Jehová salvanawanchikpaq ruwasqanta, ¿jatunpaqchu qhawanchik?

“Yupaychasqa kachun Israelpa Señor Diosnenqa, imaraykuchus ayllunta watukun juchasninkumanta paykunata salvanampaj.” (LUC. 1:68.)

1, 2. a) ¿Imataq imaynachus kachkasqanchikta rikuchiwanchik? b) Kay yachaqanapi, ¿ima tapuykunamantaq kutichisunchik?

HOSPITALPI kachkasqaykita tʼukuriy. Maypichus internasqa kachkanki chaypiqa, achkha unqusqas tiyan, tukuyniykichiktaq juk unquyniyuqlla kachkankichik, manataq chay unquypaq ima jampipis kanchu, astawanpis wañuyllataña suyachkankichik. Chaywanpis, juk doctor jampita mayta maskʼaykuchkasqanta uyarinki. Qamqa, ¡may kusiywan suyachkanki jampita tarinanta! Chay doctorqa, mayta maskʼaspa juk jampita tarin. ¿Imata ruwawaq chay willayta uyarispa? Chiqamantachá chay doctorman may agradecesqa kawaq, qamta wak unqusqasta ima, wañuymanta salvasqanmanta.

² Ichá chayqa, mana creenapaqjina kanman, chaywanpis allinta tʼukuriptinchikqa, ajinapi kachkanchik, usqhayllata pillapis salvanawanchikta chayri kacharichinawanchikta necesitachkanchik (Romanos 7:24, ñawiriy). Chay salvawaqninchikqa Jehová, payqa, Churinwan, tukuy imata ruwarqanku wañuymanta kacharichinawanchikpaq. Kay yachaqanapiqa tawa tapuykunaman kutichisunchik: ¿Imaraykutaq wañuymanta kacharichisqa kayta necesitanchik? Kacharichinawanchikpaq, ¿imatá Jesús ruwarqa? ¿Imatá Jehová ruwarqa? ¿Imaynamantá chay kacharichiwasqanchikmanta agradecesqa kasqanchikta rikuchisunman?

¿Imaraykutaq salvasqa chayri kacharichisqa kayta necesitanchik?

3. ¿Imaraykutaq juchata achkha runasta wañuchiq unquywan kikinchasunman?

³ Kay 1918 wata chaniqpiqa, gripe española nisqa unquy rikhurirqa, may chhika runastataq wañuchirqa, kunallan chaymanta parlaqkuna nisqankumanjinataq, chay unquyjinaqa mana juktawan rikukunchu. Wakin unquykunaqa, wakin runasllaman chimpan, chaywanpis, yaqha tukuyninkuta wañuchin, chayrayku chay unquykuna astawan runasta wañuchisqanta nisunman.a Kunanqa, juchata chayjina unquykunawan kikinchasunchik. Romanos 5:12 nisqanta yuyarina: “Uj runanejta jucha kay pachaman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku”. Juchaqa tukuyman chayasqanta nisunman, imaraykuchus tukuyninchik juchasapa kanchik (Romanos 3:23, ñawiriy). ¿Machkha runastaq jucharayku wañunku? Pablo nisqanmanjinaqa ‘tukuy runas’.

4. Jehová, machkha unaytachus kawsasqanchikmanta, ¿imatá yuyan, imatataq runas yuyanku?

⁴ Kunan pʼunchaykunapiqa, pisi runaslla jucha, wañuy ima, may saqra kasqanta ninkuman. Runa mana wañunanpi wañuptinqa, achkha runas mana entiendeyta atinkuchu, chaywanpis machuyaypi wañuptinkuqa, kawsay jinapuni kasqanta ninku. Runasqa, imatachus Ruwawaqninchik chaymanta yuyasqanta usqhayllata qunqanku. Paypa yuyasqanmanjinaqa, kawsayninchikqa mana ajina pisillachu kanan karqa. Astawanpis juk runaqa, Jehovapaqqa ni juk pʼunchayllatapis kawsanchu (2 Ped. 3:8). Chayrayku, Diospa palabranqa, kawsayninchik may pisilla kasqanrayku, juk tʼikajinalla chayri juk samayjinalla kasqanta nin (Sal. 39:5; 1 Ped. 1:24). ¿Imaraykutaq chayta mana qunqananchikchu tiyan? Imaraykuchus, chay “unquyninchik” imayna sinchichus kasqanta yachaspaqa, “jampita” aswan jatunpaq qhawasun, nisunman Jehová chay unquymanta kacharichinawanchikpaq ruwasqanta.

