Diosta sirvispa kusiyta tarerqani

Watanmantaj peliculaspi llojserqani. Ashkha peliculaspeqa noqalla astawan llojsej kani. Periodistasqa tukuy imata tapuwayta, fotosta orqhowayta ima munaj kanku. Chantapis runasqa tukuy imaman wajyariwaj kanku, mosoj empresata chayri waj imata kicharishasqankuman, paykunawan mikhurinaypaj ima. Tukuy, may allinpaj qhawawaj kanku.

Jinapis tiempowanqa repararqani, kausayniy mana yuyasqayman jinachu kasqanta. Ashkha peliculasqa maqanakuymanta karqa. Chayrayku kausayniytapis wañuy pataman churaj kani. Hollywood llajtapeqa ajina peliculasta ruwakojtin, wajta ruwachej kanku. Jinapis Hong Kong llajtapeqa, noqallataj llojsinay karqa, kausayniyta wañuy pataman churaspa. Uj kuteqa peliculapi llojsinaypaj motowan auto patata pasanay karqa. Arí, ashkha peliculaspi llojsisqayqa, mana allinchu karqa. Imajtinchus khuchi kausaymanta, sajra ruwaykunamanta, wakintaj supaykunamanta ima karqa.

Kay 1995 watapi peliculasta ruwakunanpaj cargoyoj kajwan casarakorqani. Tukuy ima kapuwarqa kusisqa kausakunaypaj jina. May rejsisqa karqani, qhapaj, kʼacha qosayojtaj. Jinapis llakisqa kasharqani. Chayrayku llankʼayniyta saqeporqani.

WAWA KASHASPA YACHAKUSQAYMANTA YUYARIKUNI

Hermanaywan noqawanqa juchʼuyllaraj kashaspa, sapa sábado Bibliata estudiaj kayku uj kʼacha familiawan. Paykunaqa Jehovaj testigosnin karqanku. Tataqa Joe McGrath sutikorqa, paytataj “tío Joe” nej kayku. Payqa kinsa wawasninman noqaykuman ima Bibliamanta yachachiwaj kayku. Warminpaj wawasninpajpis kʼacha karqa. Paykunawan tantakuykunaman rej kani. Wakin kutitaj jatun tantakuykunaman. Chay wataspeqa kusisqa kausakorqani, paykunataqa mana manchachikojchu kani.

Wasiypitaj tatay mana allinta kausasqanwan mamayta maytapuni llakichej. Chunka watayoj jina kashajtiytaj, mamayqa manaña Jehovaj testigosninwan tantakorqachu. Noqataj niña ancha kusisqachu kaspapis rillarqanipuni, 17 watayoj kashaspataj bautizakorqani. Jinapis pisi tiemponmanqa, niña cristiana jinachu kausakorqani, Jehovaj testigosninmantataj karunchakorqani.

KUTIYKAPUNI

Casarakusqaymanta pisi tiemponman, Jehovaj testigosninmanta kajkuna iskay hermanos (ancianos) waturikuwarqanku. Paykunaqa wasiy qayllallapi tiyakorqanku. Imaynatachus Jehová Diosman kutirikunaytataj sutʼinchawarqanku. Uj misioneratataj nerqanku yanaparinawanta. Chay hermanaqa Cindy sutikorqa. Chay tiempopajqa niña imapi creejchu kani. Chayrayku chay hermanata nerqani Biblia, Diospa Palabranpuni kasqanta rikuchinawanta. Cindyqa rikuchiwarqa Bibliapi wakin profecías juntʼakusqantaña. Pisimanta pisi sumaj amigasman tukorqayku. Paywantaj Bibliaj wakin yachachiykunasninta ukhuncharerqani. Chay kutipiraj allinta entienderqani, Jehová kʼacha Dios kasqanta, kusisqa kausakunayta munasqantataj.

Watejmanta tantakuykunaman rispaqa, Testigoswan kaspa aswan kusisqa kasqayta repararqani. Jinapis wawa kashajtiy imaynachus kausayniy kasqan, mayta llakichiwaj. Chayrayku ni pipi atienekojchu kani. Uj hermanataj Bibliawan yanapawarqa llakiyniyta atipanaypaj. Chantá wajkunawan masichakuytapis astawan yachakorqani.

DIOSTA SIRVISPA KUSIYTA TARERQANI

Kay 1997 watapi qosaywan Hollywood llajtaman (California, Estados Unidos) riporqayku. Chaypitaj astawan tiempochakorqani Diospa Palabranmanta runasman yachachinaypaj. Chayta ruwaspaqa aswan kusisqa karqani, may rejsisqa kasqaymanta nisqaqa. Kay 2002 watapitaj Cheriwan tinkukorqani, paytaqa unayña Hong Kong llajtapi rejserqani. Kausayniykutaj wakin imaspi rijchʼakorqa. Payqa noqa jinallataj uj wata ñaupajta Hong Kong llajtapi uj concursopi ajllasqa kasqa. Noqa ajllasqa kajtiytaj, pay coronata churawarqa. Chantapis peliculasllapitaj llojsisqa, peliculasta ruwakunanpaj cargoyoj ima kasqa. Chay tiempopeqa Hollywood llajtallapitaj kasharqa.

