Tatas wawasniykichejta wawamantapacha yachachiychej

BIBLIA nin: “Wawasqa Tata Diosmanta herencia kanku; warmimanta nacekojqa may munasqa tʼinka”, nispa (Sal. 127:3). Chayraykuchá cristiano tatasqa wawitanku nacekojtin, mayta kusikunku.

Chaywanpis tatasqa wawitanku nacekusqanmantapacha jatun ruwayniyoj rikhurinku. Paykunaqa wawitanku mana onqospa wiñananpaj, sapa pʼunchay sumajta mikhuchinanku tiyan. Chantapis yachachinanku tiyan, Diosta yupaychaypi sinchʼita sayananpaj, Bibliaj yuyaychaykunasnintaj sonqonpi qhepakunanpaj (Pro. 1:8). Chaywanpis, ¿maykʼajtaj tatas wawasninkuta yachachiyta qallarinanku tiyan? ¿Imaynatataj yachachinkuman?

TATASQA DIOSPA YANAPAYNINTA NECESITANKU

Bibliaqa Manoamanta parlan, pichus Israelpi Zora nisqa llajtapi tiyakorqa. Warmenqa mana wijsallikuyta aterqachu, Jehovataj uj angelnejta payman willacherqa qhari wawitata nacechikunanta (Jue. 13:2, 3). Paykunaqa chayta yachaspa maytachá kusikorqanku. Chaywanpis imaynatachus chay wawitankuta uywanankumanta llakikorqanku, chayrayku Manoaqa Diosmanta kay jinata mañakorqa: “Mañarikuyki Señorníy, ujtawan kachamunaykita chay runata willarinawaykupaj imastachus ruwanaykuta nacenan kashan, chay qhari wawawan”, nispa (Jue. 13:8). Paykunaqa wawanku Sansonman Diospa Leyninmanta yachachinankupaj mayta kallpachakorqanku. Sansontaj chayta sumajta japʼikorqa, imajtinchus Biblia nin: “Tata Diospa Espiritunqa Sansonman jamuspa, kallpachayta qallarerqa”, nispa. Chay jawa, Sansonqa Israelpi Juez kashaspa tʼukuna imasta ruwarqa (Jue. 13:25; 14:5, 6; 15:14, 15).

¿Maykʼajtaj tatas wawasninkuta yachachiyta qallarinanku tiyan? Timoteotaqa jatun maman Loida, maman Eunice ima “wawamantapacha” “Diosmanta Qhelqasqata” yachacherqanku (2 Tim. 1:5; 3:15). Arí, Timoteoqa wawitamantapacha Diospa Palabranmanta yachakuyta qallarerqa.

Cristiano tataspis Diospa yanapayninta mañakuspa, wawasninkuta “wawamantapacha” yachachinankupaj wakichikunanku tiyan. Proverbios 21:5 nin: “Imatapis ruwanampaj kʼuchi runaj wakichisqanqa allimpuni llojsin”, nispa. Arí, tatasqa niraj wawitanku nacekushajtin tukuy imataña wakichinanku tiyan, imaswanchus uywanankutapis qhelqankuman. Astawanpis imaynatachus Diosmanta yachachinankupaj sumajta wakichikunanku tiyan. ¿Imapaj? Wawitamantapacha yachachiyta qallarinankupaj.

Imaynatachus wawas wiñasqankumanta sutʼinchaj uj libroqa wawita nacekusqanmanta ñaupaj killasninpi, ñojtitunpi imatapis usqhayllata japʼeqayta atisqanta nin. Chayrayku sumaj kanman tatas wawitasninkuman chay killaspi Diosmanta, kamachiykunasninmantapis yachachinankoqa.

Uj mamaqa, pichus precursora regular, wawanmanta parlaspa kayta nerqa: “Wawaytaqa killitayojmantapacha willayman apaj kani. Imamanchus rishasqaykuta mana yachajtinpis, qhepaman yanapasqanta rikorqani. Imajtinchus iskay watitallayojraj kashajtin, runasman mana manchachikuspa trataditosta jaywajña”, nispa.

