TAPANMANTA | ¿TUKUY IMAPI ALLINTA PURIY YANAPAWANCHEJCHU?
Llullakoyqa mana yanapawanchejchu
Sudáfrica suyupi tiyakoj Samantha nin: “Wakin kutispeqa, mana chʼampaykunapi rikukunapaj llullarikoyqa allillan”, nispa.
¿Qanpis Samantha jinachu yuyanki? Runasqa maykʼajllapis chʼampaypi rikukorqanchejpuni. Chaywanpis chay jinapi rikukojtinchejqa, imatachus ruwasqanchej, imayna runachus kasqanchejta rikuchin. Chantapis mana pʼenqaypi rikukuyta munaspa, ichá yuyasunman ruwasqanchej allillan kasqanta. Jinapis sutʼinchakojtenqa, llullakusqanchejrayku mana allin imaspi rikukusunman. Kunantaj imajtinchus llullakuy mana allinchu kasqanta qhawarisun.
LLULLA RUNAPEQA NIÑA ATIENEKUNCHEJCHU
Atienekusqanchej runawanqa allinta kausakunchej, nitaj manchachikunchejchu. Chantapis paypi atienekunapajqa khuska karinanchej tiyan, sutʼita parlarikunanchej tiyan, nitaj sapa ujpis munaynillanchejtachu maskʼananchej tiyan. Chaywanpis uj kutillata llullarqokuwajtinchej chayri waj imata ruwarqojtin niña paypi ujtawan atienekusunmanchu.
Amigoyki llullakusorqa chayqa, sonqo pʼakisqa, wasanchasqatajchá kasharqanki. Chaytaj ajinapuni. Arí, llullakoyqa sumaj amigostapis tʼaqanachin.
WAJKUNAPIS LLULLAKUYLLATATAJ MUNANKUMAN
Robert Innes pichus profesor de Economía de la Universidad de California nisqamanta nin jina “llulla runawan kaspaqa llullakullasunmantaj”. Arí, llullakoyqa uj onqoy jina, chayrayku llulla runawan kaspaqa llullallamantaj tukusunman.
¿Imatá ruwasunman mana llullakunapaj? Chaypajqa Biblia yanapawasunman. Bibliaj yuyaychasqanta wakinta ukhuncharina.