TAPANMANTA | ¿IMAYNATÁ KUSIYWAN TRABAJASUNMAN?
¿Trabajayta qhellakunachu?
Alexqa qhellakuspalla uj cajatawan camionman churaykun. Payqa runaspata tukuy imasninkuta astaysispa trabajan. Sonqollanpi nin: “Ay, maykʼajllachus aswan sumaj trabajota tarikuymanpis. Chaywanqa niña burro jina trabajaymanchu”, nispa.
Mana Alexllachu sinchʼi trabajayta qhellakun. Aaronqa mecánico, pay nin: “Ashkha runasqa creenku ajina llankʼayqa, pisipaj qhawachikuylla kasqanta. Yuyankutaj qhepaman aswan sumaj trabajo kajtin, chayllapiña trabajayta munasqankuta”, nispa.
Ashkha runasqa mana anchata trabajanankupajchu ruwasqa kasqankuta yuyanku. ¿Imaraykú jinata yuyanku? Ichá paykunaqa telepi chayri radiopi uyarinku sumajta kausakunapajqa, tukuy imayojpuni kana kasqanta, qolqetapis chukuspallaña ganana kasqanta. Matthewqa edificiosta llimphuchaspa, pintaspa ima trabajan, pay nin: “Runasqa yuyanku sonsollamanta burro jina trabajana kasqanta”, nispa. Shaneqa uj escuelamanta portero, paytaj nin: “Runasqa mana anchata trabajaspalla, astawan ganayta munanku”, nispa.
Ashkha runas trabajayta qhellakojtinkupis, wakenqa kusiywan, sumajta trabajanku. Danielqa 25 watasniyojña, albañilmanta trabajan, pay nin: “Trabajayqa may sumajpuni, wajkunaj allinninkupaj imallatapis ruwayqa, mayta kusichiwanchej”, nispa. Andreqa 23 watasniyojña, pay nin: “Trabajaspalla kusiyta tariyta atinchej, manaqa mana. Pisita trabajaspaqa má kusisqachu kanchej, astawanpis qhellakuylla chayamuwanchej”, nispa.
¿Imaraykú Danielwan Andrewan kusisqa trabajanku? Paykunaqa, Bibliaj yuyaychaykunasninta sumajta japʼikunku. Bibliaqa yachachiwanchej mana qhellakuspa trabajanata, kusiywantaj imatapis ruwanata.
Kusiywan trabajananchejpaj, ¿Biblia yanapawasunmanchu? Chayta yachanaykipajqa, kay qhepan yachaqanata leeriy.