Michejkunata kasukuna

1, 2. ¿Imaraykutaj Jehová uj michejwan kikinchakun?

JEHOVAQA uj michejwan kikinchakun (Eze. 34:11-14). Chaytaj imaynachus Pay kasqanta rikuchiwanchej. Uj kʼacha michejqa ovejasninta jarkʼan, sumajtataj qhawan. Chantapis qʼomer pampaspi michin, miskʼi yakusman pusan (Sal. 23:1, 2); tutantin qhawan (Luc. 2:8); phiña animalesmanta jarkʼan (1 Sam. 17:34, 35); uñitasta makisninpi marqʼarikun (Isa. 40:11); chinkasqasta maskʼamun, imanarpakojkunatapis jampiykun (Eze. 34:16).

² Ñaupa tiempo israelitasqa chajra runas, michejkuna ima karqanku. Chayrayku chay kikinchayqa paykunapaj may sumaj karqa. Imajtinchus ovejastaqa sumajta qhawana kasqanta yacharqanku. Runaspis, Jehovaj jarkʼayninta, yachachiyninta ima necesitanku (Mar. 6:34). Runas mana chaywan yanapachikojtinkutaj ñakʼarinku. Chaynejta, paykunataqa imapis urmachiyta atillan, nitaj yachankuchu imachus allin, imatajchus mana allin kasqantaqa. Ajinamanta runasqa chʼeqerasqas, “mana michejniyoj” ovejas jina rikukunku (1 Rey. 22:17). Chaywanpis Jehovaqa kamachisninta sumajta qhawan.

3. ¿Imatataj kay yachaqanapi ukhuncharisun?

³ Noqanchejpis Jehová uj sumaj michej kasqanta reparanchej. Imajtinchus Payqa kamachisninta ovejasta jina qhawashallanpuni. Kunanqa imaynatachus kamachisninta qhawasqanta, paykunamantaj ni imata pisichisqanta ukhuncharisun. Chantapis kamachisnin imaynatachus chaywan yanapachikunankuta qhawarisun.

SUMAJ MICHEJQA MICHEJKUNATA CHURAN

4. ¿Imaynatataj Jesús sumaj michej kasqanta rikuchin?

⁴ Jehovaqa qotuchakuypa Uman kananpaj Jesusta churarqa (Efe. 1:22, 23). Jesusqa “sumaj michej” kasqanrayku, Tatan jinallataj imatapis ruwayta munan, may kʼachataj. Payqa kausaynintapis “ovejasrayku wañuyman” jaywarqa (Juan 10:11, 15). Cristo kausayninta runasrayku qosqanqa, ¡may sumaj! (Mat. 20:28.) Jehovataj, runas Jesuspi creeyninkuta rikuchinankuta munan. “Ajinamanta pillapis [Jesuspi] creejqa mana chinkayman renqachu, astawanqa wiñay kawsayniyoj kanqa” (Juan 3:16).

5, 6. 1) ¿Pikunatataj Jesús ovejasninta qhawananpaj churan? 2) ¿Imatataj Jehovaj kamachisnin ruwananku tiyan ancianoswan yanapachikunankupaj? 3) ¿Imaraykutaj ancianosta kasukunanchej tiyan?

⁵ Jehovaj kamachisnenqa Jesús michejninku kasqanta rikuchinku. ¿Imaynamantá? Jesusllataj kayta nerqa: “Noqaqa ovejasniyta rejsini, paykunataj parlasqayta uyariwanku, qhepaytataj jamunku”, nispa (Juan 10:27). Chayrayku, Sumaj Michej Jesuspa kamachisqanman jinapuni imatapis ruwanku, qotuchakuypi michejkunata churasqantapis kasukunku. Ñaupa tiempopeqa Jesús apostolesninman, yachachisqasninman ima nerqa ovejitasninta michipunankuta. Chantapis paykunata yachachinankuta (Mat. 28:19, 20; Juan 21:15-17 leey). Paykuna tukuynejpi willasqankuraykutaj, yachachisqasnenqa ashkhayarqanku. Jesustaj ovejasninta michipunankupaj wiñay tukusqa cristianosta churarqa (Efe. 4:11, 12).

