuyayniykipi ima qhipakunanpaq, chantá parlarisqaykiqa wakkunata kawsayninkupi yanapallanqataq.

Bibliamanta yachakuchkaspaqa, Esdrasjina ruway, payqa: “sonqonta churarqa Tata Diospa kamachisqanta sumajta yachaqanampaj” (Esd. 7:10). ¿Imaynatá chayta ruwawaq? Ñawpaqtaqa mayniqpichus ñawirinaykita maskʼariy. Chaymantataq, Jehovamanta yachayta, yanapayninta ima, mañakuy (Sant. 1:5). Chaymanta tapurikuy: “¿Imatataq kaymanta yachakuyta munani?”, nispa. Ñawirichkaspataq imamantachus yachachichkasqanta yuyayniykipi japʼiy. Chantapis, ¿manachu yachakuchkasqaykita qillqariwaq? Ichapis chay yachachiyta yuyarinaykipaq markakunayki allin kanman. Chantá tʼukurillaytaq imaynatá yachakusqaykita willaypi, imatachus ruwanaykipi, hermanosta kallpachanaykipaq apaykachawaq. Yachakuyta tukuytawantaq, juktawan yuyarikunaykipaq qhawariy. Jinamanta yachakusqaykita mana qunqankichu.

Ewa nirqa: “Bibliata ñawirichkaspaqa, chawpinpi referencias marginales nisqata maskʼarini, chantapis kay Índice de las publicaciones Watch Tower y en el CD-ROM Watchtower Library, nisqapi ima, maskʼarillanitaq. Chantapis willaypi parlarinaypaq qillqallanitaq”, nispa.

Wakinqa unaytaña Bibliata sumaqta ukhuncharinku, chayraykutaq Diosmanta sumaqta yachanku (Pro. 2:1-5). Chaywanpis wakin hermanosqa, tukuy ima ruwanayuq kasqankurayku sapankupi Bibliata ñawirinankupaq mana tiempochakuyta atinkuchu. Qampis mana tiempochakuyta atiptiyki, ¿imatá ruwawaq tiempochakunaykipaq?

¿Imaynatá tiempochakusunman?

Yachanchikjina, imatapis ruwayta munaspaqa, maymantapis tiempota urqhukunchik. Maychhika hermanos, Bibliamanta tukuyninta ñawiriyta munaspa juk tiempopi tukunankupaqjina ñawirinku, chayta juntʼaspataq mayta kusikunku . Ichapis wakin kutiqa Bibliapi, ñawpa tataspa sutisninkumanta, Diospa templonmanta achkhata parlaptin, chayri profecías mana entiendeyta atinapaqjina kaptin, ñawiriyqa mana atikullanqachu. Chaywanpis wak imas yanapasunkiman ñawirinaykipaq. Bibliamanta mana japʼiqanapaqjina yachachiyta ukhunchachkaptiykiqa ichapis ñawpaqtaqa allin kanman qhawarinayki chay chiqa imamantachus maykʼaqchus qillqakusqanta jinallataq imaynatachus yanapasunkiman chaytapis. Chaytataq kay “Toda Escritura es inspirada de Dios y provechosa”, libropi tarinki, kay librotaq yaqha 50 qalluspi urqhusqa kachkan.

Chantapis may sumaqpuni, imasmantachus Bibliapi ñawirichkasqanchikta yuyayninchikpi rikuchkasunmanpisjina yuyayqa. Kay yuyaychakusqanmanjina ruwasun chayqa, yachakusqanchik mana qhasipaqchu kanqa, chantapis yachakusqanchikpi kusiyta tarisun, chantá kawsayninchikpi yanapawasun ima. Jinamanta astawan tiempochakusun Bibliata ñawirinanchikpaq chantapis sapa pʼunchay Bibliata ñawiriyta mana saqisunchu.

