TAPANMANTA | ¿SATANÁS KANPUNICHU?
¿Satanás kanpunichu?
Kay lanteqa, Satanás janaj pachamanta wijchʼuchikamusqanta rikuchin (Madrid, España)
ROGELIO: “El Salvador suyupi wiñakorqani. Mamayqa mana kasojtiy ‘Supay qʼepikapusonqa’ niwaj, noqataj: ‘qʼepiwachunpis ari’, nej kani. Noqaqa Satanaspi má creejchu kani.”
Ichá qanpis Rogelio jinallataj yuyanki, chayri ichá ninki:
Satanasqa mana kanchu, runaj sonqonpi sajra kajlla.
Satanasqa kanpuni. Jinapis runaj kausayninman mana satʼikunchu.
Satanasqa uj atiyniyoj espíritu, runastataj munayninta ruwachiyta atin.
Ashkha runas Satanasmanta tukuy imata yuyanku. Jinapis, ¿imaraykú yachananchej kanman pichus Satanás kasqanta? Kaypi tʼukuriy, Satanás mana kanchu nisunman chayqa, kanpuni nejkuna chʼaukiyachikushanku. Satanás kan chaypis, runaj kausayninman mana satʼikunchu nisunman chayqa, payta manchachikojkuna qhasillata ñakʼarishanku. Kaypi tʼukurillaytaj Satanás runasta munayninta ruwachishan chayqa, ichá mana yuyallanchejpischu imayna sajrapunichus kasqanta.
¿Satanás sonqonchejpi sajra kajllachu? Kanpuni chay, ¿manchachikunachu tiyan? ¿Imaynatá jarkʼakusunman? Biblia imatachus chay tapuykunaman kutichisqanta qhawarina.