5. Jucharayku, ¿imatá chinkachinchik?

⁵ Imayna llakiypipunichus kasqanchikta entiendenapaqqa, imatachus jucha qhichuwasqanchikta qhawarina. Ichá chayta mana yachayta atillasunchu, imaraykuchus ni jaykʼaq imatachus chinkachisqanchikta rikurqanchikchu. ¿Imamantá parlachkanchik? Qallariypiqa, Adanwan Evawanqa ni ima juchayuq kasqankurayku cuerponkupi, yuyayninkupi ima, juntʼa karqanku. Chayraykutaq, imatachus yuyasqankuta, imachus sunqunkupi kasqanta, ruwayninkuta ima, sumaqta apaykachayta atirqanku, ajinamanta Diospa kamachisninjina sapa pʼunchay aswan sumaq runas kayta atinkuman karqa. Chaywanpis paykunaqa, chay regalota pisipaq qhawarqanku. Diosta mana kasukuspaqa, mana chay wiñay kawsayllatachu chinkachirqanku, manaqa tukuy wawasninpa kawsayninkutapis (Gén. 3:16-19). Chantapis, chay sinchi unquyta, nisunman juchata japʼikurqanku, tukuy wawasninkumantaq chimpachirqanku. Ajinata ruwasqankumanta Jehovaqa, chiqan kasqanrayku wañunankuta nirqa, chaywanpis ñuqanchikmanqa, chay unquymanta salvasqa kayta atisqanchikta niwanchik (Sal. 103:10).

¿lmatá Jesús juchamanta kacharichinawanchikpaq ruwarqa?

6, 7. a) ¿Maykʼaqtaq Jehová ñawpaq kutirayku imatachus salvanawanchikpaq qunanmanta parlarqa? b) Abel, Diosta manchachikuq wak runas ima, Diosman jaywanasta qusqankumanta, ¿imatataq yachakunchik?

⁶ Jehovaqa, Adanpa wawasninta juchamanta may chhikawan rantinanta yacharqa. Génesis 3:15 pʼitipi tarikuq profeciataq, chaymanta sutʼinchawanchik. Chay profecía nisqanmanjina Jehovaqa, juk “mirayniqta” kacharichinawanchik karqa, chay miraytaq Satanasta wiñaypaq chinkachinan karqa. Chaywanpis, niraq chayta ruwachkaptinqa, Satanaspa mirayninqa chaki talonninmanta khaninanraq karqa, chaytaq may nanay paypaq kanman karqa. ¿Imataq chay khaniy? Jehovap Akllasqan, ¿ima ñakʼariykunatataq rikunan karqa?

⁷ Salvawaqninchikqa, runasta salvananpaq kawsayninta qunan karqa. Ajinallamanta runaspa juchasninku pampachasqa kanman karqa, chantapis jucharayku ñakʼariy chinkanan karqa, runastaq Dioswan allinyakapunanku karqa. ¿Imaynamantá chayta ruwanan karqa? Abel, pichus ñawpaq chiqa sunqu runa karqa, Diosman uywasta qʼulachirqa, ajinamanta Diospa ñawpaqinpi allinpaq qhawasqa karqa. Chantapis, Noé, Abraham, Jacob, Job, Diosta manchachikuq wak runas ima, uywasta Diospaq qʼulachillarqankutaq, chaytaq mayta kusichirqa (Gén. 4:4; 8:20, 21; 22:13; 31:54; Job 1:5). Aswan qhipamantaq Israelitasman qusqa Leyqa, imapaqchus chay jaywanas kasqanta sutʼincharqa.

