Allin kausayta tarinaypaj kinsa tapuykuna yanapawarqa

ÑAUPAJ KAUSAYNIY:

Ancram llajtitapi wiñakorqani, chaytaj Estados Unidospi kashan. Chaypeqa lechera wakaslla ashkha tiyaj, runasmantapis aswan ashkhapuni.

Familiayqa iglesiaman rejpuni kanku. Abueloyqa escuelaman Diosmanta yachakoj rinaypaj, sapa domingo paqarinta zapatosniyta llimphuchapuwaj. Abuelitayqa yuraj Biblitata regalawarqa, chay aparisqa rej kani. Tatasniykoqa yachachiwaj kayku, trabajayta, runasta respetayta, vecinosta yanapariyta, Diosmanpis graciasta qoyta.

Jatunyaytawantaj wasiymanta ripuspa profesorapaj estudiarqani. Diosmanta, kausaymantawan mayta yachakuyta munaj kani. Imajtinchus escuelapi yachachishaspaqa, reparaj kani wakin wawasqa sumajta japʼeqasqankuta, wakintaj mana. Wakin wawasqa sumajta phinkiykacharej kanku, wakintajrí suchitus kasqankurayku mana atejchu kanku. Nipuni allinchu rijchʼawaj. Wakin tatasqa ajinata wawasninkuta rikuspa “Diospa munayninchá”, nej kanku. “¿Imajtintaj Dios wawitasta suchitus kanankuta qhawakullanri?”, nispa nej kani.

Imatachus kausayniywan ruwanayta mana yacharqanichu. Watasqa imata jina ripusharqa, nitaj ima ruwasqaypis yachakojchu. Familiay kʼachata kausakojtinpis, sumajta estudiachiwajtinkupis chayri sumaj trabajoyoj kaspapis, nipuni sonqo juntʼasqachu kaj kani. “Ichá casarakuspa wawasniyoj kayman, kʼacha wasipitaj tiyakuyman, jubilakunaykamataj trabajallaymanpuni. Chantá wañupunaykama machu runasta qhawanku chay wasiman ripuyman”, nispa sonqollaypi nej kani. “¿Chaykunata ruwanallapajchu runaqa kausanchej?”, nispa tapurikoj kani.

BIBLIAMAN JINA KAUSAYNIYTA TIJRACHISQAY:

Uj kuteqa vacacionespi waj profesoreswan khuska Europaman rerqayku. Chaypi kashaspataj ashkha iglesiasta rejsimoj rerqayku, Westminsterman, Notre-Dame de Parisman, Vaticanoman, waj iglesiasmanwan. Mayllamanpis rispaqa tapuykunasniyman kutichinawankuta munaj kani. Sloatsburg, Nueva York llajtapi wasiyman kutipuspapis, waj iglesiasman rillarqanitaj, ni mayqenninkutaj allinta kutichiyta atiwajchu kanku.

Uj kuti escuelamanta uj imillita 12 watayojllaraj tapuriwarqa: “¿Jehovaj testigon kasqayta yachankichu?”, nispa. Noqataj: “arí” nerqani. Tapurillawarqataj: “¿Jehovaj testigosninmanta yachakuyta munawajchu?”, nispa. “Arí”, nillarqanitaj. Chantá tapullawarqataj: “¿Maypí tiyakunki?”, nispa. Maypichus tiyakusqayta willajtiytaj, repararqayku wasisniyku qayllallapi kasqanta. Nipuni yuyarqanichu chay kinsa tapuykunalla kausayniypi yanapanawanta.

Chantá chay imillitaqa bicicletapi wasiyman jamuspa Bibliamanta yachachiwarqa. Imatachus iglesiasta kamachejkunaman tapurej kani chayllatataj tapurejteyqa, payqa chay kutichiykunata Bibliallaypitaj rikuchiwarqa. ¡Tapuykunasniyman kutichiykunaqa Bibliapi kashasqa!

Bibliamanta yachakusqayqa mayta sonqochawarqa. Kay 1 Juan 5:19 nin “kay pachapi kaj chhika runas[qa] Kuraj Supaypa atiynimpi kasqankuta”. Chaytaj reparachiwarqa ñakʼariykunamanta juchayojqa Satanás kasqanta, aswan qhepamantaj Dios chay ñakʼariykunata chinkachinanta (Apocalipsis 21:3, 4). Reparallarqanitaj Bibliaqa entiendenapaj jinalla kasqanta. Arí, cheqa yachachiykunaqa Bibliallapi tiyan, chaytataj tukuy yachachiyta atinku. Imajtinchus noqataqa uj imillitalla yachachiwarqa.

Chaywanpis yachaytapuni munarqani Jehovaj testigosnin yachachisqankuman jinachus manachus kausakusqankuta. Chay imillitaqa cheqa cristianos kʼachastaj, pacienciayojtaj kasqankuta niwaj (Gálatas 5:22, 23). Uj kutitaj jinachus manachus kasqanta yachayta munaspa, Bibliamanta yachachinawanpaj mana horanpichu wasiyman chayarqani. “¿Suyashawanmanchu? ¿Phiñasqachu kashanman?”, nispa tapurikorqani. Chayanaypajqa wasi punkuypi chukusqa suyashawasqa. Rikuwaspataj autoykama corremuspa niwarqa: “Mamayta policiasman, hospitalesmanwan wajyananta nimunaypajña kasharqani. Qanqa horanpipuni chayamoj kanki. ‘Accidentakunchu imataj’, nispa, ¡may llakisqa kasharqani!”, nispa.

Uj kutitaj mana kutichiyta atinawanpaj jina tapuykorqani. Yachayta munarqani imaynatachus kutichinawanta. Tapurejteyqa allin allinta qhawariwaspa niwarqa: “Chaytaqa tatasniyman rikuchinaypaj anotakusaj”, nispa. Ujpiwan kutimuspataj, La Atalaya revistata aparisqa jamusqa. Chay revistaqa tapuyniyman kuticherqa. Chayrayku Jehovaj testigosnin yachachinawankuta munarqani. Imajtinchus librosninku, revistasninkupis Biblia nisqanman jinapuni tapuykunasniyman kutichiwarqanku. Chay imillitaqa yachachillawarqapuni, watanmantaj bautizakorqani.a

BENDICIONESTA JAPʼISQAY:

Tukuy imata sutʼitaña yachakuspaqa, chay yachakusqayta tukuyman willamuyta munaj kani (Mateo 12:35). Familiaresneyqa Bibliamanta yachakusqayta mana allinpajchu qhawaj kanku. Tiempo pasasqanman jinataj allillan rijchʼarqa. Mamayqa wañupunan qayllata Bibliamanta yachakuyta qallarerqa. Kausashanmanraj karqa chayqa, bautizakunmanpuni karqa.

Kay 1978 watapi Elias Kazanwan casarakorqani, 1981 watapitaj Estados Unidospi Betelman wajyariwarqayku.b Tawa watasninmantaj qosay wañuporqa. Noqataj Betelpi qhepakaporqani. Chaypeqa ashkha ruwanasniyoj kaj kani, chaytaj yanapawarqa mana anchata llakikunaypaj.

Kay 2006 watapitaj Richard Eldredwan casarakorqani. Khuskataj Betelpi kusisqa llankʼashayku. Bibliamanta yachakusqayqa, tapuykunasniyman kuticherqa, allin kausayta tarinaypajtaj yanapawarqa. Chay imillitachus mana kinsa tapuykunata ruwawanman karqa chayqa, kausayneyqa imaynachus kashanmanpis karqa.