Diospa yachachiynintaqa ni imapis atipanchu

“Cheqamanta tukuy imata qhasi manakajpaj qhawani Señorniy Jesucristota rejsinaqa may sumaj kasqanrayku.” (FILI. 3:8.)

1, 2. Achkha cristianos, ¿ima ruwayta akllanku, imaraykutaq?

ROBERTQA, juchʼuymantapacha yachaywasipi may sumaq alumno kasqanmanta riqsisqa karqa. Pusaq watitayuq kachkaptillanraq, wasinman juk yachachiqnin rispa, ima munasqantapis tariyta atisqanta, doctor kananta munasqanta ima, nisqa. Yachaywasipi yachakuyta tukuchachkaspañaqa may allin yachakuq karqa, chayraykutaq ichá suyunmanta aswan sumaq jatun yachaywasiman yaykuyta atinman karqa. Chaywanpis Robertqa, precursor regular kayta munaspa, tukuy chayta qhisacharqa.

² Yaqha tukuy cristianos Robertjina, may qhapaqman tukuyta atinankupaqjina karqanku, chaywanpis Diospaq llamkʼayta munasqankurayku kay pachapaq llamkʼayta qhisachanku (1 Cor. 7:29-31). ¿Imarayku jinata ruwanku? Jehová Diosta munakusqankurayku, Diosmanta yachachiyta may jatunpaq qhawasqankurayku ima. Maykʼaqllapis tapurikurqankichu chiqa yachachiyta mana riqsispa, ¿imatachus ruwachkanaykita? Jehová yachachiwasqanchikrayku, ima bendicionestachus japʼisqanchikpi tʼukurina. Ajinamanta allin willaykunata astawan munakusun, sunqu kʼajaywantaq willamusun.

Jehová yachachiwasqanchikqa ni imawan kikinchakunchu

3. Jehová juchasapa runasta yachachiyta munasqanta, ¿imaynamantá yachanchik?

³ Jehová Diosqa, may kʼacha kayninrayku juchasapa runasta yachachiwanchik. Akllasqa cristianosmanta, Isaías 54:13 pʼitipi profecía nin: “Tukuynin churisniykiman Tata Diosqa yachachipusonqa, wawasniykej allin kawsayninkutaj may jatun kanqa”, nispa. Kay pʼitiqa, Cristop ‘wak ovejasninmantawan’ parlachkan (Juan 10:16). ¿Imaynamantá chayta yachanchik? Kunan pʼunchaykunapi juk profecía juntʼakuchkasqanrayku. Isaiasqa, musquypijina tukuy suyusmanta achkha runas Diosta yupaychaq jamuchkasqankuta rikurqa. Chay profecía nisqanmanjina chay runasqa, ajinata ninakuchkarqanku: “Jakuchej, Tata Diospa orqonman wicharinachej, Jacobpa Diosnimpa wasinman; payqa ñankunanmanta yachachiwasunchej, chaki ñankunampi purinanchejpaj, nispa” (Isa. 2:1-3). Arí, paykunataqa, Jehová yachachinan karqa. ¡Chaymá sumaqqa!

4. Jehová yachachinawanchikpaq, ¿imayná kananchik tiyan?

⁴ Jehová yachachinawanchikpaq, ¿imayná kananchik tiyan? Llampʼu sunqu kananchik tiyan, yachachinawanchiktapis saqikunanchik tiyan. David jinata qillqarqa: “Kʼacha sonqo, cheqampunitaj Tata Diosqa [...] jinallataj ñankunantapis paykunaman rikuchin”, nispa (Sal. 25:8, 9). Chantá Jesús nillarqataq: “Tatáy, janaj pachajta kay pachajtawan Señornin, jatunchayki, imaraykuchus kay imasta pakaykorqanki yachayniyojkunamanta yuyayniyojkunamantawan, wawasmantaj willarqanki”, nispa (Luc. 10:21). Tata Dios llampʼu sunqusman “qhasilla kʼacha yanapayninta” qusqanta yachayqa, astawan payta munakunapaq tanqawanchik (1 Ped. 5:5.)

