Kausayneyqa astawan mana allinman tukusharqa

ÑAUPAJ KAUSAYNIY:

Kausakorqani Los Ángeles llajtaj kantunpi (California, Estados Unidos). Chay llajtaj ashkha lugaresninpitaj tiyakorqayku. Chay lugarestaj drogasta vendekusqanrayku, ashkha pandillerostaj kasqanrayku may rejsisqa. Sojta hermanos kayku, noqaqa kurajpa sullkʼan kani.

Mamayqa uj iglesiaman pusawaj kayku. Chaywanpis chaypi nikusqantaqa mana kasukojchu kani. Domingostaqa iglesiapi takejkunawan takej kani, waj diastaj fiestasman rej kani, drogakoj kani, khuchichakoj kani, waj imastataj ruwaj kani.

Phiña runa karqani, imallamantapis maqanakuytapacha munaj kani. Atipayta munaspa imatachá japʼisqaywan maqanakoj kani. Iglesiapi yachakusqayqa mana yanapawarqachu. Astawanpis nej kani: “Vengakunaqa Señorpata, noqataj kamachin kani”. Kay 1969 wata chaynejtataj 18 watayoj jina kashajtiy uj qotu politicosman ujchakuyta munarqani. Paykunaqa Panteras Negras nisqa karqanku. Panteras Negras nisqaqa may rejsisqa karqanku runaj derechosninkurayku maqanakusqankumanta. Chayrayku kikinta ruwayta munaj jovenesman ujchakorqani. Paykunapis noqa jina colegiollapiraj kasharqanku. Wakin kuteqa marchasta ruwaj kayku, chayraykutaj escuela wisqʼasqa qhepakoj.

Astawan sajra imasta ruwaj kani. Runata chejnikusqayrayku waj sajra imasta ruwarqani. Wakin kuti rej kayku cineman peliculata qhawaj, chay peliculapitaj qhawaj kayku imaynatachus Estados Unidospi Africano esclavosta ñakʼarichisqankuta. Chayta qhawasqaykurayku cinepi kaj gringuitosta maqaj kayku, chantapis maypichus gringuitos tiyakunku chayman rillajtaj kayku maqamunaykupaj.

Chay tiempopajqa noqawan hermanosniywan ashkha sajra ruwaykunataña ruwarqayku. Autoridadespamanpis ashkha kutitaña chayarqayku. Ujnin sullkʼayqa mana allinpaj qhawasqa pandillapi kasharqa, noqataj paykunawan masichakoj kani. Kausayneyqa astawan mana allinman tukusharqa.

BIBLIAMAN JINA KAUSAYNIYTA TIJRACHISQAY:

Uj amigoypa tatasnenqa Jehovaj testigosnin karqanku, paykunataj tantakuyninkuman wajyariwarqanku. Chay tantakuypitaj repararqani waj jinas kasqankuta. Tukuypata Biblia kaporqa, leesharqankutaj. ¡Wawasllaraj kajkunapis ñaupajmanta parlarimoj kanku! Tʼukorqani Diospa sutin Jehová kasqanta yachaspa, paymanta parlaspataj sutinta oqharisqankumanta (Salmo 83:18, NM). Runasqa tukuynejmanta kaspapis mana chejninakojchu kanku.

Ñaupajtaqa mana Bibliata estudiayta munarqanichu, tantakuykunallamantaj riyta munaj kani. Uj chʼisi tantakuypi kashajtiy amigosniy fiestaman risqanku, maypichus uj joventa maqaspa wañurpachisqanku, qara chamarranta qhechunankupaj. Qʼayantenqa runaykachasharqanku. Juicio ruwakushajtinpis manchayraj kasharqanku. Casi tukuyninkutataj niña ujtawan carcelmanta llojsimunankupaj wisqʼaykorqanku. ¡May kusisqa kasharqani paykunawan mana risqaymanta! Chayrayku sajra kajta saqeporqani, Bibliatataj estudiayta qallarerqani.

