Hermanosmanta yachakunaypaj kallpachakuni

KAY 10 de diciembre de 1936 watapi nacekorqani, Wichita (Kansas, Estados Unidos) llajtapi. Tawa hermanos karqayku. Noqataj kuraj kaj kani. Tatay William, mamay Jeanwan tukuy sonqo Jehovata sirvej kanku. Tatayqa congregacionpi yanapakoj, imaynatachus kunan ancianosta umachaj hermano ruwan, ajinata. Abuelay Emma Wagnerqa, mamayman, waj runasmanwan Diosmanta yachacherqa. Ujnin estudionqa Gertrude Steele karqa. Paytaj Puerto Ricopi ashkha watasta misionera karqa. Chayrayku wajkunamanta mayta yachakuyta aterqani.

YACHAKUSQAYTAQA MANA QONQANICHU

Phishqa watayoj kashaspa, uj sábado tarde tataywan khuska La Atalaya, Consolación (kunantaj ¡Despertad!) revistaswan callepi willasharqayku. Chay wataspeqa llajtay Iskay Kaj Guerra Mundialpi kasharqa. Tataytajrí mana chayman rerqachu. Willashajtiykoqa uj machasqa doctor tatayta insultarqa, tatay mana guerraman risqanmanta. Nerqataj manchali kasqanta, nitaj llajtanta munakusqanta. “¡Sajmaway niyki, qʼewa!”, nispataj qhapariykorqa. Mancharisqa kashaspapis, tʼukorqani tatay mana kutichikusqanmanta. Tatayqa chayman tantakamoj runasman willallarqapuni. Chay doctortaj chayninta pasasharqa chay soldadota qhaparerqa: “¡Imanaychejpis kay qʼewa runawan!”, nispa. Soldadotajrí machasqa kasqanta rikuspa nerqa: “¡Riy wasiykiman, machasqa kashanki!”, nispa. Chantá iskayninku riporqanku. Chay diata yuyarikuspaqa, Jehovaman agradecekuni tatayman kallpata qosqanmanta. Tatayqa Wichitapi iskay peluqueriasniyoj karqa, chay doctortaj clienten karqa.

Pusaj watasniyoj kashajtiy, tatasniy wasinkuta, peluqueriasninkuta ima venderparqanku. Ruedasniyoj wasitataj ruwakorqanku. Chantá Coloradoman riporqayku, maypichus pisi hermanoslla karqanku, chayman. Grand Junction llajtaj qayllanpitaj tiyakorqayku. Tatasneyqa precursores karqanku, kausakunaykupajtaj chajrapi yanapakuspa, animalesta qhawaspa trabajaj kanku. Chay lugarpeqa tatasniypa yanapayninwan, Jehovaj bendicionninwan ima uj congregación rikhurerqa. Tatayqa 20 de junio de 1948 watapi uj mayitupi bautizawarqa. Noqawan khuskataj wajkunapis bautizakullarqankutaj. Paykunamanta ujnintaj karqa Billie Nichols warmin ima. Paykunaqa aswan qhepaman congregacionesta waturispa llankʼarqanku, imaynatachus qhari wawanku warminwan khuska ruwarqanku, ajinata.

Tukuy sonqo Jehovata sirvej hermanoswan masichakorqayku. Kallpachanakunaykupaj jinataj Diosmanta parlarikoj kayku. Astawantaj masichakorqayku Don sutiyoj hermanowan Earlenewan, Davewan Juliawan, Si sutiyoj hermanowan Marthawan ima. Paykunamantaqa yachakorqani Diospa Gobiernonmanta willayta ñaupajman churay, mayta kusichiwasqanchejta.

WAJ LUGARMANÑATAJ RIPUNI

Amigoyku Bud Hastyqa 19 watasniyoj kashajtiy Estados Unidospa ura ladonman paywan rinayta niwarqa. Chaypitaj precursor karqani. Congregacionesta waturej hermanoqa Ruston (Luisiana) llajtaman rinaykuta niwarqayku. Chaypeqa ashkha hermanos niña Diosmanta willasharqankuchu. Tantakuyman runas mana jamojtinkupis, sapa semana tukuy tantakuykunata ruwanaykuta niwarqayku. Chaytataj ruwarqayku. Tantakunaykupajqa uj wasita tarerqayku, chaytataj allinchaykorqayku. Qallariypeqa iskaynillayku tantakuypi kaj kayku, patamanta parlarimunaykupajtaj turnakoj kayku. Mana pataman wicharejtaj tapuykunaman kutichej. Uj rikuchiyta ruwanayku kajtintaj, iskaynillayku ruwaj kayku. Aswan qhepamantaj uj abuelita hermana jamuyta qallarerqa. Tiempo pasasqanman jinataj Bibliamanta wakin yachakojkuna, niña predicacionman rej wakin hermanos ima jamorqanku. Usqhayllatataj uj congregación rikhurerqa.

