Religionniyta, ¿tatasniychu akllananku tiyan?

POLONIA suyumanta achkha runasqa, Jehovamanta sutʼinchaqkunaman ajinata ninku: “Paqarikusqaymantapacha kay religionpi kani, chaypitaq wañunaykama kasaq”, nispa. Ajinata nispaqa, religión tatasmanta wawasman pasasqanta ninku. Ichá qampis, jinata parlaqta uyarillankitaq. Runa ajinata yuyaptin, religionqa, juk costumbrejinallaña, mayqintachus familiamanta kaqkuna mana qunqanankuchu tiyan. Tatasninkumanta chayri jatun tatasninkumanta, chiqa yachachiykunata yachakuq Jehovamanta sutʼinchaqkuna, ¿chay runasjina yuyallankumantaqchu?

Timoteoqa, mana ajinatachu yuyarqa. Maman, abuelan ima, yachachisqankurayku, Diospi creerqa, munakurqa ima. Payqa, “wawamantapacha” Diosmanta chiqa yachachiykunata riqsirqa. Tiempowantaq, mamanwan abuelanwan khuska, Cristo qallarichisqan religión, chiqapuni kasqanta sutʼita repararqa. Ajinamanta payqa, Jesucristomanta qillqasqas chiqapuni kasqanpi ‘creerqa’ (2 Tim. 1:5; 3:14, 15). ¿Imatá paymanta yachakunchik? Cristiano tatas, wawasninkuta tukuy imaymanamanta Diosta yupaychanankupaq yanapaptinkupis, wawasninku Jehovata yupaychayta munasqankuta sunqunkupi wiñachinanku kasqanta (Mar. 8:34).

Chantapis, imaraykuchus kay religión chiqa kasqanta sutʼita yachananchik tiyan. Ajinamanta Jehovata munakuywan yupaychasunchik, iñiyninchikpis aswan kallpachasqa kanqa, chantá ima chʼampaypipis chiqa sunqullapuni kasunchik (Efe. 3:17; Col. 2:6, 7).

¿Imatá wawas ruwananku tiyan?

Albert,a Jehovamanta sutʼinchaqkuna familiapi uywasqa karqa, pay nin: “Jehovamanta sutʼinchaqkuna chiqa kaqta yachachisqankuta creerqanipuni, chaywanpis imaynatachus kawsanayta ninawankuta mana munaqchu kani”, nispa. Qam wayna chayri sipas, ¿chay waynajinallataqchu yuyachkanki? Allin kanman, imaynatachus Dios kawsakunaykita munasqanta yachanayki. Ajinata ruwaspaqa, Diospa munayninta ruwayta atillanki (Sal. 40:8). Albert nin: “Juk pʼunchayqa, mañakuyta qallarirqani, qallariypiqa mayta kallpachakunay karqa. Chaywanpis pisi tiempomanqa, imatapis allinta ruwanaypaq kallpachakusqayta, Dios allinpaq qhawasqanta reparakurqani. Chaytaq kawsayniyta tikranaypaq yanapawarqa”, nispa. Arí, qampis Jehovaman astawan qayllaykunaykipaq kallpachakunki chayqa, Diospa munayninta astawan ruwayta munanki (Sal. 25:14; Sant. 4:8).

Mana riqsisqayki pukllaypi tʼukuriy. ¿Chay pukllaypi kusiyta tariwaqchu? Mana, ¿icharí? Chaywanpis, chay pukllayta sapa kuti pukllaspaqa, astawanchá pukllayta munawaq. Kikillantaq Jehovata yupaychaywanqa. Qamrí, ¿imaynatá Diosta yupaychaspa kusiyta tariwaq? Tantakuykunaman rinaykipaq sumaqta wakichikuspa, chaypitaq parlarispa. Ajinamanta wayna chayri sipas kaspapis, qam kikin ruwanankupaq wakkunata kallpachawaq (Heb. 10:24, 25).

Willaymantapis kikillantataq nisunman, imaraykuchus kay llamkʼaytaqa, Diosta munakusqanchikrayku ruwananchik tiyan, manataq tanqasqajinallachu. Chayrayku tapurikuy: “¿Imaraykutaq Jehovamanta runasman parlayta munani? ¿Imaraykutaq Diosta munakuni?”, nispa. Jehovataqa juk kʼacha Tatatajina qhaway. Payqa, Jeremiasniqta nirqa: “Maskʼawankichej, tariwankichejtaj, tukuy sonqowan maskʼawasqaykichejrayku”, nispa (Jer. 29:13, 14). ¿Imaynamantá? Jakubqa jinata nin: “Yuyayniyta tikrachinay karqa. Ñuqaqa, wawamantapacha tantakuykunaman, willayman ima riq kani, chaywanpis mana tukuy sunquchu ruwaq kani. Chayrayku, Jehovata tukuy sunqu yupaychanaypaq, payman qayllaykunay karqa”.

