Creesqaykita Bibliaj nisqanwan kikinchay

KAY Jallpʼapi 2.000 millones kuraj runas ninku Cristoj discipulosnin kasqankuta. ¿Qanpis ajinallatatajchu ninki? Kay tiempopi may chhika cristiano nichikojkuna religiones tiyan, chaywanpis sapa religión uj jinata yachachin, nitaj kikintachu yuyanku. Ichá qanpa creenciasniykipis mana kikinchu waj runaspa creenciasninkuwan, pikunachus ninku cristianosllataj kasqankuta. ¿Imapichus creesqaykita yachanaykipunichu tiyan? Arí. Bibliaj yachachisqanman jina kausakuyta munanki chayqa, imapichus creesqaykita yachanayki tiyan.

Jesucristoj tiemponpi, yachachisqasnenqa cristianos sutiwan rejsisqa karqanku (Hechos 11:26). Paykunalla Cristoj yachachisqanta ruwarqanku, chayrayku mana necesitakorqachu waj sutiswan sutichanankuta. Jesús, cristiano religionta sayarichisqanrayku, cristianosqa uj sonqolla Cristo Jesuspa yachachisqanta, kamachisqanta ima ruwarqanku. ¿Iglesiaykipirí Cristoj yachachisqantachu, chantá ñaupa tiempo yachachisqasnin creesqankutachu yachachinku? ¿Imaynatá chayta yachawaj? Iglesiaykipi yachachisqankuta, Bibliaj yachachisqanwan kikinchaspa.

Kaypi tʼukuriy: Jesucristoqa Bibliata mayta respetaj, Diospa Palabran kasqanrayku. Jesusqa mana allinpajchu qhawaj Bibliaj nisqanta qʼewejkunata runaj costumbresninkuta yachachisqankurayku (Marcos 7:9-13). Arí, Jesuspa discipulosninpa creesqankoqa Bibliaj yachachisqanman jinapuni karqa. Cristota sirviyta munajqa tapurikunan tiyan: “¿Religionniypi yachachisqanku Bibliaj yachachisqanman jinachu?”, nispa. Chay tapuyman kutichinapajqa, iglesiaykipi yachachisqankuta, Bibliaj yachachisqanwan kikinchawaj.

Jesús nisqanman jina Diostaqa cheqa kajman jina yupaychananchej tiyan, chaytaj Bibliapi kashan (Juan 4:24; 17:17). Apóstol Pablotaj nerqa salvasqas kananchejpaj cheqa kajta rejsinanchejta (1 Timoteo 2:4). Chayrayku creesqanchejqa, Biblia cheqa kajta yachachisqanman jinapuni kanan tiyan. Chayllataj salvakunapaj yanapawasun.

¿IMAYNATÁ CREESQANCHEJTA BIBLIAJ NISQANWAN KIKINCHASUNMAN?

Kay yachaqanaj recuadronpi sojta tapuykunata, Biblia imatachus sapa tapuyman kutichisqanta ima leeriwaj. Chantapis textosta leeriy, chay tapuykunaj kutichiykunasninpitaj tʼukuriy. Chantá tapurikuy: “¿Religionniypi yachachisqanku Bibliaj yachachisqanwan kikinchu?”, nispa.

Chayta ukhunchareyqa yanapasonqa creesqaykita Bibliaj nisqanwan kikinchanaykipaj. ¿Iglesiaykipi waj imastawan yachachisqankuta Bibliaj nisqanwan kikinchayta munawajchu? Jehovaj testigosnin Bibliamanta cheqa kajta yachachisunkuman. Bibliamanta yachachisunankuta niy; nitaj chaymanta pagankichu. Chayri Internetpi jw.org/qu nisqaman yaykuspa astawan yachakullawajtaj.

1 TAPUY: ¿Pitaj Diosrí?

KUTICHIYNIN: Jehovaqa Jesuspa Tatan, wiñaypaj kaj Dios, paytaj atiyninwan tukuy imata ruwarqa.

