¿Imatá Dios ruwanqa sajra ruwaykunawan?

Bibliaqa nin Jehová, Churin Jesucristo ima Satanás ñakʼariykunata rikhurichisqanwan imatachus ruwanankuta. “Chayrayku Diospa Churenqa jamorqa chay Kuraj Supaypa ruwasqasninta phirinampaj.” (1 Juan 3:8.) Kay pachamanta qolqe munapayay, chejninakuy, sajra ruwaykuna ima chinkanqa. Chantapis Jesusqa kay pachata kamachej Satanasta jawaman wijchʼonqa (Juan 12:31). Satanaspa ruwasqasnin chinkajtintaj, Diosqa uj mosoj kausayta jatarichenqa. Kay pachataj kusiywan, allin kausaywan ima juntʼa kanqa (2 Pedro 3:13).

Sajrata ruwallaytapuni munajkunawanrí, ¿imá kanqa? Bibliaqa kutichin “cheqanta kawsajkuna [...] kay pachapi wiñaypaj” tiyakunankuta, sajrata ruwajkunatajrí “kay pachamanta wijchʼusqa [...] tʼirasqa” ima kanankuta (Proverbios 2:21, 22). Ajinamanta sajrata ruwajkunaqa chinkachisqa kanqanku, kusiy kausaytaj kanqa. Ajina sumaj kausaypi kasukoj runasqa, pisimanta pisi juchamanta kacharichisqas kanqanku (Romanos 6:17, 18; 8:21).

Diosqa sajra ruwaykunata chinkachenqa, mana munaynillantaña ruwachinawanchejpajchu, manaqa kamachiykunasninta yachachinawanchejpaj. Chantapis yuyayninchejta llimphuchanapaj, sajra ruwaykunatataj manaña ruwanapaj yanapawasun.

Mana suyasqallamanta ñakʼariywanrí, ¿imatá Dios ruwanqa? Payqa Reinon kay pachata kamachinanta nerqa, chaypajtaj Churin Jesusta kamachinanpaj churarqa. Payqa onqosqasta sanoyachiyta atin (Mateo 14:14). Chantapis manaña sinchʼi para, sinchʼi wayra, waj imaspis runasta ñakʼarichinanta saqenqachu (Marcos 4:35-41). Mana suyasqallamanta ñakʼariykunatataj chinkachenqa (Eclesiastés 9:11, NM). Arí, Jesús kamachishajtenqa mana ima sajra kajpis runasta ñakʼarichenqañachu (Proverbios 1:33).

May chhika runas accidentespi wañupojkunapajrí, ¿ima suyakuytaj tiyan? Jesús amigon Lazarota kausarichimuytawan, ajinata nerqa: “Noqa kani kawsarimuy, kawsaytaj”, nispa (Juan 11:25). Arí, Jesusqa chay wañojkunata kausarichimunanpaj atiyniyoj.

Sumaj Jallpʼapi kʼacha runasta manaña ñakʼarinankuta rikuyta, ¿munawajchu? Ajina kajtenqa Bibliamanta yachakunayki may allin kanqa. Chaypitaj cheqa Diosmanta, munayninmanta ima yachakunki. Chaypajtaj llajtaykimanta Jehovaj testigosnin kʼachamanta yanapasonqanku, paykunawan parlariy chayri kay revistata qhelqajkunaman qhelqay.