TAPANMANTA | DIOSMAN QAYLLAYKUYTA ATINCHEJ
Ni imawan kikinchakunchu
¿Imatá ruwananchej tiyan Diosman qayllaykunanchejpaj? Ñaupaj yachaqanaspi parlarisqanchejman jina, kay kinsa yuyaychaykunata yuyarina:
Jehová Diospa sutinta rejsinanchej tiyan, oqharinanchejtaj tiyan.
Dioswan parlarina paymanta mañakuspa, Bibliata leerispa ima.
Jehová Diosta kasukunapuni.
Diosman qayllaykunaykipajqa sutinta rejsiy, paywan parlariy, Bibliata leey, munaynintataj ruway
Diosman qayllaykunaykipaj, ¿kay kinsa yuyaychaykunaman jinachu ruwashanki? ¿Mayqenta ruwanaykipajtaj astawan kallpachakunayki tiyan? Kay yuyaychaykunaman jina ruwaspaqa, ashkha bendicionesta japʼisun.
Estados Unidosmanta uj warmi Jennifer nin: “Diosman qayllaykunanchejpaj kallpachakoyqa má qhasipajchu. Imajtinchus chayta ruwaspaqa Diospi astawan atienekunchej, sumajta rejsinchej, astawanpis mayta munakunchej. Chay tukuy bendicionestaj ni imawan kikinchakunchu”, nispa.
¿Qanpis Diosman qayllaykuyta munawajchu? Jehovaj testigosnenqa tukuy sonqo yanapasonqanku. Paykunaqa mana imata mañaspalla Bibliamanta yachachisonqanku. Chantapis maypichus tantakunku chay wasiman riwaj. Chaypeqa ashkha runas Diosta yupaychanku, jatunpajtaj qhawanku.a Risqaykiman jinataj pisimanta pisi salmista jina ninki: “Noqarí Diosman qayllakusaj. Noqapajqa chaymin aswan sumajqa”, nispa (Salmo 73:28).
a Bibliamanta yachakuyta munaspaqa, chayri maypichus Jehovaj testigosninpata tantakunanku wasi kasqanta yachayta munaspaqa, pichus kay revistata jaywasorqa chaywan parlariy. Chayri Internetpi maskʼawaj kay www.jw.org/qu QALLARIYNIN › QHELQAMUWAYKU nisqaman yaykuspa.