Llulla yachachiykuna rikhurisqan

ÑAWPA siglop tukukuyninpi apóstol Pabloqa, cristianosman jinata yuyaycharqa: “Allinta qhawakuychej: Pajtataj pipis pantachisunkichejman llulla yachachiykunawan, qhasi manakaj parlaykunawan ima. Yachachiyninkoqa mana Cristomantachu jamun, manachayqa ñawpa runaspa yachachiynillankumanta”, nispa (Colosenses 2:8).

Chaywanpis, iskay kaq siglopiqa, qutuchakuymanta wakin cristianos, imapichus creesqankumanta yachayniyuq runaspa yuyasqankumanjinalla sutʼinchayta qallarirqanku. ¿Imaraykutaq? Romamanta qhapaq runas cristianosman tukunankuta munasqankurayku.

Justino Mártir chay cristianosmanta juknin karqa, paytaq Diospa kʼata Churin Jesús manaraq Jallpʼaman jamuchkaptin Greciamanta yachayniyuq runasman rikhurisqantaña yuyaq. Chayrayku pay, wak yachayniyuq runas ima, filosofía, mitología ima nisqa, Jallpʼantinpi tukuy runas cristianosman tukunankupaq yanapananta yachachiq kanku.

Achkha runas Justino Martirpa yachachisqanta sumaqta japʼikurqanku, cristianosmantaq tukurqanku. Chaywanpis yachayniyuq runasqa, Justino Martirpa yachachiykunasninta chiqapis kanmanjina rikuchinankupaq, wak yachachiykunatañataq rikhurichirqanku. Jinamanta llulla yachachiykuna rikhuriyta qallarirqa. Qhipan yachaqanaspi ima yachachiykunatachus rikhurichisqankuta ukhuncharinaykita, chantá chay yachachiykunata Bibliap yachachisqanwan kikinchanaykita munayku.