BIBLIA NIN

“Señorninchej Jesucristoj Tatan Diosmanta mañakushaspa, graciasta qoykupuni qankunamanta”, nispa (Colosenses 1:3, 4).

“Señor Diosniyku, qanllamin jatunchanapaj jina kanki, may sumajpaj jina qhawana, tukuy atiyniyojtaj, imaraykuchus qanmin tukuy kaj chhikata ruwarqanki”, nispa (Apocalipsis 4:11).

Romanos 10:13; 1 Timoteo 1:17 versiculosta leerillaytaj.

2 TAPUY: ¿Pitaj Jesucristorí?

KUTICHIYNIN: Jesusqa Diospa ñaupaj kaj Wawan. Payqa, Dios ruwasqanrayku rikhurerqa. Chantapis Jesusqa Diosta tukuy sonqo kasukun.

BIBLIA NIN

“[Tataqa] noqamanta kuraj”, nispa (Juan 14:28).

• “Cristoqa mana rikukoj Diospa rijchʼayninmin. Manaraj ima ruwasqa kashajtin, payqa karqapuni, tukuy ruwasqa kajmanta aswan patapi”, nispa (Colosenses 1:15).

• Mateo 26:39; 1 Corintios 15:28 versiculosta leerillaytaj.

3 TAPUY: ¿Imataj espíritu santo?

KUTICHIYNIN: Espíritu santoqa mana uj runachu. Manaqa Diospa kallpan, chaywantaj munayninta juntʼan. Runasqa chay kallpata japʼiyta atinku, chaywantaj yanapachikuyta.

BIBLIA NIN

“Elizabet uyarejtin, wawaqa Elizabetpa wijsan ukhupi kuyurerqa. Elizabettaj Espíritu Santowan juntʼa karqa”, nispa (Lucas 1:41).

“Espíritu Santo qankunaman jamojtin, atiywan juntʼachisqa kankichej”, nispa (Hechos 1:8).

Génesis 1:2; Hechos 2:1-4; 10:38 versiculosta leerillaytaj.

4 TAPUY: ¿Imataj Diospa Reinonrí?

KUTICHIYNIN: Diospa Reinonqa cielopi uj gobierno. Reynintaj Jesús, pichus tumpamantawan Diospa munayninta kay Jallpʼapi juntʼachenqa.

BIBLIA NIN

“Qanchis kaj angelqa cornetata waqacherqa. Chaypacha janaj pachapi sinchʼi parlaykuna uyarikorqa: Kay pachapi reinosqa Señorninchejpataña kanku, Cristompatawan. Paytaj wiñay wiñaypaj kamachenqa”, nispa (Apocalipsis 11:15).

Daniel 2:44; Mateo 6:9, 10 versiculosta leerillaytaj.

5 TAPUY: ¿Tukuy kʼacha runaschu cieloman renqanku?

KUTICHIYNIN: Mana. Diosqa “juchʼuy tropa” ovejasllata ajllarqa, nisunman pisi runasllata cieloman rinankupaj. Jesuswantaj cielomantapacha kamachimonqanku.

BIBLIA NIN

“Juchʼuy tropa ovejasníy, ama manchachikuychejchu, imaraykuchus Tataykichejqa reinonta qankunaman qoyta munan”, nispa (Lucas 12:32).

“Paykunaqa Diospata Cristojtawan sacerdotesninku kanqanku, paywantaj waranqa watasta kamachenqanku”, nispa (Apocalipsis 20:6).

Apocalipsis 14:1, 3 versiculosta leerillaytaj.

6 TAPUY: ¿Imatataj Jallpʼapaj, runaspaj ima Diosninchej munan?

KUTICHIYNIN: Diospa Reinon kamachishajtenqa, Jallpʼa uj paraisoman tukuchisqa kanqa. Chaypitaj kasukoj runasqa mana onqospa, sonqo tiyasqa, wiñaypajtaj kausakonqanku.

BIBLIA NIN

“Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku”, nispa (Salmo 37:10, 11).

“Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu”, nispa (Apocalipsis 21:3, 4).

Salmo 37:29; 2 Pedro 3:13 versiculosta leerillaytaj.