Rikunchej jina, wawitamantapacha yachacheyqa sumajpuni. Chaywanpis tatasqa mana chayta ruwayta atillankuchu.

“TIEMPO KASHAJTILLANRAJ” YACHACHIYCHEJ

¿Imajtintaj tatas mana wawasninkuta yachachiyta atillankumanchu? Imajtinchus wawasqa mana kikinpi kayta atinkuchu, muyuyninkupi kaj imasta rejsiyta munaspataj tukuy imata tʼojpinku. Chayrayku, ¿imatataj tatas ruwankuman yachachisqankuta wawitanku japʼikunanpaj?

Moisés Deuteronomio 6:6, 7 versiculospi imatachus nisqanta qhawarina, pay nerqa: “Kay tukuy ima nisqayta sumajta sonqoykichejpi japʼiychej. Sapa kuti wawasniykichejman yachachinkichej. Kay kamachisqasmanta willaychejpuni wasiykichejpi, jinallataj ñampi purishaspapis, chantá puñunapaj siriykushaspapis, jatarishaspapis”, nispa. Moisesqa “yachachinkichej” nispa, wawasman kutin kutita mana saykʼuspa yachachinamanta parlasharqa. Imaynatachus uj sachʼitata kutin kutita qarpana, ajinallatataj wawasmanpis kutin kutita yachachina. Kuraj runaspuni kutin kutita imatapis yuyarichina kanchej, wawasqa astawanraj.

Tatasqa wawasninkuman Diosmanta yachachinankupaj tiempochakunanku tiyan. Chaywanpis mana tiempoyojlla purisqanchejrayku, tataspis ichá mana tiempochakuyta atillankumanchu. Jinapis apóstol Pablo yuyaycharqa: “Tiempo kashajtillanraj, allin kajta ruwaychej”, nispa (Efe. 5:15, 16). ¿Imaynatataj tatas chayta ruwankuman? Uj anciano tataqa llankʼanan kajtinpis, qotuchakuypi ruwanasninta juntʼanan kajtinpis, imillitanman yachachinanpaj tiempochakun, warminpis precursora kasqanrayku ashkha ruwanasniyoj. ¿Maymantataj imillitankuman yachachinankupaj tiempota orqhonku? Tata nin: “Sapa paqarin niraj llankʼayniyman rishajtiy, warmiywan noqawanqa imillitaykuman leepuyku Biblia yachachisqanmanta librituy nisqa librota chayri Diospa Palabranta sapa pʼunchay ukhunchana folletota. Chʼisisninpitaj niraj puñukapushajtin leepullaykutaj, willaymanpis pusaykupuni. Wawaykutaqa imillitallaraj kashajtin astawanqa yanapayta munayku”, nispa.

“FLECHAS JINAMIN KANKU”

¿Imaraykutaj wawasninchejman yachachinchej? Jatunyajtinku atienekunapaj jina kanankuta munaspa, astawanpis Diosta tukuy sonqo munakunankuta munaspa (Mar. 12:28-30).

Salmos 127:4 nin: “Maychus tiempompi wawasniyoj kayqa wapu maqanakojpa makimpi flechas jinamin kanku”, nispa. Arí, wawasqa maqanakojpa makinpi flechas jina kanku. Uj maqanakoj runaqa flechanwan imamanpis ujllapi japʼichiyta munaspa, mana maymanpis flecharpallanchu. Manaqa allinta qhawarispa flechanta kachaykun. Tataspis wawasninkuta uj tiempollata yachachiyta atinku, wawas usqhayllata wiñarqosqankurayku. Chay tiempopitaj Diospa kamachiykunasninta yachachinanku tiyan, ajinamanta sonqonkupi, yuyayninkupi ima qhepakunanpaj.

Apóstol Juanqa ashkha runasta yanaparqa Jehovata yupaychanankupaj. Paykunamanta parlaspataj kay jinata nerqa: “Mana imapis astawan kusichiwanchu, wawasniy cheqapi purishasqankuta uyarisqaymanta nisqaqa”, nispa (3 Juan 4). Cristiano tataspis wawasninkuta “cheqapi purishasqankuta” rikuspa, ¡mayta kusikunku!