5. ¿Imaynamantá Diosta riqsirqanchik?

⁵ ¿Nisunmanchu atiyninchikraykulla chayri yuyayninchikraykulla chiqa kaqta riqsisqanchikta? Mana; atiynillanchikwan chayri yuyaynillanchikwanqa, ni jaykʼaq Diosta riqsiyta atisunmanchu karqa. Jesús nirqa: “Mana pipis noqaman jamunmanchu, manachus kachamuwaj Tatay pusamunman chayqa”, nispa (Juan 6:44). Arí, Jehová ‘tukuy nacionespa tiyapusqanta’ pusamun, nisunman ovejasjina llampʼu sunqu runasta. ¿Imaynatá chayta ruwan? Allin willaykunaniqta, espíritu santonniqta ima (Ageo 2:7, 8). Jehová ajinata Churinman pusamuwasqanchikmanta, ¿manachu may agradecesqa kanchik? (Jeremías 9:23, 24, ñawiriy.)

¿Imataq runap kawsayninta tikrachin?

6. Jehová “Diosta rejsi[qkuna]”, ¿imayna runastaq kanku?

⁶ Isaiaspa profecianqa, kunan tiempopi runaspa kawsayninku may sumaqman tikrakunanmanta, juk rikchʼanachinawan sutʼincharqa. Achkha runasqa, niraq cristianos kachkaspa chʼaqwata maskʼaqkuna karqanku, kunantaq tukuywan allinpi kawsakunku (Isaías 11:6-9, ñawiriy). Wakintaq, rikchʼayninkurayku, suyunkurayku, llaqtankurayku, ususninkurayku ima, chiqninakuq kanku, kunantaq tukuywan allinpi kawsakuyta yachakunku. Wak parlaykunapi, nisunman chiqamantapuni “espadasninkuta arado rejasman” tukuchisqankuta (Isa. 2:4). ¿Imarayku chay runas kawsayninkuta ajinata tikrachinku? Jehová “Diosta rejsi[sqankurayku]”, paymanta yachakusqankumanjina kawsakusqankurayku ima. Diospa kamachisninqa, juchasapa runasllataq kanku, chaywanpis ima suyumantapis kachunku, jukchasqa familiajina kawsakunku. Allin willaykunaqa, runaspa kawsayninkuta may sumaqman tukuchisqanrayku, Diospa yachachiynin astawan sumaq kasqanta rikuchin (Mat. 11:19).

7, 8. a) ¿Ima “jarkʼachasqa wasista[taq]” Diospa yachachiynin thuñiykun? b) ¿Imataq Jehovap yachachisqan payta jatunchanapaqjina kasqanta rikuchiwanchik?

⁷ Apóstol Pabloqa, cristianospa llamkʼayninkuta, juk maqanakuywan kikincharqa. Pay jinata qillqarqa: “Maqanakunayku armasqa mana kay pachaj armasnin jinallachu kanku; astawanqa Diospa atiyninwan sinchʼi kanku, jarkʼachasqa wasista thuñinaykupaj jinapuni. Noqayku thuñiyku runaspa pantasqa yuyayninkuta, Diospa yachaynimpa contrampi tukuy oqharikuytawan” (2 Cor. 10:4, 5). ¿Ima “jarkʼachasqa wasista[taq]” Diospa yachachiynin thuñiykun? Llulla religionmanta yachachiykunata, llulla cuentosta, runaspa qhasi mana kaq yachachiyninkuta, wak imasta ima (Col. 2:8). Jehovap yachachisqanqa, runasta juchamanta tʼaqan, chantapis kʼacha kaykunata kawsayninkupi wiñachinankupaq yanapan (1 Cor. 6:9-11). Familiastapis, jukchasqa kanankupaq yanapan, kawsayninchik mana qhasillapaq kasqantataq rikuchiwanchik. Kay tiempopiqa, chayjina yachachiykunata necesitanchik.

