TAPANMANTA
¿Imaynatá Dios guerrasta qhawan?
Ashkha runasqa yuyanku Dios allillanpaj guerrasta qhawasqanta. Imajtinchus Diosqa, ñaupa tiempopi kamachisninta wakin maqanakuykunaman kacharqa, chaytataj Bibliapi nin. Wakinrí yachanku, Diospa Wawan Jesucristo discipulosninman enemigosninkuta munakunankuta yachachisqanta (Mateo 5:43, 44). Chayraykutaj ninku, Diosqa kay tiempopi manaña allinpajchu guerrasta qhawasqanta. Maykʼajmantapachachus ajina kasqantataj mana yachankuchu.
¿Qanrí imatá yuyanki? ¿Allillanpajchu Dios guerrasta qhawan? Allillanpaj qhawajtin, ¿mayqen tropatataj yanapan? Chaykunata yachaspaqa imatachus guerrasmanta yuyasqaykitapis yachallawajtaj. Chantapis Dios guerrasta allillanpaj qhawasqanta, tropayki atipananpajtaj yanapasqanta yachaspaqa, ichá niwaj chay maqanakuy allillan kasqanta, tropayki atipanantataj. Chaywanpis, enemigoykita Dios yanapasqanta yachaspa, ¿kikillantapunichu guerrasmanta yuyawaj?
Chantapis, imaynatachus Dios guerrasta qhawasqanta yachaspaqa, Diosmantapis manaña kikintachu yuyanki. Imajtinchus may chhika runas jinallataj guerras kasqanrayku ñakʼarinki chayqa, ichá tapukunki: “¿Dioschu juchayoj guerras kananpaj? Chayri, ¿ñakʼarejkunamanta Dios llakikunmanchu?”, nispa.
Bibliaj yachachisqanqa mana runaj yuyasqanman jinachu. Astawanpis Diosqa unaymantapacha kunankama mana allinpajchu guerrasta qhawan. Chayrayku kunanqa ukhuncharisun ñaupa tiempopi chantá Jesuspa tiempopi imaynatachus Dios guerrasta qhawasqanmanta. Jinamanta yachasun kay tiempopi imaynatachus Dios guerrasta qhawasqanta. Chantapis aswan qhepaman guerras kanallantapunichus manachus chayta.