4 Ama iskaychasqa qhipakuychu
“Pisi creeyniyoj runa, imaraykutaj iskayrayankiri?” (Mateo 14:31.)
¿IMARAYKUTAQ MANA ATIKULLANCHU? Jesuspa wakin discipulosninpis, wakin kuti iskaychasqas kachkarqanku (Mateo 14:30; Lucas 24:36-39; Juan 20:24, 25). Bibliaqa, pisi creeyniyuq kayqa jucha kasqanta, chʼipaykuwasqanchiktataq niwanchik (Hebreos 12:1). Apóstol Pabloqa jinata nirqa: “Mana tukuychu creenku”, nispa (2 Tesalonicenses 3:2). Chaywanpis kay nisqanqa mana ninayanchu wakin runas Diospi mana creeyta atisqankuta, imaraykuchus wakinkunaqa, Diospi creenankupaq mana ni imata ruwankuchu. Chaywanpis Diospi creenanpaq kallpachakuqqa, Diospa yanapayninwan creeyninta astawan kallpachan.
MANA ISKAYCHASQA KANAPAQ, ¿IMATÁ RUWASUNMAN? Ñawpaqtaqa, imachus iskaychachisusqanta reparay. Sutʼinchanapaq, apóstol Tomasqa, wak discípulos Jesusta rikusqankuta niptinkupis, Jesús kawsarimusqanta mana creeyta atillarqachu. Pay kikin Jesusta rikuyta munarqa, chayraykutaq Jesusqa payman rikhurirqa. Jinamanta Tomaspa creeyninqa, astawan kallpachakurqa (Juan 20:24-29).
Jehová Diosqa, tapuykunasninchikman Biblianiqta kutichin. Sutʼinchanapaq wakin runasqa, Jallpʼantinpi jatun maqanakuykuna, wañuchinakuykuna, ñakʼariykuna ima kasqanmanta, Dios juchayuq kasqanta yuyasqankurayku, manaña Paypi creenkuchu. Chaywanpis, ¿imatá Biblia chaymanta niwanchik?
Mana Dioschu kay pachata kamachichkan. Jesusqa, ‘kay pachata kamachiq’ Kuraq Supay kasqanta nirqa (Juan 14:30). Juk kuti Kuraq Supayqa, Jesusta nirqa: ‘Sichus ñawpaqiypi qunquriykukuspa yupaychawanki chayqa, tukuy kay pachapi reinosta, tukuy atiyninta, tukuy kapuynintawan qusqayki, imaraykuchus ñuqaman qusqa karqa; chayrayku pimanchus munani, chayman quyta atini’, nispa. Jesustaq kutichirqa: “Diosmanta Qhelqasqapi nin: Señor Diosniykita yupaychanki, pay sapallantataj sirvinki”, nispa (Lucas 4:5-8). Rikunchikjina Jesusqa, kay pachata kamachiq Kuraq Supay kasqanta rikuchirqa. Chayrayku nisunman ñakʼariykuna kasqanmantaqa, Kuraq Supay juchayuq kasqanta, manataq Jehová Dioschu (Apocalipsis 12:9, 12).
Jehová tumpamantawan ñakʼariykunata chinkachinqa. Jehovaqa, Reinonpi kamachinanpaq Churin Jesucristota churarqa (Mateo 6:9, 10; 1 Corintios 15:20-28). Chantá Bibliap juknin profecian nisqanmanjina, kay allin willaykunaqa Jallpʼantinpi willakuchkan (Mateo 24:14). Tumpamantawan Diospa Reinonqa, enemigosninta, ñakʼariykunata ima chinkachinqa (Daniel 2:44; Apocalipsis 21:3, 4).
BIBLIATA UKHUNCHAY, ¿IMAYNATÁ YANAPAWANCHIK? Bibliaqa, iskaychasqa kaqqa “waj yachachiykunawan wayrawan jina kayman jaqayman apaykachachikuspa” mama quchapi yaku qhullchuqiyaqman rikchʼakusqanta nin (Efesios 4:14; 2 Pedro 2:1). Chaywanpis pikunachus tapuykunasninkuman, Bibliapi kutichiykunata maskʼaqkunaqa, ‘creeyninkupi sinchita sayanku’ (1 Corintios 16:13).
Jehovamanta sutʼinchaqkunaqa, kay revistata urqhunku, munankutaq Diospi creeyniykita kallpachanaykipaq tapuykunasniykiman Bibliawan kutichisuyta. Paykunawan parlarinaykipaq waqyarisuyku, jinamanta imatachus yachachisqankuta yachanaykipaq. Ajinata ruwaspaqa, Diospi creeyniykita astawan kallpachanki.
Astawan yachakunaykipaq ¿Imatapunitaq Biblia yachachin?, libromanta 8, 11 yachaqanasta, “¿Imataq Diospa Reinonri?”, “¿Imaptintaq Diosninchik runa ñakʼarinanta saqin?”, sutichasqasta ñawiriy.a
[Sutʼinchaynin]
a Kay librotaqa Jehovamanta sutʼinchaqkuna urqhunku.
[9 paginapi dibujo/foto]
Bibliapi tapuykunasninman kutichiykunasta maskʼaqqa, chhanka patapi wasijina creeyninpi sinchita sayanqa