Runasta chejnikoj kani, jinapis Jehovaj testigosnin imatachus ruwasqankoqa tʼukuchiwarqa. Uj kuti, gringuitos familia wawasninta saqerqa yana runitas kaj familiaman. Waj gringuitos familiataj wajyarerqa yana runitasmanta kaj joventa paykunawan tiyakunanpaj. Chaytaj reparachiwarqa Jehovaj testigosnin Jesús, Juan 13:35 versiculopi nisqanta juntʼasqankuta, chaypi nin: “Qankunachus munanakunkichej chayqa, tukuy runas yachanqanku yachachisqasniy kasqaykichejta”. Sutʼita yacharqani cheqa hermanosta tarisqayta.

Bibliata estudiasqayrayku yachakorqani munakuyniyoj kanayta. Chantapis kallpachakunay karqa sonqomantapacha kʼacha runa kanaypaj (Romanos 12:2). Pisimanta pisi ñauparerqani, 1974 watapitaj enero killapi Jehovaj testigon jina bautizakorqani.

Bautizakuytawanpis kallpachakunallaypuni karqa. Uj kuti uj lugarpi Diosmanta willashajtiyku, rikorqani autoymanta radiota suwa apakapushajta. Qhatiykorqanitaj. Japʼishajtiyñataj radiota choqarpaspa ayqekorqa. Radioyta qhechumusqayta hermanosman willarejtiytaj, uj hermano niwarqa: “Japʼispa, ¿imanawajtaj karqa?”, nispa. Chaytaj reparachiwarqa ñaupaj sajra kausayniymanta wakin imasta saqenayraj kasqanta.

Kay 1974 watapi octubre killapi precursor especial jina llankʼayta qallarerqani. Pachaj horasta jinataj killapi waj runasman Bibliamanta yachachej kani. Chaymantataj Jehovaj testigosninpa centralninkuman wajyariwarqanku Brooklyn (Nueva York) llajtaman. Kay 1978 watapitaj Los Ángeles llajtaman kutiporqani mamayta qhawaj, mamayqa onqosqa kasharqa. Iskay watanmantaj Aarhondawan casarakorqani. Aarhonda sumajta yanapawarqa mamayta qhawanaykama. Mamay wañupusqantawantaj Galaad Escuelaman wajyariwarqayku. Chaymantataj Panamá suyuman kachawarqayku, kunankamaqa chayllapipuni kashayku.

Bautizakusqaymantapacha wakin kutipi mayta kallpachakunay karqa mana phiñakunaypaj. Wakin kuteqa mana maqanakunaypaj ripoj kani, wakin kutitaj phiñakuyniyta ñitʼiykukunay karqa. Casi tukuy, warmiy ima phiñakuyniyta atipasqaymanta mayta kusikunku, ni noqapis creenichu chayta ruwasqayta. Chayqa mana noqallamantachu karqa. Astawanqa Biblia runaspa kausayninta tijrachinanpaj atiyniyoj kasqanrayku (Hebreos 4:12).

BENDICIONESTA JAPʼISQAY:

Bibliaqa kausayniypi kusisqa kanaypaj, llampʼu sonqo kanaypajtaj yanapawarqa. Niña pitapis maqanichu, astawanqa runasman Diosmanta yachachini. Chantapis Bibliamanta yachacherqani, joven kashaspa enemigoy karqa chayman. Bautizakusqanmantataj kikin wasipi uj tiempota tiyakorqayku, kunankamapis sumaj amigosllapuni kayku. Kunankamaqa warmiy, noqa ima Diosmanta yachacherqayku 80 runasmanta astawan, paykunataj Jehovaj testigosninña kanku.

Mayta agradecekuni Jehovaman, kusisqa kausakusqaymanta, cheqa hermanoswan khuskataj kasqaymanta.