Uj kuti amigoy Budwan kashaspa uj pastorwan tinkorqayku. Chay pastortaj mana rejsisqay textosmanta parlarqa. Mana kutichiyta atispataj llakikorqani, imapichus creesqaypitaj allinta tʼukurerqani. Chay pastorpa tapuykunasninman kutichinaypajqa uj semanatapuni tutakama Bibliata mayta estudiarqani. Chaytaj creeyniyta kallpacharqa. Wakichisqataj kasharqani uj pastorwan parlarinaypaj.

Pisi tiemponman congregacionesta waturej hermanoqa El Dorado (Arkansas) llajtaman ripunaykuta niwarqayku, chaypi kaj congregacionta yanapanaykupaj. Chaypi kashaspaqa Coloradoman sapa kuti rej kani cuartelman presentakunaypaj. Uj kuteqa waj precursoreswan risharqayku, Texaspitaj accidentakorqayku. Autoyqa niña sirverqachu. Chayrayku uj hermanoman wajyarqayku yanaparinawaykupaj, paytaj wasinman pusawarqayku, chantá tantakuyman rerqayku, chaypitaj willakorqa accidentakusqaykuta. Hermanosqa may kʼachas karqanku, qolqesituwantaj yanapawarqayku. Chantapis hermanoqa autoyta 25 dolarespi venderqa.

Wichita llajtaman uj runa pusariwarqayku. Chaypeqa familiaypa amigon McCartney kasharqa, payqa precursor karqa. Wawasnin Frankwan Franciswan gemelos karqanku, kunankamataj sumaj amigosnillaypuni kanku. Paykunaqa thanta autitonkuta 25 dolarespi vendepuwarqanku, autoyta venderqani, chay preciollapitaj. Chay kutiraj repararqani, Jehová necesitasqayta qowasqanta Gobiernonmanta willayta ñaupajman churasqayrayku. Chay kutillapitaj paykuna rejsichiwarqanku Bethel Crane sutiyoj hermanata. Payqa kʼacha karqa, may sonqo kʼajaywan Diosta sirvej. Maman Ruthqa sonqo kʼajaywan willaj, 90 watas kurajniyoj kanankamataj precursora karqa. Payqa Wellington (Kansas) llajtapi tiyakorqa. Bethelwanqa niraj watanman casarakorqayku, 1958 watapi. El Doradopitaj noqawan khuska precursora kayta qallarerqa.

DIOSPAJ LLANKʼASPA KUSIKORQAYKU

Waj hermanosmanta yachakusqaykupi tʼukurispaqa, Diospa llajtanpi astawan yanapakunaykuta nerqayku. Chantá Walnut Ridge (Arkansas) llajtaman kachawarqayku, chaypitaj precursores especiales karqayku. Kay 1962 watapitaj Galaad Escuelamanta clase 37 nisqaman wajyariwasqaykurayku, mayta kusikorqayku. Astawantaj kusikorqayku Don sutiyoj amigoyku noqaykuwan khuska escuelaman rinanta yachaspa. Chay escuelamantaqa Nairobi (Kenia) llajtaman kachawarqayku. Llakisqa kasharqayku Nueva York llajtamanta ripushaspa. Nairobipi kaj aeropuertoman chayaspataj hermanos suyashawasqaykuta rikuspa mayta kusikorqayku.

Usqhayllata Keniaman yachaykukorqayku, jinallataj chaypi willaymanpis. Estudiosniykumanta astawan ñauparejkunaqa Chriswan Marywan karqanku. Kunankamataj Keniapi Diosta sirvishallankupuni, paypaj astawan llankʼaspa. Uj watanmantaj Kampala (Uganda) llajtaman kachawarqayku. Chaypitaj noqayku ñaupaj kaj misioneros karqayku. Chay watasqa may sumajpuni karqa, ashkha runas Bibliamanta yachakuyta munarqanku, hermanosninchejmantaj tukorqanku. Africapi kinsa wata khuskanniyojtaña kashajtiyku, Estados Unidosman kutiporqayku familiayoj kanaykupaj. Kutipushaspaqa astawan llakisqa kasharqayku, ni jamushaspapis ajinata llakikorqaykuchu. Chay llajtamanta runasta mayta munakorqayku, uj día kutinaykutataj nerqayku.