8. Kuraq sacerdote, Perdonta Tarinapaq Pʼunchaypi, ¿imatá ruwaq?

⁸ Ley nisqanmanjinaqa, Perdonta Tarinapaq Pʼunchaypi, Diospaq uywata qʼulachinanku karqa. Chay raymipiqa, kuraq sacerdote kaykunata ruwaq. Qallariypiqa, juchasrayku Jehovaman jaywanata jaywaq, ñawpaqtaqa Diospaq wasinpi sacerdotesrayku, chaymantataq tukuy israelitasrayku. Chaymantaqa, templomanta chayri Diosta yupaychanapaq toldomanta, Aswan Santo kaq Chiqaman yaykuq. Chay chiqamanqa, kuraq sacerdotella, chay pʼunchayllataq yaykuyta atiq. Chaypiqa, uywa wañusqap yawarninta, Diospa trato ruwasqan arcap ñawpaqinpi jichʼaq. Wakin kutiqa, chay arcap patanpi, lliphipiq phuyu rikhuriq, chaytaq Jehová chaypi kachkasqanta rikuchiq (Éxo. 25:22; Lev. 16:1-30).

9. a) Perdonta Tarinapaq Pʼunchaypi, ¿piwantaq kuraq sacerdote ninakun, imawantaq Diosman jaywanas ninakun? b) Kuraq sacerdote Aswan Santo kaq chiqaman yaykusqan, ¿imawantaq ninakun?

⁹ Apóstol Pabloqa, Diospa yuyaychasqanmanjina, imatachus sacerdotep ruwasqan ninayasqanta sutʼincharqa. Payqa, kuraq sacerdote, Mesías Jesucristowan ninakusqanta nirqa, qʼulachinapaq uywa wañusqasta jaywaytaq, Jesuspa wañuyninwan ninakusqanta sutʼincharqa (Heb. 9:11-14). Jesucristo wañusqanraykutaq 144.000 akllasqa cristianospa juchasninku perdonasqa kayta atinman karqa, jinallataq ‘wak ovejaspa’, juchasninkupis (Juan 10:16). Kuraq sacerdote Aswan Santo kaq chiqaman yaykusqantaq, Jesucristo janaqpachaman yaykusqanwan kikinchakun, maypichus Diospa ñawpaqinman yawarninwan yaykurqa (Heb. 9:24, 25).

10. Profecías nisqanmanjina, ¿imataq Mesiaswan kanan karqa?

¹⁰ Rikunchikjina Jehovaqa, Adanpa wawasninta may chhikawan juchamanta rantinan karqa, nisunman Mesías kawsayninta runasrayku qunan karqa. Hebreopi Qillqasqasmanta profetasqa, chayjina kanan kasqanta sutʼincharqanku. Profeta Danielqa, “juchamanta perdonta tarinapaj” “Kamachej Mesias[ta]” “wañuchenqanku” nispa nirqa (Dan. 9:24-26). Isaiastaq, Mesías runaspa juchasninrayku, qhisachasqa, qhatiykachasqa, wañuchisqa ima, kananta nirqa (Isa. 53:4, 5, 7).

11. ¿Imaynamantá Diospa Churin kawsayninta runasrayku quyta munasqanta rikuchirqa?

¹¹ Diospa Churinqa, Tatan willasqanrayku, niraq Jallpʼaman jamuchkaptinña, mayta ñakʼarinanta, wañuchisqa kananta ima, yacharqa. Chayta yachaspa, ¿Tatanpa contranta uqharikurqachu chayri manchachikurqachu? Mana. Astawanpis, imatachus Dios nisqanta kusiywan juntʼarqa (Isa. 50:4-6). Chayrayku Jallpʼapi kachkaspapis, Tatanta tukuy imapi kasukurqa. ¿Imarayku? Pay kikin nirqa: “Dios Tatata munakusqay[rayku]”, nispa. Chantá, nillarqataq: “Mana pipis aswan sinchʼi munakuyniyoj kanchu, kawsaqesninrayku wañojmanta nisqaqa”, nispa (Juan 14:31; 15:13). Arí, Diospa churin munakuwasqanchikrayku salvasqa kanchik. Payqa, juchasapa runasrayku, kawsayninta tukuy sunqu qurqa.

¿Imatá Jehová juchamanta kacharichinawanchikpaq ruwarqa?