Cherimanta mayta llakikorqani, novion wañupusqanta yachaspa. Payqa budista karqa, nitaj chay religionninpi sonqocharqankuchu. Noqa jinallataj may rejsisqa kaspapis llakisqa kasharqa, nitaj pipi atienekojchu. Bibliamanta yachakusqaytataj payman willarerqani, jinapis religionninpi imastachus yachachisqankurayku mana cheqa kajta reparajchu.

Cheriqa 2003 watapi, Vancouver llajtamanta (Canadá) uj pʼunchay wajyamuwarqa, maypichus uj peliculata grabashasqa. Payqa kusisqa kasharqa. Imajtinchus willariwarqa, autota manejashaspa, tukuy imata qhawarispataj Diosmanta jinata mañakusqanta: “¿Pitaj kanki? ¿Imataj sutiykiri?”, nispa. Chayllapi Salón del Reino nisqaj punkunta pasasqa, chaypitaj Jehová sutita rikusqa. Payqa, Dios uyarishasqanta yuyaspa, chay rato Jehovaj testigosninwan parlayta munasqa. Noqataj wajyaspa tapuporqani, pisi diasninmantaj Cheriqa Vancouver llajtapi chino parlaypi tantakuyman rerqa.

Cheriqa niwarqa: “Kay runasqa cheqamantapuni yanapayta munawanku. Paykunamanqa llakiyniytapis willariyta atini”, nispa. Chayta nisqanta uyarispa mayta kusikorqani, imajtinchus paypataqa peliculaspi llojsinanpaj llankʼashajtin mana amigosnin karqachu. Cheriqa tantakuykunaman rillarqapuni. Jinapis 2005 watapi iskay peliculaspi llojsinanpaj contratarqanku. Chayrayku Hong Kong llajtaman kutinan karqa. Chaywanpis 2006 watapi, Jehovaj testigon jina bautizakorqa uj jatun tantakuypi Hong Kong llajtapi. Cheriqa Jehovapaj astawan llankʼayta munarqa, trabajonraykutaj mana aterqachu, chayrayku llakisqa kasharqa.

KUSISQA WAJKUNATA YANAPASPA

Kay 2009 watapi Cherij kausaynenqa niña ñaupajta jinachu karqa. Peliculasta manaña ruwarqachu, Diospaj astawan llankʼananpaj. Ashkha hermanosña sumaj amigosnin karqanku. Diosmanta astawan willananpajtaj tiempochakorqa. Kunantaj runasta yanapaspa kusisqa kashan (Mateo 24:14).

Hong Kong llajtapi uj qotu Testigos, Nepal suyumanta kajkunaman Diosmanta willasharqanku. Cheritaj paykunata yanapakunanpaj nepalí parlayta yachakorqa. Hong Kong llajtapeqa Nepal suyumanta kajkunata chejninku mana inglesta, nitaj chinota parlasqankurayku, costumbresninkupis waj jina kasqanrayku. Cheriqa niwaj chay runasman Bibliamanta yachachiy mayta gustasqanta. Uj pʼunchay wasimanta wasi willashajtin uj warmiwan tinkusqa, chay warmeqa Jesusmanta pisillata yachasqa Jehovamantataj ni imata yachasqachu. Cheriqa Bibliapi rikucherqa Jesús, cielopi kashaj Tatanmanta mañakusqanta. Chay warmeqa repararqa Diosmanta mañakuyta atisqanta, jinamanta sumaj willaykunaqa sonqonman chayarqa. Pisi tiemponmantaj qosan, wawan ima Bibliamanta yachakorqanku (Salmo 83:18; Lucas 22:41, 42).

Cherita Diosmanta willaspa kusisqata rikuspa, noqapis kikinta ruwayta munarqani. Chay kutipajqa Hong Kong llajtallapitaj kasharqani. Runasman astawan Diosmanta willanaypajtaj tiempochakorqani. Mayta gustawan runasta uyariy, Diospa Palabranta entiendenankupaj yanapaypis.

Vietnam suyumanta uj warmiman Bibliamanta yachacherqani. Payqa llakisqa, waqay ñawillataj purikoj. Kunanri kusisqa, ashkha amigosniyojtaj.

Cheriwan noqawanqa, Diosta sirvispa kusiyta tarerqayku. Peliculaspi llojsiy, uj tiempopi may rejsisqa kaypis sumaj karqa, jinapis chaykunamanta nisqaqa Jehovamanta runasman yachachiy aswan sumaj karqa. Imajtinchus chayqa Payta jatunchan. Jesuspa nisqanqa cheqapuni karqa. Pay nerqa: “Aswan kusiy wajman qoriy qorichikunamanta nisqaqa”, nispa (Hechos 20:35).