WAWASNIYKUTA UYWARQAYKU

Colorado llajtaj inti yaykuynin ladopi tiyakorqayku, tatasniypa llajtanpi. Pisi tiemponmantaj kuraj warmi wawayku Kimberly nacekorqa, casi wata khuskanninman jinataj, Stephany nacekorqa. Sumaj tatas kayta munarqayku, wawasniykuman Diosmanta yachachinaykutataj nerqayku. Wawasniyku noqaykumanta yachakunankuta munarqayku, imaynatachus noqaykupis wajkunamanta yachakorqayku, ajinata. Jinapis uj wawa jatunña kaspa Jehovata sirvinallanpajpuneqa, juchʼuyllaraj kashaspa wajkunamanta allin imasta yachakusqanqa mana uj garantiachu. Sullkʼa hermanoywan, ujnin hermanaywanqa Diosmanta karunchakorqanku. Munanitaj maykʼajllapis wajkunamanta allin imasta yachakusqankuman jina ruwanankuta.

Wawasniykuta uywashaspaqa mayta kusikorqayku, khuskapunitaj imatapis ruwaj kayku. Aspen (Colorado) llajtaj qayllanpi tiyakorqayku, chaypitaj chhullunka patapi resbalaspa pujllanapaj lugares tiyan. Chaymantaj wakin kutis pujllaj rej kayku. Rej jinataj wawasniykuwan parlarej kayku. Jinallataj campoman rispapis, nina kantupi qʼoñikoj jina parlarej kayku. Paykunaqa juchʼuyllaraj kaspapis, jatunña kaspa imatachus ruwanankuta, piwanchus casarakunankuta tapukoj kanku. Noqaykutaj mayta kallpachakorqayku Jehovata munakuyta, kamachiykunasninta kasukuyta yachachinaykupaj. Chantapis nej kayku Diospaj astawan llankʼanankuta, paykuna jina Diospaj llankʼaj hermanollawan casarakunankuta. Jovenllaraj kashaspa casarakuy mana allinchu kasqantapis yuyaycharerqayku. Nej kayku 23 watasninkukama solterallapuni kanankuta.

Tatasniyku jina ruwarqayku. Tantakuykunaman mana faltakunaykupaj kallpachakoj kayku, jinallataj familia jina willanaykupajpis. Diospaj astawan llankʼaj hermanosta alojakoj kayku, misioneros kashaspa imastachus ruwasqaykumantataj kusiywan willarej kayku. Maykʼajllapis tawantiyku Africaman rinaykumanta parlarej kayku, chaytaj wawasniyta mayta kusichej.

Familiapi Diosta yupaychanaykupajqa tantakojpuni kayku. Chaypitaj ensayaj kayku, escuelapi uj chʼampaypi rikukuspa imatachus ruwanankuta. Noqaykoqa compañerosninmanta kaj kayku, paykunataj imapichus creesqankuta sutʼinchawaj kayku. Ajinamanta yachakuspaqa kusikoj kanku, creesqankumantataj mana iskayrayajchu kanku. Wiñasqankuman jinataj, wakin kutis Diosta yupaychanapaj tantakuyta mana munajchu kanku. Chayrayku uj kutipi phiñakuspa nerqani: “¡Riychej cuartoykichejman! ¡Kunan mana tantakusunchu!”, nispa. Paykunataj waqayta qallarerqanku, chay tantakuyta ruwanatataj niwarqanku. Ajinapi repararqani Diosmanta astawan yachakuyta munanankupaj yanapashasqaykuta. Kunantaj Diosmanta yachakuyta may jatunpaj qhawanku. Imamantapis parlarinankuta saqellaj kayku, wakin kutis iskayrayasqankumanta parlajta uyarispataj llakikoj kayku. Ajinamantataj yachaj kayku imachus sonqonkupi kasqanta. Paykunawan allinta parlarejtiykoqa, imatachus Jehová yuyasqanta entiendej kanku.

WAWASNIYKU DIOSTA SIRVEJ RIPUNKU

Wawasniykoqa ratitu wiñarqorqanku. Jehovaj yanapayninwan, llajtanpa yanapayninwan Jehovata astawan munakunankupaj yanaparqayku. Mayta kusikorqayku colegiota tukuytawan precursoras kayta qallarisqankumanta, uj oficiota yachakusqankumantawan. Chantá Cleveland (Tennessee) llajtaman iskay hermanaswan riporqanku. Chay llajtapeqa pisi hermanoslla karqanku. Wawasniyta mayta faltachaspapis, kusikorqayku Jehovapaj astawan llankʼashasqankumanta. Warmiywan khuska watejmanta precursores kayta qallarerqayku. Chantapis waturej hermanoj cuentanmanta, wakin kutispi congregacionesta waturej kayku. Jatun tantakuykunapipis yanapakoj kayku.