Allin amigosqa, Diosmanta willaypi kusiyta tarinaykipaq yanapasunqa. Bibliamanta juk proverbio nin: “Yachayniyojkunawan purejqa yachayniyojllataj kanqa”, nispa (Pro. 13:20). Jehovata astawan yupaychayta munaqkunata, amigosniyki kanankupaq maskʼay. Juk cristiana Jola sutiyuq nin: “Diosta sumaqta yupaychaq waynaswan masichakuspaqa, astawan willamunaypaq, kusiyta tarinaypaq ima, mayta kallpachakurqani”, nispa.

¿Imatá tatas ruwananku tiyan?

Jolaqa nin: “Tatasniyman mayta agradecekuni, Jehovata yupaychayta yachachiwasqankurayku”, nispa. Arí, tatasqa, wawasninku allinta akllanankupaq, yanapayta atinkuman. Apóstol Pabloqa qillqarqa: “Tatas mamas, [...] wawasniykichejta [...] allinta yachachispa, kasuchikuychej, Señorpa kʼamiyninpitaj uywaychej” (Efe. 6:4, Qheshwa Biblia). Kay yuyaychayqa, tatas wawasninkuta, Dios kamachisqanmanjina manataq munayninkumanjinachu uywananku kasqanta sutʼita rikuchin. Chantapis tatasqa, wawasninku Jehovata sumaqta yupaychanankupaq, payta kusichinankupaq ima, yanapananku tiyan.

Tatasqa, ñawpa tiempopi judío tatasman kamachikusqanta, juntʼanallankutaq tiyan. Jehová paykunaman nirqa: “Kay kamachisqasmanta willaychejpuni wasiykichejpi, jinallataj ñampi purishaspapis, chantá puñunapaj siriykushaspapis, jatarishaspapis” (Deu. 6:6, 7). Ewa Ryszardwanqa, kimsa wawasniyuq kanku, paykuna ninku: “Wasiykupiqa, imaynasmantachus Diospaq astawan llamkʼayta atisqaykumanta, sapa kuti parlaq kayku”, nispa. Ajinata ruwasqankurayku, ¿ima bendicionestataq rikunku? Paykuna kutichinku: “Wawasniykuqa, juchʼuyllaraq kachkaspa, Diosmanta Parlayta Yachanapaq tantakuypi umallirichiyta munarqanku, chantá Diosmanta willayta qallarirqanku, tiemponmantaq bautizakurqanku. Aswan qhipamanqa, Diospaq astawan llamkʼayta qallarirqanku”, nispa.

Wawasqa, tatasninkumanta mayta yachakunkuman. Ryszardqa nillantaq: “Warmiywan, qutuchakuypi, wasiykupi ima, allinta kawsakunaykuta ninakurqayku”, nispa. Chayrayku, allin kanman tatas ajinata tapurikunanku: “¿Imatá wawasniyku ñuqaykupi rikunku? Diosmanta mañakusqaykupi, Bibliata ukhunchasqaykupi, imaynatachus willayta qhawasqaykupi, sunqu kusichiyta akllasqaykupi, qullqimanta yuyasqaykupi, hermanosmanta parlasqaykupi ima, ¿Jehovata munakusqaykuta rikunkuchu?” (Luc. 6:40). Chantapis wawasqa, imatachus tatas parlasqankumanjina mana ruwachkasqankuta, sumaqta reparanku.

Wawas sumaq uywasqa kanankupaqqa, pantaptinku allin yuyaywan chiqan ñanman kutirichinapuni. Diospa Palabranqa, jinata yuyaychan: “Wawamanqa imaynatachus kawsananta allinta yachachiy” (Pro. 22:6). Ajinata Ewa, Ryszard ima ruwarqanku, paykuna ajinata ninku: “Bibliata sapa juk wawaykuwan ukhunchanaykupaq tiempochakuq kayku”, nispa. Chaywanpis sapa qhariwarmi, imaynatachus wawasninkuta Bibliamanta yachachinankuta akllananku tiyan, jina kaptinpis, sapa wawankuta yachachinankupuni tiyan. Tatasqa, wawasninkuwan kʼachas kananku tiyan. Juk takiyta uyariy, mana allinchu kasqanta ninankumantaqa, aswan allin Bibliap nisqanmanjina akllayta yachachinanku.