12. ¿Piq munayninraykutaq salvasqa kanchik, imatataq chay ruwasqanwan rikuchirqa?

¹² Jehová Diospa munaynin juntʼakunanpaqqa, Churin kawsayninta jaywanan karqa. Ajina kanantaqa, Pay nirqa, mana Jesuschu. Pablo nisqanmanjinaqa, templop altarnin, Diospa munayninwan ninakun (Heb. 10:10). Chayrayku, Jehovaman salvasqa kasqanchikmanta astawan agradecenanchik tiyan, imaraykuchus chayqa, Jehovap munayninraykulla ruwakurqa (Luc. 1:68). Chantapis, chay ruwasqanwanqa, runasta mayta munakusqanta rikuchirqa (Juan 3:16, ñawiriy).

13, 14. ¿Imaynatá Abrahampa ruwasqan, Jehová ñuqanchikrayku ruwasqanta jatunpaq qhawananchikpaq yanapawanchik?

¹³ ¿May chhikawantaq Jehová jatun munakuyninrayku juchamanta rantiwarqanchik? Chayta allinta entiendenapaqqa, Bibliapi juk runap kawsayninmanta qhawarina. Jehovaqa, kamachin Abrahamman, churin Isaacta payman jaywananta nirqa. Chay kamachiyta kaskuyqa, nichá atikullarqachu, imaptinchus Abrahamqa, churinta mayta munakurqa. Jehovataq, chayta yachasqanrayku nirqa: “Munasqa kʼata churiyki Isaacta pusarikuspa, riy”, nispa (Gén. 22:2). Chaywanpis Abrahamqa, Diospa munaynin aswan patapi kasqanta yacharqa, chayrayku churinta mayta munakuspapis, Payta kasukurqa. Jehovaqa, mana Abraham churinta wañuchinanta saqirqachu, aswan qhipaman pay kikin ajinata ruwanan kaptinpis. Astawanpis, mana wañuchinanpaq, juk angelta kacharqa. Abrahamqa, Diosta kasukuyta munarqa, chayrayku churin wañunanta yachaspapis, Diospi sinchita iñisqanrayku, kawsarichimunanpi atienekurqa. Chantapis Pabloqa, Abraham “wañusqas ukhumanta churinta watejmanta kawsashajta japʼikapusqanta” nirqa (Heb. 11:19).

¹⁴ Abraham churinta Jehovaman jaywananpaq wakichikuchkaptin, imaynatachus sunqun nanachkasqanpi tʼukurina. Kikin nanayllatataqchá Jehová, ‘munasqa Churinta’ wañuchichkaptinku muchurqa (Mat. 3:17). Chaywanpis Abrahampa nanayninmanta nisqaqa, Jehovap nanaynin aswan jatun karqa. Payqa, munasqa Churinwan, may chhika unayta janaqpachapi kawsarqanku. “Yanapaq maestroqa”, Tatanwan kusisqa llamkʼarqa, chantapis Dios, imatapis payniqta willasqanrayku, ‘Palabra’ sutichakullantaq (Pro. 8:30, NM; 8:22, 31; Juan 1:1, NM). Arí, maytachá Jehovap sunqun nanarqa, Churinta asipayachkasqankuta, ñakʼarichichkasqankuta, suwatajina wañuchichkasqankuta ima, rikuptin. ¿Yachankichu kunan may chhikawanchus Jehová juchamanta rantiwasqanchikta? Chayrayku, ¿imaynamantá Payman agradecekusunman?

Kacharichisqa kasqanchikta jatunpaq qhawasqanchikta rikuchina

15. a) ¿Imaynamantá Jesús juchamanta kacharichiwasqanchikta juntʼayta tukurqa? b) ¿Ima bendicionestaq chaymantapacha tiyan?

