¿Pitaq Diosmanta yachachinan tiyan?
“Yachakojqa mana yachachejninta atipanchu; chaywampis sumajta yachaqakuspaqa, yachachejnin jina kanqa.” (LUCAS 6:40)
WAKIN tatasqa wawasninkuman Diosmanta yachachinankupaq mana wakichisqaschu kasqankuta yuyanku, ichapis mana yachaywasiman risqankurayku chayri pisita religionmanta yachasqankurayku. Chayrayku parientesninkuman chayri religionmanta yachaq runasman saqipunku.
¿Pitaq wawasman religionmanta chiqa kaqta, sumaqta kawsakunankupaq yuyaychaykunata ima yachachinanpaq wakichisqa kachkan? Biblia imatachus chaymanta nisqanta qhawarina, yachayniyuq runaspa nisqankuwantaq kikinchana.
¿Imatataq tata ruwanan tiyan?
Bibliap yachachisqan: “Tatas, mamas, ama wawasniykichejta phiñachiychejchu, manachayqa paykunata uywaychej wanachinapaj jasutʼispa, Señormanta yachachispa ima” (Efesios 6:4).
Yachayniyuq runaspa nisqanku: Tata religionniyuq kasqan, ¿imaynatá yanapan? Kay 2009 watapi Universidad Ball State nisqa, (Fathers’ Religious Involvement and Early Childhood Behavior [Tataspa religionninku, wawaspa kawsayninkuwan]), nisqa publicacionpi qillqarqa: “Religionniyuq kayqa juk runata sumaq tata kananpaq yanapanman. Chantapis kawsayninta allinta apaykachananpaq sumaq yuyaychaykunata, yachachiykunata ima qun.”
Bibliaqa tata wawasninta uywananpaq, yachachinanpaq ima churasqa kasqanta nin (Proverbios 4:1; Colosenses 3:21; Hebreos 12:9). Kay yuyaychay, ¿kay tiempopaqwanchu? Kay 2009 watapi Universidad de Florida nisqa juk publicacionpi imaynatachus tata wawasninta yanapayta atisqanta, urqhurqa. Yachayniyuq runas, juk tata wawasninmanta interesakuptin, paykunapaq tiempochakuptin ima, paykuna kikin munakusqankuta, wakkunamanta interesakusqankuta ima rikuchisqankuta repararqanku. Waynas sumaqta kawsakunku, sipaskunataq allin yuyayniyuq kanku. Chayrayku Bibliap yuyaychasqasninqa mayta yanapachkallanpuni.
¿Imatataq mama ruwanan tiyan?
Bibliap yachachisqan: “Amataq pisipaj qhawaychu mamaykej yachachisusqanta[...]” (Proverbios 1:8).
Yachayniyuq runaspa nisqanku: Kay 2006 watapi (Handbook of Child Psychology), nisqa publicación wawasta imaynamantachus uywanamanta nirqa: “Mamasqa wawasninkuwan aswan tiempota kanku tatasninkumanta nisqaqa, chaytaq achkha suyuspi rikukun”, nispa. Mama wawasninwan achkha tiempota kasqan, parlasqan, ruwasqan ima sumaqta wawa wiñananpaq yanapan.
Tatas chiqa kaqta Diosmanta yachachiptinku, iskay sumaq regalostapis quchkankuman jina: Ñawpaq kaqqa Dioswan allinta masichakuyta yachakunku chaytaq tukuy kawsayninkupi yanapanqa. Iskay kaqtaq imaynatachus qhariwarmijina yanapakuspa kawsakuna kasqanta rikunku (Colosenses 3:18-20). Wak runas ichapis tatasta yanapankuman, chaywanpis wawasta uywayqa tataspa ruwayninku. Paykuna Diospa yuyaychasqasninta yachachinanku tiyan familiankupi kusisqa kawsakunankupaq.
Chayrayku, ¿imaynatá yachachinanku tiyan? ¿Imastaq yanapanman?