⁸ Achkha runasqa, Jehovap yanapayninrayku chiqan runasman tukuchkanku, juk warmip kawsaynin rikuchiwanchikjina (Heb. 13:18). India suyupiqa, juk warmi, Bibliamanta yachakuyta qallarisqa, manaraq bautizasqa kachkaspataq, willayman lluqsiyta qallarisqa. Juk pʼuchayqa, Tantakunapaq Wasipi llamkʼasqanmanta wasinman kutipuchkasqa, maypichus autos sayanku chaypitaq, pampapi quri wallqata tarikusqa. Chay warmiqa, wakcha kaspapis, chay wallqata policiaman juk ancianowan khuska apapusqa, dueñonman jaywapunankupaq. Policiapi llamkʼaq runaqa, chay wallqata kutichisqanmanta mayta tʼukurqa, imaraykuchus 800 dólares valesqa. Chantá, wak policiañataq imaraykuchus chay wallqata kutichipusqanta tapurisqa, paytaq jinata kutichisqa: “Bibliap yachachisqanqa kawsayniyta tikrachin. Kunanqa, chiqan kaqta ruwaq warmi kani”, nispa. Chay policiaqa, mayta tʼukuspa ancianoman jinata nisqa: “Kay suyupiqa kimsa chunka pusaqniyuq junu runas tiyanku. Chunka runasllatapis kay warmimanjina tukuchiwaq chayqa, may sumaq kanman”, nispa. Diospa yachachiyninqa, Jallpʼantinpi may chhika runaspa kawsayninta tikrachin. Chaytaq, Diosta astawan jatunchanapaqjinapuni, ¿icharí?

9. ¿Imaraykutaq runas kawsayninkuta tikrachiyta atinku?

⁹ Runap kawsaynintaqa, Bibliap yachachisqan, Jehová espíritu santonniqta yanapasqan ima, tikrachichkan (Rom. 12:2; Gál. 5:22, 23). Colosenses 3:9, 10 jinata nin: “Mosoj runamanta pʼachawan jina pʼachallikunaykichejpaj. Chay mosoj runaqa Ruwajnimpa rijchʼayninman jina mosojyachisqapuni kashan, Diosta sumajta rejsinaykichejpaj”, nispa. Diospa Palabranqa, imachus runap sunqunpi kasqanta sutʼiman urqhun, chantapis runaspa yuyayninkuta, munayninkuta ima tikrachin (Hebreos 4:12, ñawiriy). Chay runa Bibliamanta yachakuspa Diospa chiqa kamachisqanta juntʼayta qallariptintaq, Diospa amigon kayta atin, wiñay wiñaypaq kawsaytataq suyakuyta atin.

Jehovaqa, qhipaman kawsananchikpaq wakichiwanchik

10. a) ¿Imaraykutaq Jehovalla aswan qhipapaq sumaqta wakichiyta atiwanchik? b) ¿Imataq qayllapiña kachkan?

¹⁰ Jehovalla aswan qhipapaq sumaqta wakichiyta atiwanchik, imaraykuchus, imachus qhipaman kananta paylla yachan. Arí, Dios imaynachus aswan qhipaman runaspa kawsaynin kananta willarqa (Isa. 46:9, 10). Bibliaqa, ‘Tata Diospa jatun pʼunchaynin qayllamuchkasqantaña’ nin (Sof. 1:14). Chay pʼunchaytaq, Proverbios 11:4 pʼiti nisqan juntʼakunqa: “Juicio pʼunchaypeqa qhapaj kay mana yanapanqachu, cheqan kayrí wañuymanta libranqa”. Diosninchik kay saqra pachata juzgaptinqa, imaynachus paypa ñawpaqinpi kasqanchikta qhawanqa. Qullqiyuq kayqa, qhasillapaq kanqa, imaynatachus Ezequiel 7:19 pʼiti ninjina, runasqa, “qolqesninkutapis callesman wijchʼonqanku qʼopata jina”. Chayta yachayqa, allin kaqta kunanmantapacha akllanapaq yanapawanchik.

