BIBLIAJ KUTICHIYKUNASNIN
¿Imaraykú Diospa Reinon jamunanta mañakuna tiyan?
Diospa Reinonmanta, chantá imatachus ruwananmanta ima, ¿astawan yachakuyta munawajchu?
Diospa Reinonqa janaj pachapi uj gobierno. Jesusqa yachachisqasninman “Reinoyki jamuchun”, nispa mañakunankuta yachacherqa. Chay Reinoqa kusiyta, cheqan kausaytawan apamonqa. Ni mayqen gobierno sajra ruwaykunata, nitaj onqoykunata chinkachinmanchu. Chaykunataqa Diospa gobiernollan chinkachiyta atin, chinkachenqapunitaj. Diosqa, Churin Jesusta chay Reinopi kamachinanpaj churarqa. Uj qotu cristianostataj, Jesuswan khuska kamachinankupaj ajllarqa. (Lucas 11:2; 22:28-30 leey.)
Chay Reinoqa tumpamantawan Diospa enemigosninta chinkachenqa. “Reinoyki jamuchun”, nispaqa tukuy gobiernospa cuentanmanta, Diospa Reinon kamachinanta mañakushanchej. (Daniel 7:13, 14; Apocalipsis 11:15, 18 leey.)
¿Imaraykú Diospa Reinon may sumaj?
Jesusqa khuyakuyniyoj, chaytaj sumaj Rey kasqanta rikuchin. Diospa Churin kasqanraykutaj, Tatanmanta yanapata mañakojkunata yanapananpaj atiyniyoj. (Salmo 72:8, 12-14 leey.)
Diospa nisqasninta kasukuspa, tukuy sonqo Diospa Reinon jamunanta mañakojkunaqa, ashkha bendicionesta japʼenqanku. Diospa Reinonmanta Biblia imatachus nisqanta yachakuspaqa, ni jaykʼaj pesachikunkichu. (Lucas 18:16, 17; Juan 4:23 leey.)