⁶ Apóstol Pabloqa Efesopi qotuchakuymanta ancianosman kayta nerqa: “Espíritu Santo churasorqachej qhawajkunata, Diospa [qotuchakuyninta] michinaykichejpaj”, nispa (Hech. 20:28). Kay tiempo ancianospis espíritu santonejllatataj sutichasqa kanku. ¿Imaraykutaj chayta ninchej? Imaraykuchus Bibliaqa espíritu santonejta yuyaychasqa karqa, ancianostaj sutichasqa kanankupaj imatachus Biblia nisqanta juntʼananku tiyan. Chay jawa, paykunata kasukuspaqa Jehovata, Jesustapis jatunpaj qhawasqanchejta rikuchinchej, pikunachus aswan kuraj Michejkuna kanku (Luc. 10:16). Chaynejta, ancianostaqa kasukunanchejpuni tiyan. Chaywanpis, ¿chayraykullachu paykunata kasukunanchej tiyan?

7. ¿Imaynatataj ancianos yanapasunku?

⁷ Ancianosqa Bibliaj nisqanman jinapuni hermanosta yuyaychanku, kallpachanku ima. Chaywanpis mana patrones jinachu hermanosta kamachiyta munanku (2 Cor. 1:24). Astawanqa yanapariyta munanku Bibliaj yuyaychaykunasninman jina imatapis ajllanankupaj. Chayta ruwaspataj qotuchakuy ujchasqa, allinpitaj kananpaj yanapanku (1 Cor. 14:32, 33, 40). Pabloqa ancianosmanta parlaspa nerqa: “Allinniykichejpaj qhawashallasunkichejpuni”, nispa. ¿Imaraykutaj ancianos chayta ruwanku? Jehová allinpaj qhawanawanchejta munasqankurayku. Chaynejta, juchaman urmanankupaj jina kashajkunata chayri “juchaman” urmajkunata yanapanankupaj wakichisqa kashanku (Gál. 6:1, 2; Jud. 22). Rikunchej jina, chaykunata ruwasqankurayku qotuchakuypi kurajkunata kasukunallanchejtaj tiyan (Hebreos 13:17 leey).

8. ¿Imaynatataj ancianos hermanosta jarkʼanku?

⁸ Apóstol Pabloqa, pichus ancianollataj karqa, Colosaspi hermanosman kayta qhelqarqa: “Allinta qhawakuychej: Pajtataj pipis pantachisunkichejman llulla yachachiykunawan, qhasi manakaj parlaykunawan ima. Yachachiyninkoqa mana Cristomantachu jamun, manachayqa ñawpa runaspa yachachiynillankumanta, kay pachapi atiyniyoj kamachejkuna sajra espiritusmantapis”, nispa (Col. 2:8). Chayta nisqanqa imaraykuchus ancianosta kasukunallataj kasqanta rikuchiwanchej. Arí, paykunaqa hermanosta jarkʼanku Jehovamanta karunchayta munajkunamanta. Pedroqa nerqa “llulla profetas”, “llullata yachachejkuna” ima rikhurinankuta. Paykunataj qotuchakuypi “mana sinchʼita sayaj runasta, sonqonkuta suwaspa, juchaman” aysayta munankuman karqa (2 Ped. 2:1, 14). Kay tiempo ancianospis, hermanosta chaykunamanta qhawakunankupaj wakin kuti yuyaychananku tiyan. Ancianosqa wiñay tukusqa cristianos kanku. Chantapis niraj anciano jina sutichasqa kashajtinkoqa Diospa Palabranta allinta rejsisqankuta rikucherqanku, cheqa kajta yachachinankupajpis wakichisqa kasqankuta (1 Tim. 3:2; Tito 1:9). Arí, wiñay tukusqa kasqankurayku, maychus kajta imatapis qhawasqankurayku, Bibliamanta yachasqankurayku ima qotuchakuyta sumajta yanapayta atinku.

SUMAJ MICHEJQA OVEJASNINTA MICHIN, JARKʼANTAJ

9. ¿Imaynatataj Jesús qotuchakuyta qhawashan?

