Bibliaj kutichiykunasnin
¿Pitaj kay mundota kamachishan?
Dios kay mundota kamachishan chayqa, ¿chay chhika ñakʼariykuna kanmanchu?
Ashkha runas ninku kay mundota, Dios kamachishasqanta. Ajina kajtin, ¿chay chhika ñakʼariykuna kanmanchu? (Deuteronomio 32:4, 5.) Bibliaqa willawanchej, kay mundoqa uj sajra kamachejpa atiyninpi kasqanta. (1 Juan 5:19 leey.)
Chay sajra kamachej, ¿imaynatataj kay mundota kamachinanpaj atiyta japʼerqa? Kay pacha qallarishajtin, uj ángel, pichus chantá Satanás sutikorqa, Diospa contranpi oqharikorqa. Paytaj ñaupa tatasninchejta Diosta wasanchanankuta nerqa (Génesis 3:1-6). Paykunataj Satanasta kasuspa, kamachejninku kananta saqerqanku. Chaywanpis kay mundotaqa Tukuy Atiyniyoj Dioslla kamachiyta atin. Payqa munakusqanchejrayku kasukunanchejta munan (Deuteronomio 6:6; 30:16, 19). Ashkha runastaj ñaupa tatasninchej jina, Diosta mana kasullankutajchu. (Apocalipsis 12:9 leey.)
¿Pitaj runaspa chʼampayninta allinchanqa?
¿Dios saqenqachu Satanás kamachinallantapuni? Ni imarayku. Astawanpis Jesusnejta, Satanaspa tukuy sajra ruwasqasninta allinchanqa. (1 Juan 3:8 leey.)
Diosqa Jesusman atiyta qorqa, Satanasta wiñaypaj chinkachinanpaj (Romanos 16:20). Pisimantawantaj, Dios runasta kamachenqa. Chantataj qallariypi munarqa jina, runasqa kusisqas kausanqanku. (Apocalipsis 21:3-5 leey.)