Ñawiriqkunapta tapuyninku

¿Imaynatá watantinpi Jallpʼapi willakusqanta entiendenanchik tiyan?

Kay Anuario nisqa libropiqa, sapa wata Jallpʼantinpi willakusqanmanta chantá Reinomanta Willayninchikpi marzo killamanta willaykunata, ñawpaqta qhawayta munanchik. Chayta ukhuncharispaqa, Jehovap llaqtan Jallpʼantinpi willaypi, Bibliamanta yachachiypi ima ñawparichkasqanta rikunchik, chaytaq mayta kusikunchik. Chay tablapi kasqan imatachus niyta munasqanta, imapaqchus urqhukusqantataq yachayqa, kay willayta entiendenapaq yanapawasun. Chaykunamanta wakinta qhawarina.

Watapi willakusqanmanta. Anuario libropi chantá Reinomanta Willayninchikpi, sapa ñawpaq watamanta willakun, chaytataq septiembre killamanta agosto killakama yupakun. Chayrayku kay Anuario 2011 chantá Reinomanta Willayninchik marzo 2011, imaynatachus 2010 watapi willasqanchikmanta willachkan, chaytaq 1 septiembre 2009 watapi qallarirqa 31 agosto 2010 watapitaq tukukurqa.

Watapi willaqkuna, sapa killapaq willaqkuna ima. “Willaqkunaqa” Reinomanta allin willaykunata willanankupaq sutichasqas kanku bautizasqasña chayri niraq bautizasqa kaspapis. “Watapi willaqkunaqa”, watantinpi juk killallapi aswan achkha informesta jaywakusqan kachkan. Chantapis juk willaqtaqa, informe nisqata pasaq killapi mana tiemponpi jaywasqanrayku iskay kutita yupakunman. Chantá tiemponpi informenta mana jaywaqpis mana yupasqachu. Kaytaq sapa killa tiemponpi informenchikta jaywananchikta rikuchiwanchik. ¿Imaynatá “sapa killapaq willaqkuna” kasqanta yachakun? Watantinmanta informesta yupaspa chantá chunka iskayniyuqpi rakʼispa chayta yachakun.

Machkha horastachus willakun. Kay Anuario 2011 libro chantá Reinomanta Willayninchik marzo 2011 nisqanmanjina, 1.600 millones horasmanta astawanraq pasaq watapi willasqanchik. ¿Chay chhika horasllatachu Jehová Diosta yupaycharqanchik? Mana, imaraykuchus sapa semana, ancianos hermanosta waturiq risqanku, tantakuykunaman risqanchik, Bibliata ukhunchasqanchik, tʼukurisqanchik imaqa, mana yupakunchu.

Gastakusqan. Jehovamanta sutʼinchaqkunaqa, septiembre 2009 watamanta agosto 2010 watakama, precursores especialesta, misionerosta, qutuchakuykunata waturiqkunata ima, yanapanankupaq 155 millones dolaresta gastarqanku. Chantá Bibliamanta publicacionesta urqhukunanpaq, Jallpʼantinpi 20.000 kuraq betelitasta yanapakunanpaq imaqa, waktataq gastarqanku.

Señorpa Cenanpi mikhuqkuna. Kaypiqa Jallpʼantinpi, bautizasqa hermanos machkhachus Jesuspa wañuyninta yuyarinapaq tantakuypi tʼantata mikhuqkunata, vinota ukyaqkunata ima yupakun. ¿Chayllachu akllasqa cristianos Jallpʼapi qhipakuqkunamanta kanku? Mana. Imaraykuchus wakinkunaqa, wak religionniyuq kasqankurayku, mana yuyayninkupi kasqankurayku chayri mana allinta yuyasqankurayku pantaspa janaq pachaman waqyasqa kasqankuta yuyanku. Chaywanpis mana yachasunmanchu machkha akllasqasraqchus Jallpʼapi kachkasqankuta, nitaq yachananchikpunichu tiyan. Diospa Llaqtanta Kamachiqkunataq Señorpa Cenanpi mikhuqkunap sutisninkuta mana yachankuchu, nitaq paykunapura riqsinakunankupaq imatapis wakichinkuchu.a

Jatun ñakʼariy tiempo qhallarichkaptinrí, “Diosninchejpa [akllasqas] kamachisnin[man]ta” wakinqa, Jallpʼapiraq kachkanankuta yachanchik (Apo. 7:1-3). Chaykamataq akllasqasqa willaypi, Bibliamanta yachachiypi ima ñawpaqllapipuni kanqanku, chaytataq Jallpʼantinpi willakusqanpi rikunchik.

[Sutʼinchaynin]