Wawasneyqa niraj Cleveland llajtaman rishaspa Londresman (Inglaterraman) viajarqanku, sucursaltataj visitarej rerqanku. Chaypeqa waway Stephany 19 watasniyoj kashaspa Betelpi llankʼaj Paul Norton hermanota rejserqa. Kimberlytaj watejmanta Londresman viajaspa Paulpa compañeron Brianta rejserqa. Stephanyqa 23 watasninta juntʼasqanmanta qhepaman Paulwan casarakorqanku. Kimberlytaj qhepan watanman 25 watasniyoj kashaspa Brianwan casarakorqa. Wawasneyqa 23 watasninkukama solteras karqanku. Mayta kusikorqayku uj allin qosata ajllasqankumanta.

Wawasneyqa qolqenku pisiyajtinpis, Jesús nisqanman jina Diospa Gobiernonmanta willayta ñaupajman churayta, noqaykumanta, abuelosninkumanta ima yachakusqankuta ninku (Mat. 6:33). Abril de 1998 watapi Paultawan Stephanytawan Galaad escuelamanta 105 clase nisqaman wajyarerqanku. Graduakusqankutawantaj Malaui (África) suyuman kacharqanku. Chaypachallataj Briantawan Kimberlytawan Londrespi kaj sucursalman wajyarerqanku. Qhepamantaj Malauipi kaj Betelman kacharqanku. May kusisqa kasharqayku wawasniyku joven kashaspa ajinata llankʼashasqankumanta.

YANAPAKUNAYPAJ WAJYARIWANKU

Nisharqaykichej jina, enero de 2001 watapi hermano Marais wajyarimuwarqa. Payqa Servicios de Traducción nisqamanta encargado karqa. Niwarqataj mundontinmanta traductoresta yanapanapaj inglesmanta cursosta wakichikushasqanta. Noqa 64 watasniyojña kashajtiypis profesor kanaypaj wakichiyta munawarqanku. Chayrayku warmiywan Jehovamanta mañakorqayku, mamasniykuwantaj parlarerqayku. Paykuna abuelitasña kaspapis, sapallankuña quedakunanku kajtinpis yanapakoj rinaykuta niwarqayku. Chayrayku hermano Maraisman wajyarqani yanapakuyta atisqaykuta willanaypaj.

Chaypachallataj mamay cancerwan onqoykorqa. Nerqanitaj: “Linda hermanaywan khuska qhawasqayku”, nispa. Mamaytaj niwarqa: “¡Rinallaykichej tiyan! Mana rejtiykichejqa astawan onqoykusaj”, nispa. Hermanaypis jinallatataj niwarqa. Mayta agradecekuyku paykuna chayta ruwasqankumanta, hermanos yanapawasqaykumantapis. Pattersonpi kaj Centro Educativo de la Watchtower nisqaman risqaykumanta qʼayantin hermanay wajyamuwarqayku, mamay wañupusqantataj niwarqayku. Noqaykoqa mamay munasqanman jina Diospaj astawan llankʼarqayku.

Mayta kusikorqayku Malauipi kaj sucursalman rinaykuta niwajtiyku. Chaypeqa iskaynin warmi wawasniyku qosasninkuwan Diosta sirvisharqanku. Paykunawan tinkuspa mayta kusikorqayku. Chantá Zimbabueman rerqayku, chaymantataj Zambiaman. Kinsa watas khuskanniyojtaña traductoresta yanapashajtiytaj Malauiman kutinayta niwarqanku. Chaypitaj, politicaman mana satʼikusqankurayku qhatiykachasqa kaj hermanospa experienciasninkuta qhelqanay karqa.a

Kay 2005 watapitaj llakisqa kutiporqayku Basalt (Colorado) llajtaykuman. Chaypeqa precursoresllapuni kashayku. Kay 2006 watapitaj Brianwan Kimberlywan wasiyku chayman jamporqanku Mackenzie chantá Elizabeth warmi wawasninkuta uywanankupaj. Paulwan Stephanywanqa Malauillapipuni kashanku. Paultaj Comité de Sucursalmanta ujnin. Kunanqa 80 watasniyojña kashani. Sonqo juntʼasqataj kani, unay tiempo imastachus noqa ruwaj kani, chayta noqawan khuska trabajaj jóvenes ruwashasqankuta rikuspa. Kusisqa kashayku wajkunamanta yachakusqaykuman jina ruwasqaykurayku. Chaytataj ruwarqayku warmi wawasniykuta, allchhisniykuta yanapanaykupaj.