Bibliap nisqanta entiendenaykipaq
1. Diosmanta yanapata mañakuy
Italia suyumanta juk warmi Ninfa sutiyuq nin: “Unayqa niraq puñukapuq richkaspa Bibliata ñawiriq kani. Biblia Diospa yuyaychasqan kasqanta yacharqani, chayraykutaq imatachus Dios Bibliapi qillqachisqantaqa yachayta munarqani. Mana ñawiriy gustawaqchu, chaywanpis Bibliap tukuynin librosninta ñawiriyta munarqani. Qallariypiqa sapa pʼunchay ñawiriq kani chaywanpis wakin pʼitikunata mana entiendeyta atisqayrayku, Bibliata manaña ñawiriqchu kani”.
ACHKHA runasqa, Ninfap chʼampayninpijina rikukunku. Chaywanpis ñawpaq yachaqanapi rikunchikjina, Jehová Diosqa, tukuy runas Palabranta entiendenankuta munan. Chaywanpis Bibliata entiendenapaq, ¿imatá ruwananchik tiyan? Qallarinapaq Jehová Diosmanta yanapata mañakunanchik tiyan.
Jesuspa apostolesninmanta parlarina. Paykunaqa, mana chay tiempopi kaq jatun yachaywasisman rirqankuchu, chayraykutaq wakin runasqa, “mana yachakuyniyoj runaslla kasqankuta” nirqanku (Hechos 4:13). Chaywanpis paykunaqa, Diospa Palabranta entiendeyta atirqanku. ¿Imaynamantá? Jesús paykunaman nirqa: “Sonqochaj Espíritu Santotaj, pitachus sutiypi Dios Tata kachamonqa, paymin tukuy imata yachachisonqachej”, nispa (Juan 14:26). Espíritu santoqa Diospa kallpan, chaywantaq janaqpachapi, kay Pachapi ima, tukuy imata ruwarqa (Génesis 1:2). Chantapis Diosqa, espíritu santonniqta 40 runasta yuyaycharqa Bibliata qillqanankupaq (2 Pedro 1:20, 21). Chay espíritu santonniqllatataq Jehovaqa, Paypa Palabranta entiendenanchikpaq yanapayta munawanchik.
Chaywanpis espíritu santonta qunawanchikpaqqa, qunawanchikmanta mana iskaychakuspa ichá achkha kutista mañakunanchik kanqa. Jesús nirqa: “Mañakuychej, qosonqachejtaj”. Chantá nillarqataq: “Qankunachus [...], allin kajta wawasniykichejman qoyta yachankichej chayqa, mashkhatarajchus janaj pachapi kaj Tataykichejqa Espíritu Santota qonqa mañakojkunaman”, nispa (Lucas 11:9, 13). Arí, Jehovaqa, espíritu santonta qun tukuy sunquwan mañakuqkunaman. ¿Imaynasmantá Diospa espiritun yanapawasunchik? Qallarinapaq, Bibliap nisqanta entiendenanchikpaq yanapawasunchik. Chantá Bibliap nisqanmanjina kawsananchikpaq yanapallawasunchiktaq (Hebreos 4:12; Santiago 1:5, 6).
Chayrayku Bibliap nisqanta entiendenaykipaq, Bibliata sapa ñawirispa, Diosmanta espíritu santota mañakuy.