11. Imaynatachus Jehovap jatun pʼunchayninpaq Bibliap yachachisqan wakichichkawasqanchikta, sutʼinchay.

¹¹ Diospa yachachiyninqa, aswan allin kaqta akllanapaq yanapawasqanchikrayku, Jehovap jatun pʼunchayninpaq wakichiwanchik. Apóstol Pabloqa, Timoteoman jinata qillqarqa: “Kay pacha imaspi qhapajkunata kamachiy ama umata oqharinankuta, amataj kapuyninkupi atienekunankuta, imaraykuchus chayqa qhasi manakajlla. Manachayri kawsaj Diospi atienekuchunku”, nispa. Mana qhapaq kaptinchikpis, kay yuyaychayqa mayta yanapawasunman. ¿Imarayku? Imaraykuchus qhapaq kanapaq llamkʼananchikmantaqa, “allin kajta ruwanan[chikta]”, “allin ruwanaspitaj qhapaj kanan[chikta]” niwanchik. Diospaq ruwanasninchikta ñawpaqman churasunchik chaytaq, ‘jamuq pʼunchaykunapi ñuqanchik kikinchikpaq kapuykunata tantasun’ (1 Tim. 6:17-19). Chay ruwaykunaqa, allin yuyayniyuq kasqanchikta rikuchin, imaraykuchus Jesús nirqajina, “ima allintaj runapaj kanman, sichus kay pachaj tukuy kapuyninta ganakapunman, almantaj chinkapunman chayqa?” (Mat. 16:26, 27). Jehovap jatun pʼunchaynin may qayllapiña kasqanrayku, allin kanman sapa jukninchik jinata tapurikunanchik: “¿Maypitaq qhapaq kayta maskʼachkani? ¿Diospa kamachin kaytachu chayri qhapaq kaytachu maskʼachkani?”, nispa (Mat. 6:19, 20, 24).

12. Pillapis Diospaq ruwasqanchikta pisipaq qhawaptin, ¿imaraykutaq willamunallanchikpuni tiyan?

¹² Cristianosqa, Reinomanta runasman willamuspa, yachachimuspa ima, “allin ruwanaspi” kachkasqanchikta rikuchinchik (Mat. 24:14; 28:19, 20). Wakin runasqa, ñawpa cristianospa tiemponpijina, chay ruwasqanchikta pisipaq qhawanku (1 Corintios 1:18-21, ñawiriy). Chaywanpis, tiempo kachkaptillanraq, willamunallanchikpuni tiyan, runasman yachachimunallanchikpuni tiyan, imaraykuchus chay ruwaykunaqa, may allin (Rom. 10:13, 14). Chantapis, runasman chiqa kaqmanta yachachimusun chayqa, achkha bendicionesta japʼisunchik.

Diospaq llamkʼasqanchikqa mana qhasipaqchu

13. Apóstol Pablo, ¿imatá allin willaykunarayku saqirqa?

¹³ Apóstol Pablotaqa, waynamantapacha judiospa ruwaykunasninkupi may riqsisqa kananpaq, wakichirqanku. Tarso nisqa llaqtamanta, Jerusalenman Leymanta sumaq yachachiq Gamalielwan yachachichikuq richkaptinqa, nichá 13 watayuqpis karqaraqchu (Hech. 22:2, 3). Pabloqa, may sumaqtapuni Gamalielmanta yachakuchkarqa, yachakullanmanpuni karqa chaytaq, ichapis judíos ukhupi may riqsisqa runaman tukunman karqa (Gál. 1:13, 14). Chaywanpis, allin willaykunata yachakuspaqa, tukuy chaykunata qhipaman saqirqa. Ajinata ruwasqanmanta, ¿pesachikurqachu? Mana. Astawanpis, jinata pay qillqarqa: “Cheqamanta tukuy imata qhasi manakajpaj qhawani Señorniy Jesucristota rejsinaqa may sumaj kasqanrayku. Chayrayku chay tukuy ñawpa imasta saqepuni, qʼopata jina qhawaspa”, nispa (Fili. 3:8).

