¿Diospa castigonchu?
“Runas ñakʼarisqankumanta mayta llakikuni, chaywanpis tembatsu [Diospa castigon] kasqanta yuyani.” Ajinata Japonmanta juk político nirqa. Japonpi jallpʼa mayta ikhakusqanrayku (9.0 en la escala de Richter), marzopi 2011 watapi tsunami nisunman mama quchamanta yaku wasarimusqanrayku ima.
Haitipi 2010 eneropi jallpʼa ikhakuypi 220.000 runasmanta astawan wañusqankurayku, juk riqsisqa pastor teleniqta “Haitimanta runas Satanaswan tratota ruwasqankurayku” jallpʼa ikhakuy kasqanta, “Diosmantaq kutiriyta” necesitasqanku ima nirqa.
“Diosqa, thaluyasqa conciencianchikta wawayachiyta munan”, nispa juk sacerdote nirqa, Filipinaspa capitalnin Manilapi, 79 runas ayqikuchkaspa wañusqankumanta. Chay llaqtamanta juk periódico “pachak runasmanta iskay chunka jukniyuq runas yuyanku, Diospa phiñakuynin sinchi wayraniqta, wak llakiykunaniqta rikukusqanta”, nirqa.
MANA kunallanchu jatuchaq llakiykunawan saqra runasta, Dios castigachkasqanta creenku. Kay 1755 Lisboa (Portugal) llaqtapi, jallpʼa ikhakusqantawan, lawrarisqanrayku, tsunami kasqanrayku ima, 60.000 runas wañusqankumanta, juk filósofo Voltaire tapukurqa: “¿Lisboamanta runas, París, Londres llaqtasmanta nisqaqa astawan saqra ruwaykunatachu ruwarqanku?”, nispa. Achkha runas, ¿saqra runasta Dios llakiykunawan castigachkanchu?, nispa tapukullankutaq. Achkha suyuspipis Diospa ruwaynin kasqanta nikun.
Chayrayku tapukunachik: “¿Chiqamantachu Dios llakiykunawan saqra runasta castigachkan?, nispa. Kunallanraq jallpʼa ikhakuykuna, sinchi wayra kasqan, ¿Diospa castigonchu?”.
Wakinqa, chayjina llakiykuna kaptin Diosllata juchachanku. Chaypaqtaq Dios runasta jatun paraniqta, jallpʼa kicharikuyniqta, nina lawrayniqta ima chinchachisqanmanta parlaq versiculosta uqharinku (Génesis 7:17-22; 18:20; 19:24, 25; Números 16:31-35). Chaywanpis chay versiculosqa kimsaniqmanta mana jinachu kasqanta rikunchik. 1) Diosqa, imatachus ruwananta ñawpaqmanta willarqa. 2) Jallpʼa ikhakuyqa, saqra runasta, kʼacha runasta ima wañuchin. Diostaq mana kasukuqkunata, kʼullu runasta ima wañuchirqa. 3) Kasukuqkunatataq salvarqa (Génesis 7:1, 23; 19:15-17; Números 16:23-27).
Ni imapis rikuchinchu Dios jatuchaq llakiykunaniqta runasta tukuchichkasqanta. Chantá, ¿imaraykú astawan rikukuchkan? ¿Imatá ruwasunman llakiykunapi rikukuspa? ¿Maykʼaqllapis llakiykuna chinkanqachu? Kay tapuykunap kutichiyninta, qhipan yachaqanaspi yachakusunchik.