⁹ Jehovaqa llajtannejta Jallpʼantinpi hermanosman yachachiykunata mikhunata jina qon. Chayrayku, Bibliaj yuyaychaykunasnintaqa publicacionesninchejpi tarinchej. Chantapis, ancianosqa cartanejta chayri qotuchakuykunata waturejkunanejta kamachiykunata japʼinku. Arí, Jehovaqa chaykunanejta sutʼita niwanchej imastachus ruwananchej kasqanta.

10. ¿Imatataj ancianos qotuchakuymanta karunchakojkunata yanapanankupaj ruwananku tiyan?

¹⁰ Ancianosqa qotuchakuymanta hermanosta jarkʼananku tiyan, Dioswan allinpi kanankupajtaj qhawananku tiyan. Astawanpis pikunachus juchallikunku chayri creeyninkupi llauchʼiyashanku chaykunata yanapananku tiyan (Santiago 5:14, 15 leey). Chaykunamanta wakenqa Diospa llajtanmanta karunchakorqanku, niñataj cristiano ruwanasninkuta ruwashankuchu. Ancianostaj, paykunata yanaparinankupaj tukuy imata ruwananku tiyan, ajinamanta qotuchakuyman kutinpunankupaj. Jesús nerqa: “Janaj pachapi kashaj Tataykichej mana munanchu ujllapis kay juchʼuykunamanta chinkananta”, nispa (Mat. 18:12-14).

ANCIANOSQA PANTAJ RUNAS KANKU

11. ¿Imaraykutaj wakin hermanos ancianosta mana kasukuyta atillankumanchu?

¹¹ Jehovawan Jesuswanqa mana imapipis pantankuchu. Qotuchakuyta qhawanankupaj churasqa kashanku chaykunatajrí, imapipis pantankupuni. Chayrayku, wakin hermanosqa paykunata mana kasukuyta atillankumanchu. Ichapis jinata ninkuman: “Noqanchej jina runaslla kankoqa. ¿Pitaj kasqanku imatachus ruwanayta ninawankupajri?”, nispa. Arí, ancianosqa pantaj runas kanku. Chaywanpis mana imaspichus pantasqallankutachu qhawananchej tiyan.

12, 13. 1) ¿Imayna runastaj karqanku ñaupa tiempopi Diospa llajtanta qhawajkuna? 2) ¿Imaraykutaj Jehová Palabranpi qhelqacherqa chay runaspa pantaykunasninkuta?

¹² Jehová ñaupa tiempo llajtanta qhawanankupaj churarqa chay runaspis pantaj runasllataj karqanku. Bibliataj imaspichus pantasqankuta mana pakanchu. Sutʼincharinapaj, Davidqa Israelpi kamachej karqa. Chaywanpis qhenchachakuyman, runa wañuchi kayman ima urmarqa (2 Sam. 12:7-9). Apóstol Pedropiñataj tʼukurina. Payqa qotuchakuypi jatun ruwaykunata japʼejtinpis, ashkha kutispi mayta pantarqa (Mat. 16:18, 19; Juan 13:38; 18:27; Gál. 2:11-14). Yachanchej jina, Adanmantapacha, jinallataj Evamantapacha ni pi runapis mana pantajqa kanchu, Jesuslla mana imapipis pantarqachu.

¹³ ¿Imaraykutaj Jehová Palabranpi qhelqacherqa chay runaspa pantaykunasninkuta? Pantaj runasnejta llajtanta qhawayta atisqanta rikuchinanpaj. Chaytataj unaymantapachapuni ruwarqa. Chayrayku, ancianos pantajtinkupis mana paykunapaj thutunachu, nitaj paykunata pisipaj qhawanachu. Jehovaqa paykunata jatunpaj qhawananchejta, kasukunanchejta ima munan (Éxodo 16:2, 8 leey).

14, 15. ¿Imatataj yachakunchej Jehová llajtanman pikunanejtachus parlasqanmanta?