Kay yuyaychaykunaqa tukuyta yanapawanchik, chaywanpis, ¿imatá familias achkha ruwanasniyuq kaqkuna ruwankuman? Ñawpaqtaqa, ¿familiajina allin kanman parlarinaykichik familiajina Bibliamanta astawan yachakuy may allin kasqanmanta? Ichapis chay parlasqaykichikpiqa, astawan tutamanta sayarikuspa Bibliata ñawirinaykichikpaq niwaqchik, semanapi wakin pʼunchaykunallata atispapis. Chayri watiqmanta parlariwaqchik ima pʼunchaychus, ima horachus familiajina yachakunaykichiqpaq. Kayta qhawarina, wakin familiaspaqqa may sumaq sapa pʼunchaypaq Bibliap pʼitinta, chayri Bibliamanta maqin librollatapis mikhuytawan ñawirinku. Mesallapiraq kachkaspataq chay semanapaq Bibliamanta ima pʼitistachus ñawirina kasqanta chunka minutosta chayri chunka phichqayuq minutosta. Qallariypiqa ichá mana atikullanqachu chaywanpis familiaqa pisimanta pisi amañakullanqanku, ajinamanta ñawirisqankupi kusiyta tarinqanku.

Wojciech, Małgorzata paykunaqa, imachus familiankupi yanapasqanta willawanchik: “Ñawpaqtaqa tiempoykuta usuchiq kayku. Chayrayku internetniqta mensajesta apachisqaykuta, wak ruwaykunata ima, pisiyachiyku. Chantá parlayku ima pʼunchaychus ima horachus Bibliamanta yachakunaykupaq”, nispa. Chay familia Bibliata ukhunchanankupaq astawan tiempochakusqankumanta mana pesachikunkuchu, qam, familiayki ima, jinata tiempochakunkichik chayqa manallataq pesachikunkichikchu.

Diosta astawan riqsiyqa may allin

Diospa Palabranta sumaqta ukhuncharispaqa, “kawsayniykichejpi allin ruwanasniyojpuni”, kasunchik (Col. 1:10). Pisimanta pisitaq Diospa llaqtanpi ñawpaqman richkasqaykita tukuy rikunqanku. Chantapis, Bibliap chiqa yachachiyninta sumaqta riqsinki. Chantá imatachus ruwasqayki, yuyaychasqayki ima maychus kaqlla kanqa, manataq pantasqata yuyankichu. Chantapis astawan Jehovaman qayllaykunki, kʼacha kaykunasnintapis may sumaqpaq qhawanki, chaytaq wakkunaman paymanta parlarisqaykipi rikukunqa (1 Tim. 4:15; Sant. 4:8).

Machu runas, chayri waynas kaspapis, allin yachayniyuq kaspapis, Diospa Palabranta ñawiriypi miskʼichikunapaq kallpakuna, chantá yachakuyta munaspa tukuy sunqu Bibliata ukhuncharina. Jinata kallpakusqaykita Jehovaqa mana qunqakunqachu (Heb. 6:10). Arí payqa achkhata bendecisunqa.

[13 paginapi recuadro]

‘DIOSTA ASTAWAN RIQSIYMANTA’ TʼINKAS

Iñiyninchik kallpachasqa kanqa, chantá Jehovata jatunchanapaqjina kawsananchik tiyan. (Col. 1:9, 10)

Imatapis aswan jaqayman qhawasun, sumatataq entiendesun allin yuyaywantaq imatapis ruwasun. (Sal. 119:99)

Diosninchikpa Reinonmanta runa masinchikman willamuspa, kusiyta tarinchik. (Mat. 28:19, 20)

[14 paginapi dibujos/fotos]

Ichá Bibliamanta maypichus yachakunaykipaq mana tariyta atillankichu, chaywanpis mayta kallpakusqaykiqa may allin

[15 paginapi dibujo/foto]

Wakin familiasqa mikhuyta tukuytawan Bibliata ñawirinku