Ichá juk tataqa, wawan imatachus ruwananta yachasqanta yuyanman, yuyasqanmanjinataq, allinta ruwachkasqanta rikunman. Chaywanpis, wawanpa sunqunman chayayta maskʼanan tiyan. Kay yuyaychaytataq yuyarikunan tiyan: “Runaj sonqompi pakasqa yuyaykunaqa ukhu qocha jina; pichus yuyayniyojqa chaytaqa orqhonqa” (Pro. 20:5). Tatasqa, wawasninku mana allin imasta ruwachkasqankuta sumaqta reparananku tiyan, ajinamanta usqhayllata yanapanankupaq. Chantapis, mana juchachaspalla, paykunap allinninkuta maskʼasqankuta rikuchispataq, allillanmanta tapurinanku tiyan. Manataq juk juezjinachu tapunanku tiyan. Ajinata ruwaptinkuqa, wawasninkup sunqunman chayanqanku, allintataq yanapayta atinqanku.

¿Imatá qutuchakuy ruwanman?

¿Qutuchakuymanta hermanosrí? Waynas chayri sipaskuna, Diosmanta yachakusqankuta allinta qhawanankupaq, ¿yanapayta atinkumanchu? Yachanchikjina wawastaqa, tatasninku yachachinanku tiyan, chaywanpis qutuchakuymanta hermanos, astawanpis ancianos, yanapayta atillankumantaq. Astawanraq, chay waynapta chayri sipaspata, tatallan chayri mamallan Jehovamanta sutʼinchaq kaptinqa.

Waynas, sipaskuna, Jehovata munakunankupaq, chantá allinpaq qhawasqa sientekunankupaq, ¿imatataq ancianos ruwankuman? Juk anciano Polonia suyumanta Mariusz sutiyuq, nin: “Ancianos, willaypi, tantakuypi chayri mayllapipis kachkaspa waynaswan parlarinaykuqa, may allin. Chaytataq mana chʼampaykuna kaptillanchu ruwana”, nispa. Chantapis ancianosqa, waynasta imatachus qutuchakuymanta yuyasqankuta tapurinkuman. Ajinamanta, qutuchakuyman astawan kʼaskasqa kayta munanqanku.

Qam anciano, ¿qutuchakuyniykimanta waynasta, sipaskunata ima, riqsinaykipaq kallpachakuchkankichu? Albertqa, —pimantachus ñawpaqpi parlarqanchik— ancianoña, chaywanpis waynuchu kachkaspaqa, chʼampaykunapi rikukurqa. Pay nin: “Juk kutiqa, yuyaychanawankupaq, kallpachanawankupaq ima, ancianos waturiwarqanku”, nispa. Chantapis, waynaspaq, sipaskunapaq ima, Diosmanta mana karunchakunankupaq mañapuspa, allinninkuta maskʼallanchiktaq (2 Tim. 1:3).

Qutuchakuypi imallatapis waynaswan chayri sipaskunawan khuska ruwayqa, may allin. Ajinamanta, kay saqra pachap ruwaykunasninman mana ripunankupaq. Juk waynata chayri juk sipasta, qamwan willayman rinanpaq, amigoyki kananpaq ima, waqyariy. Paykunawan khuska imallatapis ruwanaykipaq, chay ruwaypi kusiyta tarinankupaq ima, kallpachakuy. Jolaqa, juk precursora payta yanapasqanmanta yuyarikuspa nin: “Chay hermanawan willayman lluqsiptillay, ñawpaq kutirayku tukuy sunqu willaq rirqani”, nispa.

Qam akllanayki tiyan

Wayna chayri sipas, ¿imatataq ruwayta munanki? Niraq bautizakuptiyki, ¿bautizakuyta munawaqchu? Yuyariy, Jehovata munakusqaykirayku bautizakunayki tiyan, mana tatasniyki Jehovamanta sutʼinchaqkuna kasqankuraykuchu.

Jehovaqa, amigoyki kayta atinman, chiqa yachachiykunatataq may valorniyuqpaq qhawawaq. Jehovaqa, profeta Isaiasniqta nirqa: “Ama sonqoyki qʼenaqakuchunchu, imaraykuchus noqaqa Diosniyki kani”, nispa. Arí, Jehovaqa, paywan kachkaptiyki mana qunqapusunqachu. Chantapis, “justiciata ruwaj paña maki[n]wan sayachilla[sunqa]puni”, kallpachasunqataq (Isa. 41:10).

[Sutʼinchaynin]

[4 paginapi dibujo/foto]

Wawaykip sunqunpi imachus kasqanta yachanaykipaq kallpachakuy

[6 paginapi dibujo/foto]

Jehovata chiqamanta munakusqaykirayku bautizakunayki tiyan