14, 15. ¿Ima bendicionestaq “Dioswan khuska trabaja[ptinchik]” kapuwanchik?

¹⁴ Kay tiempomanta cristianospis, allin willaykunarayku Pablojina achkha imasta saqillanchiktaq (Mar. 10:29, 30). Chaywanpis, ¿imasmantapis pisisqachu kanchik? Qallariypi Robertmanta parlarqanchikña, paypa nisqanta qhawarinallataq, jinamantataq imaynatachus may chhika hermanos yuyasqankuta yachasun, pay nin: “Diospaq juntʼasqata llamkʼasqaymanta manapuni pesachikunichu. Imaraykuchus chay ruwayqa, sunquyta juntʼan, maytataq kusichiwan. Chantapis, Jehová ‘may kʼacha kasqanta’ rikuchiwan. Diosqa, paypaq llamkʼanayrayku imatapis saqisqaymanta, astawan sumaqkunata quwan. Ñuqamantaqa, mana imatapis saqispa jinanichu, imaraykuchus bendicionesqa, astawan juntʼa chayamuwan”, nispa (Sal. 34:8; Pro. 10:22).

¹⁵ Tiempitutaña runasman willamuchkanki chayri yachachichkanki chayqa, chiqamantachá qampis Jehová may kʼacha kasqanta rikunki. ¿Maykʼaqllapis allin willaykunata willachkaspa espíritu santo yanapasusqanta repararqankichu? ¿Runas willachkasqaykita uyarispa kusikusqankuta rikunkichu? (Hech. 16:14.) Jehová, ¿astawan willamunaykipaq ima chʼampaytapis atipanaykipaq yanapasurqachu? ¿Maykʼaqllapis manaña astawan atisqaykita yuyachkaptiyki, kallpachasusqanta repararqankichu? (2 Cor. 4:7.) Jehová, paypaq llamkʼachkaptinchik yanapawasqanchikta rikuspaqa, astawan payman qayllaykunchik, munakunchik ima (Isa. 41:10). Diospa yachachiyninmanta willamuspa, “Dioswan khuska trabaja[chkasqanchikta]” yachaspa, ¿maytacharí kusikunchik? (1 Cor. 3:9.)

16. Diospa yachachiyninrayku imatapis saqisqaykita, ¿imaynatá qhawanki?

¹⁶ May chhika runasqa, ruwasqasninku mana jaykʼaq qunqasqa kananta munanku. Yachanchikjinataq imallatapis kay pachapi tarisqanchikqa, tiempowan qunqasqa qhipakun. Chaywanpis, Jehová kunan pʼunchaykunapi sutinta llimphuchananpaq ruwachkasqanqa, ni jaykʼaqpis qunqasqachu kanqa (Pro. 10:7; Heb. 6:10). Chayrayku, allin willaykunata runasman willamuyta atisqanchikta, may jatunpaq qhawana.

¿Imatá kutichiwaq?

• ¿Imastá ruwananchik tiyan Jehová yachachinawanchikpaq?

• ¿Imaynamantá Diosmanta yachachiykuna runap kawsayninta allinpaq tikrachisqanta yachanchik?

• Runas, Diospa yachachiyninta japʼikunankupaq yanapasqanchikmanta, ¿ima bendicionestataq rikunchik?

[23 paginapi dibujo/foto]

Dioswan yachachichikuqkunaqa, ima suyumantapis kachunku jukchasqa familiajina kawsakunku

[24 paginapi dibujo/foto]

‘Dioswan khuska trabajasqanchikqa’ juk jatun bendición