Jesusqa kasukurqapuni

¿KASUKUYTA atillankichu?a... Mana kasukuyta atillankichu chayqa, ama llakikuychu, imaraykuchus mana qamllachu ajinapi rikukunki. Diospa Churin Jesuspis, Jallpʼapi kachkaspa kasukuyta yachakurqa, ¿chayta yacharqankichu?...

¿Pikunatataq kasukunayki tiyan?... Arí, tataykitawan, mamaykitawan kasukunayki tiyan. Biblia nin: “Wawas, Señorpi kaspa, tataykichejta mamaykichejta kasuychej”, nispa (Efesios 6:1). Jesusqa tatasninta kasukurqapuni, ¿pikunataq tatasnin karqanku?... Jesuspa Tatanqa Jehová Dios, Payqa ñuqanchikpatapis Tatallanchiktaq (Mateo 6:9, 10). Chaywanpis, Jesuspa tatasnin José, María ima kasqankuta yuyarqanki chayqa, mana pantachkankichu. ¿Yachankichu imaraykuchus paykuna tatasnin kasqankuta?...

Juk ángel, Gabriel sutiyuq, Mariaman wiksallisqa rikhurinanta nirqa. Chaywanpis, ¿imaynamantá qhariwarmijina ni piwan puñuykuspa wiksallisqa rikhurinman karqarí? Jehovaqa juk milagrota ruwarqa. Ángel Gabriel, Mariaman nirqa: “Diospa atiynintaj llanthusonqa chay mana juchayoj nacej wawaqa sutichasqa kanqa Diospa Churin”, nispa (Lucas 1:30-35).

Jehovaqa, janaqpachapi kaq Churin Jesuspa kawsayninta, Mariap wiksanman churarqa. Chantá Jesusqa, Mariap wiksanpi tukuy wawitasjina wiñayta qallarirqa. Chantá Joseqa, Mariawan casarakurqa. Jisqʼun killasninmantaq Jesús nacekurqa. Manapis José Jesuspa tatanpunichu karqa, chay tiempopi yaqha tukuy runas, José Jesuspa tatan kasqanta yuyarqanku. Chayrayku nisunman Jesús iskay tatasniyuqjina kasqanta.

Chunka iskay watasniyuqllaraq kachkaspa Jesusqa, Jehová Tatanta mayta munakusqanta rikuchirqa. ¿Imaynamantá? Jesuspa tatasnin sapa wata Pascua fiestapaq Jerusalenman riq kanku. Chantá Jerusalenmanta Nazaretman kutipuchkaspa Josewan Mariawanqa repararqanku Jesús mana paykunawanchu kachkasqanta. Imaraykuchus tatasnin mana ñawpaqta chayta reparasqankuta, ¿yachayta munawaqchu?...

Chay kutipaqqa, Josewan Mariawanqa, achkha wawasniyuqña karqanku (Mateo 13:55, 56). Chantapis ichá wak familiaresninkuwan khuska viajachkarqanku, nisunman Zebedeowan Salomewan paykunap wawasninku Santiagowan, Juanwan ima. Ichapis Salomeqa Mariap ñanan karqa. Chayrayku ichapis Josewan Mariawanqa, Jesús paykunawan richkasqanta yuyarqanku (Mateo 27:56; Marcos 15:40; Juan 19:25).

Jesusta mana tarispataq, Josewan Mariawan may phutisqas Jerusalenkama maskʼaspa kutirirqanku. Kimsa pʼunchaymantaq templopi Jesusta tarirqanku. Chantá María tapurirqa: “Wawáy, imaraykutaj kay jinata ruwawaykuri? Noqawan, tataykiwanqa may phutisqa maskʼasuyku”. Jesustaq kutichirqa: “Imaraykutaj maskʼashawarqankichej? Manachu yachankichej Tataypa ruwanasnimpi [wasinpi, NM] kashanayta?”, nispa (Lucas 2:45-50).

¿Ajinata kutichispa Jesús pantaykurqachu?... Ichapis Josewan Mariawanqa, Diospa wasinpi kay, Jesusman mayta gustasqanta yacharqanku (Salmo 122:1). Chayrayku ichapis Jesusqa, tatasnin templollapi tarinankuta yuyanman karqa, ¿icharí?... Jesuspa nisqanqa, mamanta tʼukuchkaqta saqirqa.

Chaymanta qhipaman, ¿Jesús tatasninta kasukullarqapunichu?... Biblia nin: “Jesús kutiporqa tatasninwan Nazaretman, chaypitaj paykunata kasuspa kakorqa”, nispa (Lucas 2:51, 52). ¿Imatataq Jesusmanta yachakunki?... Arí, tatasniykita kasukunaykitapuni.

Rikunchikjina Jesusqa, tatasninta kasukurqapuni, chaywanpis wakin kutiqa tatasninta, jinallataq Jehová Tatantapis mana kasukuyta atillarqachu.

Sutʼincharinapaq, Jehovaqa Churinta Jallpʼaman kachamurqa kawsayninta runasrayku qunanpaq. Wañunan pʼunchay ñawpaq chʼisintaq Jesusqa, Tatanmanta mañakurqa ñakʼarinan kasqanta karunchananta (Lucas 22:41, 42). Chaywanpis Jesusqa Tatanta kasukurqa. Biblia niwanchik: “[Jesusqa] ñakʼarisqanrayku kasukoj kayta yacharqa”, nispa (Hebreos 5:8). ¿Jesusjina kasukusunmanchu wakin kuti mana atikuptillanpis?...