¹⁴ Ancianostaqa kasukunanchejpuni tiyan. Ñaupa tiempopi pikunanejtachus Jehová kamachiykunata qosqanpi tʼukurina. Israelitasmanqa Egiptomanta llojsinankupaj Moisesnejta, Aaronnejta ima kamachiykunata qorqa. Chunka kaj ñakʼariy kashajtin salvakunankupajqa chʼisiyaykushajtin mikhunata wakicherqanku, ñakʼarqanku chay ovejaj yawarnintataj, punku sayanta kʼaspisman chʼajchorqanku. Chayta ruwanankutaqa mana Jehová kikinchu israelitasman nerqa. Manaqa Moisesmanraj nerqa, Moisestaj Israelmanta kurajkunaman willarqa, chay kurajkunataj israelitasman willarqanku (Éxo. 12:1-7, 21-23, 29). Chay kutipeqa Jehová Moisesnejta, kurajkunanejta ima kamachiykunata qorqa. Kunanpis ancianosnejta kamachiykunata qowanchej.

¹⁵ Biblia nisqanman jinaqa Jehová waj kutispipis, kamachisninman angelesnejta chayri runasnejta salvakunankupaj kamachiykunata qorqa. Arí, wajkunata kamacherqa Paypa sutinpi parlanankupaj. Paykunataj, Diospa llajtanman willarqanku imatachus mana wañunankupaj ruwananku kasqanta. ¿Manachu Jehová Armagedón chayamojtin kikillantataj ruwanman? Chayrayku ancianosqa, pikunachus Jehovaj chayri llajtanpa sutinpi parlanankupaj churasqa kanku, sumajta qhawarikunanku tiyan kamachisqa kasqankuman jinalla imatapis ruwanankupaj.

“UJ TROPALLA KANQANKU, UJ KʼATA MICHEJNIYOJTAJ”

16. ¿Ima “palabrasta” uyarinanchej tiyan?

¹⁶ Jehovaj llajtanqa “uj tropalla kan[ku], uj kʼata michejniyojtaj”, chay michejtaj Jesucristo (Juan 10:16). Jesús yachachisqasninman nerqa: “Yachaychej, noqa qankunawan tuta pʼunchay kasqayta, kay pacha tukukunankama”, nispa (Mat. 28:19, 20). Jesús Rey kasqanrayku, Satanaspa sajra pachan chinkachisqa kanankama imaschus kananqa paypa makinpi kashan. Diospa llajtallanpipuni sumaj jarkʼasqa kayta munanchej chayqa “kaymin cheqan ñanqa” nisqa “palabrasta” uyarinanchej tiyan. ¿Imataj chay palabras kanku? Jehová Biblianejta yachachiwasqanchej, paywan Jesuswan ancianosnejta kamachiwasqanchej ima (Isaías 30:21; Apocalipsis 3:22 leey).

17, 18. 1) ¿Imapitaj Jehovaj kamachisnin rikukunchej, chaywanpis imaraykutaj mana manchachikunanchejchu tiyan? 2) ¿Imatataj qhepan yachaqanapi ukhuncharisun?

¹⁷ Apóstol Pedro nerqa: “Kuraj Supayqa, phiña león jina qhaparirispa muyuykachasunkichej, mayqellantapis oqoykunampaj”, nispa (1 Ped. 5:8). Arí, Satanasqa yarqhasqa phiña león jina Diospa ovejasninta wateqashan. ¿Imapaj? Creeypi llauchʼiyasqas kashanku chaykunata chayri Diospa llajtanmanta karunchakunku chaykunata oqoykunanpaj. Chayraykumin Diospa llajtanmantaqa mana karunchakunanchejchu tiyan, nitaj Jesucristomantapis pichus Diospa tropanpa “Michejnin, Qhawajnintaj” (1 Ped. 2:25). Apocalipsis 7:17 versiculoqa manchay ñakʼariy tiempopi mana wañonqankuchu, chaykunamanta nin: “Corderoqa paykunata michenqa, kawsaj yaku juturisninmantaj pusanqa. Diostaj paykunaj ñawisninkumanta tukuy waqayta pichanqa”, nispa. Chaytaj may sumajpuni kanqa.

¹⁸ Kay yachaqanapeqa qotuchakuypi ancianos imapajchus churasqa kasqankuta yachakorqanchej. ¿Imaynatataj ancianos Jesuspa ovejasninta sumajta qhawankuman? Qhepan yachaqanapi chayta ukhuncharisun.