¹⁵ Jesusqa, juchamanta kacharichiwasqanchikta, wañuymanta kawsarimuytawan janaqpachaman kutipuptin juntʼayta tukurqa. Munasqa Tatanpaman ripuspaqa, yawarninta paypa ñawpaqinman churarqa. Ajinata ruwasqanrayku, ¿ima bendicionestaq tiyan? Akllasqa cristianos, “kay pachapi kaj chhika runas” ima, juchamanta kacharichisqa kanku. Arí, juchasninkumanta sunqumantapacha pesachikuspa Jesuspa discipulosninman tukuqkunaqa, Dioswan allinyakuyta atinku (1 Juan 2:2). ¿Imatataq sapa juk ruwananchik tiyan?

16. ¿Ima kikinchaytaq imayna agradecesqachus Jehovaman kananchik kasqanta rikuchiwanchik?

¹⁶ Qallariypi parlasqanchikmanta yuyarikuna. Unquyniykipaq jampita tariq doctor, maypichus internasqa kachkanki chayman yaykumusqanta yuyay. Payqa, unquyniykichikpaq juk tratamientota ruwanaykichikta nin, chayta maychus kasqanmanjina juntʼaspataq chiqamantapuni sanoyakunkichik. Chaywanpis, yaqha tukuy unqusqas chay tratamientota qhisachanku, paykunap rikchʼayninkuman mana atinapaqjina kasqanrayku. ¿Qamrí? Chay tratamientota juntʼaspa sanoyapunaykita yachaspapis, ¿qhisachallawaqtaqchu? ¡Mana!, ¿icharí? Astawanpis, chiqamantachá doctorman may agradecesqa kaspa, mana pantaspa juntʼanki. Ichá, wak unqusqastapis, chay tratamientota ruwanankuta ninki. Ñuqanchikpis, Jehová Churinniqta salvawasqanchikmanta may agradecesqa kasqanchikta, sunqumantapacha rikuchiyta munanchik (Romanos 6:17, 18, ñawiriy).

17. ¿Imaynamantá Jehová kacharichinawanchikpaq ruwasqanmanta agradecesqa kasqanchikta rikuchisunman?

¹⁷ Jehová, Churin ima, juchamanta kacharichinawanchikpaq ruwasqankuta, jatunpaq qhawanchik chayqa, kawsayninchikpi rikuchisun (1 Juan 5:3). Chantapis, mana juchallikunapaq kallpachakusun, nitaq puraq uyasjina, Diospa chiqnisqan ruwaykunata pakayllapi ruwasunchu. Chayta ruwasunman chayqa, manachá Jehová juchamanta kacharichinawanchikpaq ruwasqanta, jatunpaq qhawachkasunmanchu. Astawanpis, Diospa ñawpaqinpi llimphus kanapaq kallpachakuspa, agradecesqa kasqanchikta rikuchisun (2 Ped. 3:14). Chantapis, runasman chay sumaq suyakuyninchikmanta willasun, paykunapis, Jehová Dioswan allinpi kayta maskʼanankupaq, wiñay kawsayta tariyta atinankupaq ima (1 Tim. 4:16). Jehovata, Jesusta ima, jatunchanapaq, tukuy tiemponchikta churayqa, may allinpuni, ¿icharí? (Mar. 12:28-30.) Tukuyninchik, juchamanta wiñaypaq kacharichisqa kayta munanchik, imaynatachus Diosninchik qallariypi mana ima juchayuq wiñaypaq kawsananchikta munarqa, ajinata. ¡Tukuy chay bendicionestaq, Jehová Dios juchamanta kacharichinawanchikpaq ruwasqanrayku juntʼakunqa! (Rom. 8:21.)

[Sutʼinchaynin]

¿Imatá kutichiwaq?

• ¿Imaraykutaq juchamanta kacharichisqa kayta necesitanchik?

• ¿Imaynatá Jesuspa ruwasqan kawsayniykipi yanapasunan tiyan?

• Jehová juchamanta kacharichinawanchikpaq ruwasqanpi tʼukurispa, ¿imayná sientekunki?

• ¿Imaynamantá Jehovaman agradecesqa kasqaykita rikuchinki?

[27 paginapi dibujo/foto]

Perdonta Tarinapaq Pʼunchaypi kuraq sacerdoteqa, Mesiaswan ninakun

[28 paginapi dibujo/foto]

Abraham churinta Diosman jaywayta munasqanqa, Jehová ñuqanchikrayku imatachus ruwasqanta rikuchiwanchik